أَمذْيَا ن ؤُمَارْجُوعْ ن ثْزَايَارْثْ ذ إِخمَّاسنْ إِعفَّاننْ
12
1 إِبْذَا إِسَّاوَاڒْ أَكِيذْسنْ س إِمذْيَا: ”إِجّْ ن بْنَاذمْ إِڭَّا إِجّْ ن ؤُمَارْجُوعْ ن ؤُضِيڒْ، إِژُّو ذَايسْ ثِيزَايَارِينْ، إِقوَّارْ أَسْ-د س إِجّْ ن وفْرَايْ، إِغْزَا ثَاسِيرْثْ ن ؤُضِيڒْ، إِبْنَا ذَايسْ صُّومْعثْ ؤُشَا يَارْهنْ إِ-ث إِ إِخمَّاسنْ ؤُشَا إِسَافَارْ. ▪ 2 ڒَامِي د-يِيوضْ ڒْحَاڒْ، إِسّكّْ إِجّْ ن ؤُمْسخَّارْ غَارْ إِخمَّاسنْ حِيمَا أَذْ إِكْسِي ثَاسْغَارْثْ نّسْ زڭْ وڒْقَاضْ ن ؤُمَارْجُوعْ ن ؤُضِيڒْ. 3 مَاشَا نِيثْنِي طّْفنْ ث، وْثِينْ ث ؤُشَا سّكّنْ ث إِخْوَا. 4 عَاوذْ إِسّكّْ غَارْسنْ إِجّْ ن ؤُمْسخَّارْ نّغْنِي، أَرجْمنْ ث، مَارْژنْ أَسْ ؤُشَا ڒَامِي ث سّْبحْثْڒنْ، ؤُژّْڒنْ خَاسْ. 5 عَاوذْ إِسّكّْ-د غَارْسنْ ونّغْنِي ؤُشَا نْغِينْ ث ؤُڒَا ذ نتَّا. أَمُّو إِ إِسّكّْ عَاذْ أَطَّاسْ ن إِنّغْنِي، هتّْكنْ شَا زَّايْسنْ س ؤُركُّوضْ ذ شَا نّغْنِي زَّايْسنْ نْغِينْ ثنْ. 6 غَارْ ؤُنڭَّارْ إِسّكّْ غَارْسنْ أَينِّي ن مِّيسْ إِ غَارسْ إِ خَاسْ إِعِيزّنْ، إِنَّا: ’نِيشَانْ أَذْ وقَّارنْ مِّي!‘ 7 مَاشَا إِفدْجَاحنْ نِّي نَّانْ جَارْ أَسنْ: ’أَقَا ذ وَا ذ أَوْرِيثْ. زِيذمْ، أَذْ ث ننغْ ؤُشَا أَذْ غَارْنغْ يِيڒِي ڒْوَارْثْ.‘ ▪ 8 كْسِينْ ث، نْغِينْ ث ؤُشَا نْضَارنْ ث بَارَّا إِ ؤُمَارْجُوعْ ن ؤُضِيڒْ. 9 مِينْ إِ غَا يڭّْ بَابْ ن ؤُمَارْجُوعْ ن ؤُضِيڒْ؟ أَذْ د-يَاسْ أَذْ إِنغْ إِخمَّاسنْ ؤُشَا أَذْ إِوْشْ أَمَارْجُوعْ ن ؤُضِيڒْ إِ إِنّغْنِي. 10 مَا وَارْ ثغْرِيمْ ثِيرَا أَيَا؟ ...
’أَژْرُو إِ ثُوغَا إِعِيفّنْ إِبنَّاينْ،
أَقَا إِذْوڒْ ذ أَزدْجِيفْ ن ثغْمَارْثْ. ▪
11 مَانْ أَيَا إِتّْوَاڭّْ زِي سِيذِي،
ؤُ مَانْ أَيَا ثسّْثبْهَاثْ ثِيطَّاوِينْ نّغْ.‘ “ ▪
12 خْسنْ أَذْ ث طّْفنْ مَاشَا نِيثْنِي ڭّْوذنْ زِي ڒْغَاشِي، مِينْزِي فهْمنْ بلِّي ثُوغَا إِسَّاوَاڒْ خَاسنْ س ؤُمذْيَا نِّي. نِيثْنِي جِّينْ ث ؤُشَا ؤُيُورنْ.
