ڒفْضڒْ ن شَّارِيعَا إِ وُوذَاينْ
3
1 إِ خنِّي، مَانْ ڒفْضڒْ غَارْ وُوذَاينْ، نِيغْ مَانْ ثِيزِي ن وخْثَانْ؟ 2 أَطَّاسْ خْ كُوڒْ إِغزْذِيسنْ! خنِّي غَارْ ؤُمزْوَارْ مّوْشنْ أَسنْ وَاوَاڒنْ ن أَربِّي. ▪ 3 مَاغَارْ مَاڒَا ثُوغَا شَا زَّايْسنْ وَارْ ؤُمِيننْ شَا، مَا خنِّي تّْوَابْضْڒنْ نِيثْنِي ڒَامَانْ ن أَربِّي، مِينْزِي نِيثْنِي وَارْ ؤُمِيننْ شَا؟ ▪ 4 عمَّارْصْ، مَاشَا أَذْ يِيڒِي أَربِّي ذ ثِيذتّْ ؤُشَا كُوڒْ بْنَاذمْ ذ بُو-إِخَارِّيقنْ، أَمْ مَامّشْ ثُورَا: ”شكْ أَذْ ثْبَانذْ ذ أَمْسڭّذْ س وَاوَاڒنْ نّكْ،
ؤُ أَذْ ثْغڒْبذْ خْمِي شكْ إِ غَا حَاسْبنْ.“ ▪
5 مَاڒَا مِينْ وَارْ إِسّڭّْذنْ ذَايْنغْ أَقَا إِسّْبيّنْ ثَاسڭْذَا ن أَربِّي، مِينْ غَا نِينِي عَاذْ خنِّي؟ مَا أَربِّي وَارْ غَارسْ بُو ڒْحقّْ، نشّْ سَّاوَاڒغْ أَمْ إِجّْ ن بْنَاذمْ ذ أَمذْنُوبْ، ؤُمِي خَانغْ إِڭَّا أَغْضَابْ نّسْ؟ 6 وَارْ خَاسْ نسِّيوِيڒْ! مَامّشْ إِ غَا إِحَاسبْ أَربِّي دُّونشْثْ ڒخْذنِّي؟ 7 مَامّشْ مَاڒَا ثْفيّضْ ثِيذتّْ ن أَربِّي غَارْ ؤُعُودْجِي نّسْ س ؤُخَارِّيقْ إِنُو، مَايمِّي عَاذْ إِ غَا تّْوَاحَاسْبغْ أَمْ ؤُمذْنُوبْ؟ 8 نِيغْ ثدْجْ ثْمسْڒَاشْثْ أَمْ مَامّشْ ث قَّارنْ إِنِّي ذَايْنغْ إِشقّْفنْ، بلِّي نشِّينْ نقَّارْ: ”أجّْ أَنغْ أَذْ نڭّْ ثُوعفّْنَا، حِيمَا أَذْ زَّايسْ د-يكّْ مِينْ إِشْنَانْ!“؟ أَقَا ڒْحُوكْمْ خَاسنْ أَذْ إِتّْوَاخمّڒْ أَڒْ شّْرعْ.
ؤُڒَا ذ إِجّنْ إِتّْسڭّذْ قِيبَاتْشْ إِ أَربِّي
9 إِ خنِّي مَامّشْ؟ مَا نشِّينْ حْسنْ؟ قْبڒْ أَقَا نُوفَا أَقَا ؤُذَاينْ ذ إِرَامِييّنْ مَارَّا سَاذُو دّنْبْ، ▪
10 أَمْ مَامّشْ ثُورَا:
”ؤُڒَا ذ إِجّْ وَارْ إِدْجِي ذ أَمْسڭّذْ، ▪
11 ؤُڒَا ذ إِجّْ وَارْ إِفهّمْ،
ؤُڒَا ذ إِجّْ وَارْ يَارزُّو خْ أَربِّي.
