إِرُومَانِييّنْ 4

لِيمَانْ ن إِبْرَاهِيمْ

‏1 مِينْ إِ غَا نِينِي خْ إِبْرَاهِيمْ، أَزدْجِيفْ ن إِبَابَاثنْ نّغْ، مِينْ يُوفَا ذِي دَّاثْ نّسْ؟    ‏2 مِينْزِي مَاڒَا جذِّيثْنغْ إِبْرَاهِيمْ ثُوغَا إِتّْوَاسڭّذْ س ڒخْذَايمْ، أَقَا غَارسْ شَّانْ، مَاشَا وَارْ إِدْجِي شَا غَارْ أَربِّي. ‏3 مِينْزِي مِينْ إِقَّارْ وذْلِيسْ؟ ”يُومنْ إِبْرَاهِيمْ ذِي أَربِّي ؤُشَا إِتّْوَاحْسبْ أَسْ-د مَانْ أَيَا ذ ثَاسڭْذَا.“    ‏4 ونِّي إِخدّْمنْ وَارْ ذ أَسْ ثتّْوَاحسّبْ شَا ڒْمُونثْ خْ ڒحْسَابْ ن أَرْضَا مَاشَا خْ ڒحْسَابْ ن ؤُمَارْوَاسْ مِينْزِي تُّورْسنْ أَسْ-د. ‏5 مَاشَا ونِّي وَارْ إِخدّْمنْ، مَاشَا يُومنْ ذڭْ ونِّي إِتّْسڭَّاذنْ إِمذْنَابْ، أَقَا لِيمَانْ نّسْ أَذْ أَسْ د-إِتّْوَاحْسبْ ذ ثَاسڭْذَا. ‏6 أَمْ مَامّشْ إِنَّا ذَاوُوذْ عَاوذْ خْ سّعْذْ ن بْنَاذمْ ونِّي ؤُمِي د أَسْ إِحْسبْ أَربِّي ثَاسڭْذَا بْڒَا ڒخْذَايمْ، ؤُمِي إِنَّا:

‏7 ”سّعْذْ ن يِينِّي ؤُمِي إِتّْوَاغْفَارْ ؤُخطُّو نْسنْ،

إِنِّي ؤُمِي إِسّْذُوڒِي أَربِّي دّْنُوبْ نْسنْ.   

‏8 سّعْذْ ن بْنَاذمْ ؤُمِي وَارْ د أَسْ إِحسّبْ شَا أَربِّي دّْنُوبْ نّسْ.“   

‏9 مَا سّعْذْ-أَ خْ ينِّي إِتّْوَاخثْننْ وَاهَا نِيغْ عَاوذْ خْ ينِّي وَارْ إِتّْوَاخثْننْ؟ س مِينْزِي نقَّارْ: ”لِيمَانْ ن إِبْرَاهِيمْ إِتّْوَاحْسبْ أَسْ-د ذ ثَاسڭْذَا!“   

‏10 مَامّشْ ذ أَسْ ث-إِ-د إِتّْوَاحْسبْ؟ مَا ڒَامِي ثُوغَا س وخْثَانْ نِيغْ مَاڒَا ثُوغَا بْڒَا أَخْثَانْ؟ وَارْ ثُوغِي س وخْثَانْ، مَاشَا ثُوغَا بْڒَا أَخْثَانْ.

‏11 مِينْزِي إِكْسِي أَخْثَانْ ذ ڒعْڒَامثْ، ؤُ أَشمِّيعْ ن ثْسڭْذَا إِكْسِي ث س لِيمَانْ ؤُمِي ث ثُوغَا بْڒَا أَخْثَانْ، حِيمَا أَذْ يِيڒِي ذ ثَابَابَاثْ إِ مَارَّا إِنِّي يُومْننْ وَاخَّا نِيثْنِي بْڒَا أَخْثَانْ، حِيمَا أَذْ أَسنْ د-إِتّْوَاحْسبْ لِيمَانْ ذ ثَاسڭْذَا عَاوذْ.   

‏12 نتَّا ذ ثَابَابَاثْ إِ ينِّي س وخْثَانْ، وَارْ إِدْجِي إِ ينِّي إِدْجَانْ س وخْثَانْ وَاهَا، مَاشَا عَاوذْ إِ ينِّي إِڭُّورنْ ذڭْ إِصُورَافْ ن لْ-إِيمَانْ ن جذِّيثْنغْ إِبْرَاهِيمْ ؤُمِي ثُوغَا بْڒَا أَخْثَانْ.