أَخدْجصْ ن ضَّارِيبَا إِ قَايْصَارْ
13 خنِّي سّكّنْ غَارسْ شَا ن إِفَارِيسِييّنْ ؤُ شَا زِي ثَادَّارْثْ ن هِيرُوذُوسْ، حِيمَا أَذْ أَسْ ڭّنْ ثَاخْشفْثْ س وَاوَاڒنْ نّسْ. ▪
14 ؤُمِي د-ؤُسِينْ، نَّانْ أَسْ: ”أَ أَمْسغَّارْ، نشِّينْ نسّنْ أَقَا شكْ ذ ثِيذتّْ، وَارْ ثڭّْوِيذذْ زڭْ إِوْذَانْ، ؤُ وَارْ ثْخزَّارذْ شَا غَارْ وُوذمْ ن إِوْذَانْ، مَاشَا ثسّڒْمَاذذْ أَبْرِيذْ ن أَربِّي س ثِيذتّْ. مَا إِحدْجڒْ أَذْ نوْشْ دَّارِيبَا إِ كُوڒْ إِجّنْ زَّايْنغْ إِ قَايْصَارْ نِيغْ لَّا؟ مَا إِتّْخصَّا أَنغْ أَذْ نْخدْجصْ ضَّارِيبَا نِيغْ لَّا؟“
15 ڒَامِي نتَّا يَارْڭبْ خْ نِّيفَاقْ نْسنْ، إِنَّا أَسنْ: ”مَايمِّي إِ ذ أَيِي ثتّْجَارَّابمْ؟ أَوْيمْ أَيِي-د إِجّْ ن ذِينَارْ حِيمَا أَذْ ث ژَترغْ!“
16 إِوْينْ أَسْ-د إِجّْ ن ذِينَارْ. خنِّي إِنَّا أَسنْ: ”وِي يِيڒَانْ ثَاصْوِيرْثْ-أَ ذ ثِيرَا أَيَا؟“ نَّانْ أَسْ: ”ن قَايْصَارْ!“
17 يَارَّا-د يشُّو، إِنَّا أَسنْ: ”وْشمْ خنِّي إِ قَايْصَارْ مِينْ إِدْجَانْ إِ قَايْصَارْ ؤُ إِ أَربِّي مِينْ إِدْجَانْ إِ أَربِّي.“ ؤُشَا تّْعجْبنْ ذَايسْ. ▪
أَسقْسِي ن إِصَاذُوقِييّنْ خْ ثْنُوكْرَا
18 ؤُسِينْ-د غَارسْ عَاوذْ إِصَاذُوقِييّنْ إِنِّي إِقَّارنْ بلِّي وَارْ ذِينْ بُو ثْنُوكْرَا. سّقْسَانْ ث، نَّانْ: ▪
19 ”أَ أَمْسغَّارْ، أَقَا يُورَا أَنغْ مُوسَا، مَاڒَا إِمُّوثْ إِ حذْ ؤُمَاسْ ؤُشَا إِجَّا ثَامْغَارْثْ، مَاشَا وَارْ د-إِجِّي بُو ثَارَّاوْثْ، أَذْ يَاوِي ؤُمَاسْ ثَامْغَارْثْ نِّي ؤُشَا أَذْ أَسْ إِسّْڭعّذْ دُّورِييثْ إِ ؤُمَاسْ. ▪ 20 ثُوغَا ذِينْ سبْعَا ن وَاوْمَاثنْ. أَمزْوَارُو يِيوِي إِشْثْ ن ثمْغَارْثْ ؤُشَا أَوَارْنِي ڒَامِي إِمُّوثْ، وَارْ د-إِجِّي بُو دُّورِييثْ. 