12 مَارَّا فّْغنْ زڭْ وبْرِيذْ ؤُ مّنْضَارنْ،
ؤُڒَا ذ إِجّْ وَارْ إِتّڭّْ ثْشُونِي،
ؤُڒَا ذ إِجّْ. ▪
13 ثْمِيجَّاوِينْ نْسنْ ذ إِمضْڒَانْ يَارزْمنْ،
س إِڒْسَاونْ نْسنْ شمّْثنْ،
سّمْ ن إِفِيغْرَانْ سَاذُو إِينْشِيشنْ نْسنْ، ▪
14 أَقمُّومْ نْسنْ إِشُّورْ س نّعْڒثْ ذ ثَارْزُوڭِي، ▪
15 س إِضَارنْ نْسنْ تّْقدْجِيقنْ غَارْ ؤُسِيزّڒْ ن إِذَامّنْ، ▪
16 أَريّبْ ذ ثَامَارَا ذڭْ إِبْرِيذنْ نْسنْ،
17 أَبْرِيذْ ن ڒهْنَا وَارْ ث سِّيننْ شَا، ▪
18 ثِيڭّْوُوذِي ن أَربِّي وَارْ ثدْجِي قِيبَاتْشْ إِ ثِيطَّاوِينْ نْسنْ.“▪
19 نشِّينْ نسّنْ بلِّي مَارَّا مِينْ ثقَّارْ شَّارِيعَا، أَقَا ثقَّارْ إِ-ث إِ ينِّي إِدْجَانْ سَاذُو شَّارِيعَا، حِيمَا أَذْ إِتّْوَاقّنْ كُوڒْ أَقمُّومْ ؤُشَا أَذْ ثذْوڒْ مَارَّا دُّونشْثْ ذَايسْ ڒْعِيبْ زَّاثْ إِ أَربِّي، 20 مَاغَارْ زِي ڒخْذَايمْ ن شَّارِيعَا وَارْ إِتّْوَاسڭّذْ ؤُڒَا ذ إِجّْ ن بْنَاذمْ قِيبَاتْشْ نّسْ، مِينْزِي س شَّارِيعَا إِ تّْوَاسّنْ دّْنُوبْ. ▪
ثَاسڭْذَا س لِيمَانْ وحّْذسْ
21 مَاشَا ڒخُّو أَقَا ثضْهَارْ-د ثْسڭْذَا ن أَربِّي بْڒَا شَّارِيعَا، ثْشهّذْ خَاسْ شَّارِيعَا ذ إِنَابِييّنْ، ▪ 22 أَقَا ثَاسڭْذَا ن أَربِّي زِي لِيمَانْ ن يشُّو لْمَاسِيحْ غَارْ مَارَّا ؤُ خْ مَارَّا إِنِّي زَّايسْ يُومْننْ، مِينْزِي وَارْ ذِينْ بُو ڒْفَارْزْ. 23 مِينْزِي مَارَّا خْضَانْ ؤُشَا إِنقْصْ إِ-ثنْ ؤُعُودْجِي ن أَربِّي، 24 ؤُشَا تّْوَاسڭّْذنْ بَاطڒْ س أَرْضَا نّسْ ؤُ س وصْڒَاحْ إِ إِدْجَانْ ذِي يشُّو لْمَاسِيحْ. ▪ 25 أَربِّي إِڭَّا إِ-ث ذ أَصْڒَاحْ قْبڒْ، سْ لِيمَانْ ذڭْ إِذَامّنْ نّسْ، ذِي طّْوعْ ن دّْنُوبْ نّغْ نِّي ثُوغَا نڭَّا زِيشْ، ذِي ڒْوقْثْ نِّي ذ أَنغْ إِوْشَا أَربِّي س تَّاسِيعْ ن ڒْخَاضَارْ نّسْ حِيمَا أَذْ د-إِبَانْ ثَاسڭْذَا نّسْ ذِي ڒْوقْثْ-أَ، ▪ 26 حِيمَا أَذْ يِيڒِي نتَّا ذ أَمْسڭّذْ ؤُ ذِي ثْسڭْذَا أَذْ يَارّْ ذ أَمْسڭَّاذْ وِي إِدْجَانْ زِي لِيمَانْ ن يشُّو لْمَاسِيحْ.
27 مَانِي إِدْجْ خنِّي ؤُسمْغَارْ؟ وَارْ خَاسْ نسِّيوِيڒْ. س مَانْ شَّارِيعَا؟ س مَانْ ڒخْذَايمْ؟ عمَّارْصْ، مَاشَا س شَّارِيعَا ن لِيمَانْ. 28 خنِّي نحْسبْ بلِّي بْنَاذمْ أَذْ إِتّْوَاسڭّذْ س لِيمَانْ، وَارْ إِدْجِي س ڒخْذَايمْ ن شَّارِيعَا. ▪ 29 نِيغْ أَربِّي ن وُوذَاينْ وَاهَا، وَارْ إِدْجِي ن ڒڭْنُوسْ عَاوذْ؟ وَاهْ، ؤُڒَا ن ڒڭْنُوسْ! 30 مِينْزِي أَربِّي ذ إِجّنْ ونِّي إِ غَا إِسڭّْذنْ إِنِّي إِتّْوَاخثْننْ س لِيمَانْ، ؤُ عَاوذْ إِنِّي وَارْ إِتّْوَاخْثِيننْ س لِيمَانْ. 31 مَا نْبطّڒْ شَّارِيعَا س لِيمَانْ؟ وَايَّاوْ، س ڒمْقْڒُوبْ، نشِّينْ أَذْ نضْمنْ شَّارِيعَا.