أَسْڭنْفِي ن إِجّْ ن ورْيَازْ ذ أَنعْضَابْ
3
1 شِيمْعُونْ بُوطْرُوسْ ذ يُوحَانَّا جْمِيعْ ڭعّْذنْ غَارْ زَّاوشْثْ ثَامقّْرَانْثْ ذِي ثْسَاعّثْ ن ثْژَادْجِيثْ ثنِّي ذ وِيسّْ ثسْعَا، إِخْسْ أَذْ يِينِي ذ ثْڒَاثَا أَوَارْنِي ضّْهُورْ. 2 خْزَارْ، ثُوغَا ذِينْ إِجّْ ن ورْيَازْ ذ أَنعْضَابْ زڭْ ؤُعذِّيسْ ن يمَّاسْ، أَرْپُونْ ث إِنِّي إِنُّومنْ أَذْ ث-إِ-د-أَوْينْ، سّْغِيمَانْ ث غَارْ ثوَّارْثْ ن زَّاوشْثْ ثَامقّْرَانْثْ ؤُمِي قَّارنْ ’ثَاوَّارْثْ ثَاصبْحَانْثْ‘، حِيمَا أَذْ إِتَّارْ صّذْقثْ زڭْ إِنِّي إِتَّاذْفنْ غَارْ زَّاوشْثْ ثَامقّْرَانْثْ. ▪ 3 أَقَا وَا، ؤُمِي إِژْرَا بلِّي شِيمْعُونْ ذ يُوحَانَّا تَّاذْفنْ غَارْ زَّاوشْثْ ثَامقّْرَانْثْ، إِتَّارْ زَّايْسنْ صّذْقثْ. 4 شِيمْعُونْ أَكْ-ذ يُوحَانَّا نْضَارنْ ذَايسْ ثِيطَّاوِينْ، نَّانْ أَسْ: ”خْزَارْ ذَايْنغْ!“ 5 نتَّا إِقْشعْ ذَايْسنْ، إِتّْرَاجَا أَذْ زَّايْسنْ إِطّفْ شَا. 6 إِنَّا أَسْ شِيمْعُونْ: ”نُّوقَارْثْ ذ وُورغْ وَارْ غَارِي دْجِينْ، مَاشَا مِينْ غَارِي ذ مَانْ أَيَا إِ ذ أَشْ غَا وْشِيغْ س يِيسمْ ن يشُّو لْمَاسِيحْ نَّاصِيرِي! كَّارْ، ثُويُورذْ!“ ▪ 7 إِطّفْ إِ-ث زڭْ ؤُفُوسْ نّسْ أَفُوسِي ؤُشَا إِسّْنكَّارْ إِ-ث. ڒخْذنِّي منْعنْ إِضَارنْ نّسْ ذ ثِيشعْبِينْ نّسْ، 8 إِنْڭزْ ؤُشَا إِبدّْ خْ إِضَارنْ، إِڭُّورْ ؤُشَا يُوذفْ أَكِيذْسنْ غَارْ زَّاوشْثْ ثَامقّْرَانْثْ، إِڭُّورْ، إِنڭّزْ، إِسّمْغَارَا ذِي أَربِّي. ▫ 9 مَارَّا ڒْڭنْسْ إِژْرَا إِ-ث إِڭُّورْ إِسّمْغَارَا ذِي أَربِّي.
10 سّْننْ إِوْذَانْ أَقَا نتَّا ذ ونِّي ثُوغَا إِتّْغِيمَانْ إِتّتَّارْ كُوڒْ أَسّْ غَارْ ’ثوَّارْثْ ثَاصبْحَانْثْ‘ ن زَّاوشْثْ ثَامقّْرَانْثْ ؤُشَا نِيثْنِي ذوْڒنْ شُّورنْ س وذْهَاشْ ذ ؤُثبْهثْ خْ مِينْ ذ أَسْ إِمْسَارنْ.
11 أَمْ ثُوغَا أَرْيَازْ أَنعْضَابْ إِتّْشبَّارْ ذِي شِيمْعُونْ ذ يُوحَانَّا، دُّوقّْزنْ خَاسنْ مَارَّا إِوْذَانْ غَارْ ؤُسقِّيفْ أَكْ-ذ ؤُكُولْوَارْ ذ إِبِيلَارنْ، ؤُمِي قَّارنْ ’أَسقِّيفْ ن سُولِيمَانْ‘، ثْبهْثنْ.