21 خنِّي يِيوْيِي إِ-ت ونِّي وِيسّْ ثْنَاينْ ؤُشَا إِمُّوثْ، وَارْ د-إِجِّي بُو دُّورِييثْ ؤُڒَا ذ نتَّا، ؤُشَا أَمُّو ؤُڒَا ذ ونِّي وِيسّْ ثْڒَاثَا. 22 مَارَّا سبْعَا نِّي إِوْينْ ت، وَارْ د-جِّينْ بُو دُّورِييثْ. أَنڭَّارْ نْسنْ مَارَّا ثمُّوثْ ثمْغَارْثْ نِّي عَاوذْ. 23 إِوَا ذِي ثْنُوكْرَا، خْمِي د غَا كَّارنْ، ؤُمِي غَا ثِيڒِي ثمْغَارْثْ نِّي؟ مِينْزِي نتَّاثْ ثُوغَا ذ ثَامْغَارْثْ إِ سبْعَا نِّي مَارَّا.“ 24 يَارَّا-د يشُّو، إِنَّا أَسنْ: ”مَا وَارْ ثْخطِّيمْ شَا مِينْزِي وَارْ ثسِّينمْ شَا إِذْلِيسنْ ذ جّهْذْ ن أَربِّي؟ 25 مَاغَارْ خْمِي د غَا كَّارنْ جَارْ ن إِمتِّيننْ، وَارْ ثنْثْ تِّيوْينْ ذ ثَامْغَارْثْ، ؤُ وَارْ سّْمِيدْجِيشنْ ثِيمْغَارِينْ إِ يرْيَازنْ، مَاشَا أَذْ إِڒِينْ أَمشْنَاوْ لْمَالَاكَاثْ إِ إِدْجَانْ ذڭْ إِجنْوَانْ. ▪ 26 مَاشَا زِي جِّيهثْ ن إِمتِّيننْ أَقَا تّْوَاسْنكَّارنْ-د: مَا وَارْ ثغْرِيمْ ذڭْ وذْلِيسْ ن مُوسَا، مَامّشْ أَكِيذسْ إِسِّيوڒْ أَربِّي زِي شْبَارْقْ أَكْ-ذ إِسنَّاننْ، إِنَّا: ’ذ نشّْ، أَربِّي ن إِبْرَاهِيمْ ذ أَربِّي ن إِسْحَاقْ ذ أَربِّي ن يَاعْقُوبْ!‘؟ ▪ 27 نتَّا مَاشِي ذ أَربِّي ن إِمتِّيننْ مَاشَا ذ أَربِّي ن يِينِّي إِدَّارنْ. س ؤُينِّي أَقَا كنِّيوْ ثْخطَّامْ أَطَّاسْ.“
تَّاوْصيّثْ ثَامقّْرَانْثْ
28 ؤُمِي إِسْڒَا إِجّنْ زڭْ إِمْسڒْمَاذنْ ن إِذْلِيسنْ بلِّي ثُوغَا تّمْهَارْوَاضنْ جَارْ أَسنْ ؤُشَا إِسّنْ بلِّي نتَّا أَقَا يَارَّا-د خَاسنْ مْلِيحْ، خنِّي يُوسَا-د غَارسْ، إِسّقْسَا ث: ”مَانْ ثنْثْ إِدْجَانْ ذ ثَاوْصيّثْ ثَامزْوَارُوثْ خْ كُوڒْشِي؟“ ▪ 29 يَارَّا-د خَاسْ يشُّو: ”أَقَا ثَامزْوَارُوثْ خْ مَارَّا ثِيوصَّا: ’سڒْ أَ إِسْرَائِيل! سِيذِي، أَربِّي نّغْ، سِيذِي ذ إِجّْ. ▪ 30 أَذْ ثخْسذْ سِيذِي، أَربِّي نّكْ س مَارَّا وُوڒْ نّكْ س مَارَّا ڒعْمَارْ نّكْ س مَارَّا ڒعْقڒْ نّكْ س مَارَّا جّهْذْ نّكْ.‘ ثَا ذ ثَاوْصيّثْ ثَامزْوَارُوثْ. 