‏13 مِينْزِي لْوَاعْذْ إِ إِبْرَاهِيمْ ؤُ إِ زَّارِيعثْ نّسْ بلِّي أَذْ يِيڒِي ذ أَوْرِيثْ ن دُّونشْثْ، وَارْ ث إِكْسِي شَا زِي شَّارِيعَا، مَاشَا زِي ثْسڭْذَا ن لْ-إِيمَانْ نّسْ.

‏14 مِينْزِي مَاڒَا إِنِّي زِي شَّارِيعَا ذ إِوْرِيثنْ، أَقَا لْ-إِيمَانْ إِخسَّارنْ ؤُڒَا ذ لْوَاعْذْ إِبضْڒنْ.   

‏15 مَاغَارْ شَّارِيعَا ثتَّارُو أَغْضَابْ، مِينْزِي مَانِي وَارْ ثدْجِي شَّارِيعَا، وَارْ ذِينْ إِدْجِي ؤُڒَا ذ أَعذِّي ن شَّارِيعَا.   

‏16 س ؤُينِّي نتّْوَاسڭّذْ س لْ-إِيمَانْ، إِخْسْ أَذْ يِينِي س أَرْضَا، مَاحنْذْ أَذْ يِيڒِي لْوَاعْذْ نِيشَانْ إِ قَاعْ زَّارِيعثْ، وَارْ إِدْجِي إِ ينِّي إِدْجَانْ زِي شَّارِيعَا وَاهَا، مَاشَا عَاوذْ إِ ينِّي إِدْجَانْ زِي لْ-إِيمَانْ ن إِبْرَاهِيمْ، ونِّي ذ ثَابَابَاثْ ن مَارَّا إِذْنغْ،   

‏17 أَمْ مَامّشْ ثُورَا: ”أَقَا ڭِّيغْ شكْ ذ ثَابَابَاثْ إِ يِيجّْ ن ؤُبَارُّو زِي ڒڭْنُوسْ!“، زَّاثْ إِ أَربِّي ونِّي زِي ثُوغَا يُومنْ نتَّا، ونِّي إِتِّيشنْ ثُوذَارْثْ إِ إِمتِّيننْ ذ ونِّي إِتّْڒَاغَانْ إِنِّي وَارْ إِدْجِينْ أَخْمِي دْجَانْ.   

‏18 وَاخَّا إِقْضعْ أَسْ ڒَايَاسْ، أَقَا يُومنْ س ؤُسِيثمْ أَذْ إِذْوڒْ ذ ثَابَابَاثْ إِ وَاطَّاسْ ن ڒڭْنُوسْ أَمْ مَامّشْ ثُورَا: ”أَمُّو إِ غَا ثِيڒِي زَّارِيعثْ نّكْ.“   

‏19 لِيمَانْ نّسْ وَارْ ثُوغِي إِضْعفْ، ؤُمِي د-إِحْسبْ أَرِّيمثْ نّسْ ثمُّوثْ أَمْ ثُوغَا غَارسْ مْيَا ن إِسڭّْوُوسَا، ؤُ ؤُمِي إِغْرِي ؤُعذِّيسْ ن سَارَا. ‏20 نتَّا وَارْ إِشكّْ شَا ذِي لْوَاعْذْ ن أَربِّي أَخْمِي س نّقْسْ ن لْ-إِيمَانْ، مَاشَا إِمْحضْ ذِي لْ-إِيمَانْ نّسْ، إِوْشَا أَعُودْجِي إِ أَربِّي.    ‏21 ثُوغَا إِسّنْ نِيشَانْ بلِّي مِينْ زَّايسْ ثُوغَا إِوَاعْذْ أَربِّي، إِزمَّارْ أَذْ ث إِڭّْ ثَانْيَا.    ‏22 س ؤُينِّي إِتّْوَاحْسبْ أَسْ-د لِيمَانْ ذ ثَاسڭْذَا.   

‏23 مَاشَا وَارْ ثُورِي ذِي سِّيبّثْ نّسْ وَاهَا، أَقَا إِتّْوَاحْسبْ أَسْ-د لْ-إِيمَانْ نّسْ ذ ثَاسڭْذَا،    ‏24 مَاشَا عَاوذْ ذِي سِّيبّثْ نّغْ، مِينْزِي نتَّا أَذْ أَنغْ ث-إِ-د-إِحْسبْ ذ ثَاسڭْذَا، إِ نشِّينْ إِنِّي إِتَّامْننْ ذڭْ ونِّي إِ د-إِسّْنكَّارنْ يشُّو لْمَاسِيحْ، سِيذِيثْنغْ، زِي ثَادَّارْثْ ن إِمتِّيننْ، ‏25 أَقَا ذ نتَّا إِتّْوَاسلّْمنْ ذِي سِّيبّثْ ن دّْنُوبْ نّغْ ؤُشَا إِكَّارْ-د حِيمَا أَذْ أَنغْ إِسڭّذْ.