12 ؤُمِي إِژْرَا شِيمْعُونْ أَيَا، إِطّفْ ذڭْ وَاوَاڒْ، إِنَّا أَسنْ: ”أَ إِرْيَازنْ ن إِسْرَائِيل، مِينْ كنِّيوْ إِذعْونْ ثتّْبهْثمْ س ؤُيَا؟ مَايمِّي ذَايْنغْ ثجْعَارمْ أَخْمِي س جّهْذْ نّغْ نِيغْ س صُّولْطَا نّغْ نَارّْ إِ-ث إِڭُّورْ؟
13 أَربِّي ن إِبْرَاهِيمْ ذ إِسْحَاقْ ذ يَاعْقُوبْ، أَربِّي ن ڒجْذُوذْ نّغْ، أَقَا إِسّْعُودْجْ مِّيسْ يشُّو ونِّي ثْسلّْممْ ؤُ ثْمنْضَارمْ زَّاثْ ن وُوذمْ ن بِيلَاطُوسْ ونِّي ثُوغَا خَاسْ إِحْكمْ س إِجّْ ن ڒْحُوكْمْ إِسڭّْذنْ ؤُ ثُوغَا إِخْسْ أَذْ أَسْ يَارْخُو. ▪
14 مَاشَا كنِّيوْ أَقَا ثنْكَارمْ أَمْقدَّاسْ ذ أَمْسڭَّاذْ، ثْزَاوْڭمْ أَذْ أَومْ إِمّوْشْ أَرْيَازْ أَقتَّاڒْ. ▪
15 أَقَا ثنْغِيمْ أَزدْجِيفْ ن ثُوذَارْثْ، ونِّي د-إِسّْنكَّارْ أَربِّي زِي ثَادَّارْثْ ن إِمتِّيننْ، أَقَا نشِّينْ مَارَّا ذ ڒشْهُوذْ نّسْ. ▪
16 س لْ-إِيمَانْ ذڭْ يِيسمْ نّسْ، أَقَا إِسّجْهذْ ؤُ إِسّْڭنْفَا وَا ونِّي ثتّْوَاڒَامْ، ثسّْنمْ ث. لْ‘إِمَانْ ذَايسْ أَقَا إِوْشَا أَسْ أَڭنْفِي أَيَا زَّاثْومْ مَارَّا.
17 ڒخُّو، أَ أَيْثْمَا، سّْنغْ، أَقَا ثڭِّيمْ أَيَا س ثْقُوبَّانشْثْ، أَمْ مَامّشْ إِ ڭِّينْ ؤُڒَا ذ إِمقّْرَاننْ نْومْ.
18 أَمُّو أَقَا إِكمّڒْ أَربِّي مِينْ ثُوغَا إِسِّيزْوَارْ إِخبَّارْ خَاسْ س ؤُقمُّومْ ن مَارَّا إِنَابِييّنْ بلِّي لْمَاسِيحْ إِڭُّورْ أَذْ إِودّبْ. ▪
19 س ؤُينِّي ثُوبمْ، ثْذوْڒمْ غَارْ وبْرِيذْ حِيمَا أَذْ أَومْ إِتّْوَامْسحْ دّْنُوبْ نْومْ ؤُشَا خنِّي أَذْ د-أَسنْ وُوسَّانْ ن أَرَّاحثْ زَّاثْ إِ وُوذمْ ن سِيذِي. ▪ 20 ؤُشَا نتَّا أَذْ أَومْ د-إِسّكّْ ونِّي إِوجْذنْ إِ كنِّيوْ: يشُّو لْمَاسِيحْ، 21 ونِّي إِتّْخصَّا ؤُجنَّا أَذْ ث إِقْبڒْ إِ ؤُكمّڒْ ن إِكُوذنْ ن مَارَّا ثِيمسْڒَايِينْ مِينْ خفْ ثُوغَا إِسَّاوَاڒْ أَربِّي س ؤُقمُّومْ ن مَارَّا إِنَابِييّنْ نّسْ إِقدّْسنْ زِي زْمَانْ. 22 مَاغَارْ مُوسَا إِنَّا:
’سِيذِي أَذْ أَومْ د-إِسّْنكَّارْ إِجّْ ن ؤُنَابِي أَمشْنَاوْ نشّْ زڭْ وَاوْمَاثْومْ.
إِ نتَّا ؤُمِي غَا ثسْڒمْ ذِي مَارَّا مِيخفْ ذ أَومْ إِ غَا إِسِّيوڒْ.‘ ▪
23 أَذْ يِيڒِي بلِّي كُوڒْ ڒعْمَارْ إِ وَارْ إِسْڒِينْ غَارْ ؤُنَابِي أَيَا أَذْ إِتّْوَاسْهلّكْ زڭْ ويْذُوذْ.
24 مَارَّا إِنَابِييّنْ زِي شَامْوِيلْ ذ مَارَّا إِنَابِييّنْ نِّي إِ-ث-إِ-د إِخڒْفنْ، أَقَا إِزْوَارنْ سِّيوْڒنْ بَارّْحنْ س وُوسَّانْ-أَ. 25 كنِّيوْ ذ ثَارْوَا ن إِنَابِييّنْ ؤُ ن ڒْعَاهْذْ إِ إِڭَّا أَربِّي أَكْ-ذ ڒجْذُوذْ نْومْ ڒَامِي ثُوغَا إِقَّارْ إِ إِبْرَاهِيمْ:
’س زَّارِيعثْ نّكْ أَذْ تّْوَابَارْكنْثْ مَارَّا ثِيقبَّاڒْ ن ثمُّورْثْ!‘ ▪
26 زِيشْ إِڭَّا نتَّا ڒْعَاهْذْ نّسْ أَكِيذْومْ ؤُشَا إِسّكّْ-د أَربِّي ڒخُّو مِّيسْ مَاحنْذْ أَذْ أَومْ إِبَاركْ ؤُ مَاحنْذْ أَذْ ثوْشمْ س وعْرُورْ إِ ڒْغَارْ نْومْ ؤُشَا أَذْ ثُوبمْ.“