31 ؤُ ثَاوْصيّثْ وِيسّْ ثْنَاينْ، أَمشْنَاوْ ثَانِيثَا، أَقَا ذ ثَا: ’أَذْ ثخْسذْ أَمْقَارّبْ نّكْ أَمشْنَاوْ إِخفْ نّكْ.‘ وَارْ ذِينْ بُو ثوْصيّثْ نّغْنِيثْ ذ ثَامقّْرَانْثْ خْ ثِينَا س ثْنَاينْ.“ ▪ 32 إِنَّا أَسْ ؤُمْسڒْمَاذْ ن إِذْلِيسنْ: ”نِيشَانْ، أَ أَمْسڒْمَاذْ إِنُو، س ثِيذتّْ ثنِّيذْ بلِّي نتَّا ذ إِجّنْ، وَارْ ذِينْ ؤُڒَا ذ إِجّْ نّغْنِي مْغِيرْ نتَّا، 33 ؤُ بلِّي مَاڒَا إِجّْ ن بْنَاذمْ أَذْ ث إِخْسْ س وُوڒْ مَارَّا، س ڒعْقڒْ مَارَّا، س ڒعْمَارْ مَارَّا ؤُ س جّهْذْ مَارَّا ؤُشَا أَذْ إِخْسْ أَمْقَارّبْ نّسْ أَمشْنَاوْ إِخفْ نّسْ، أَقَا ذ مَانْ أَيَا حْسنْ زِي مَارَّا ثِيغَارْصِينْ ن وشْمَاضْ ذ مَارَّا ثِيغَارْصِينْ نّغْنِيثْ.“ 34 ؤُمِي إِژْرَا يشُّو بلِّي يَارَّا-د س ڒعْقڒْ، إِنَّا أَسْ: ”أَقَا شكْ وَارْ ثِيڭّْوِيجذْ شَا خْ ثْڭلْذِيثْ ن أَربِّي.“ خنِّي وَارْ إِعوّڒْ حذْ أَذْ ث إِسّقْسَا ؤُڒَا ذڭْ إِشْثْ ن ثْمسْڒَاشْثْ. ▪
مَانْ ونْ إِدْجَانْ ذ مِّيسْ ن ذَاوُوذْ؟
35 ڒَامِي ثُوغَا إِسّڒْمَاذْ ذِي زَّاوشْثْ ثَامقّْرَانْثْ إِطّفْ يشُّو ذڭْ وَاوَاڒْ، إِنَّا: ”مَامّشْ قَّارنْ إِمْسڒْمَاذنْ ن إِذْلِيسنْ بلِّي لْمَاسِيحْ ذ مِّيسْ ن ذَاوُوذْ؟ ▪ 36 مِينْزِي ذَاوُوذْ س يِيخفْ نّسْ إِنَّا س أَرُّوحْ إِقدّْسنْ:
’إِنَّا سِيذِي إِ سِيذِي إِنُو:
قِّيمْ-د خْ ؤُفُوسِي إِنُو أَڒْ د غَا يَارّغْ ڒْعذْيَانْ نّكْ
ذ ثَانبْذَاثْ سَاذُو إِضَارنْ نّكْ.‘ ▪
37 س ؤُيَا إِتّْڒَاغَا أَسْ-د ذَاوُوذْ: ’سِيذِي إِنُو!‘ مَانِيسْ د-إِكَّا ذ مِّيسْ؟“ مَارَّا ڒْغَاشِي ثُوغَا إِسْڒَا أَسْ س ڒفْرَاحثْ.
أَعْڒَامْ غَارْ ڒْڭنْسْ خْ إِمْسڒْمَاذنْ ن إِذْلِيسنْ
38 إِنَّا أَسنْ ذڭْ ؤُسڒْمَاذْ نّسْ: ”حْضَامْ إِخفْ نْومْ زڭْ إِمْسڒْمَاذنْ ن إِذْلِيسنْ إِنِّي ؤُمِي إِتّعْجِيبْ ڒْحَاڒْ خْمِي إِ غَا ؤُيُورنْ س ڒعْبَايَاثْ ثِيزِيرَارِينْ ؤُ خْمِي إِ خَاسنْ إِ غَا سدْجْمنْ إِوْذَانْ ذِي ڒسْوَاقْ، ▪ 39 إِنِّي ؤُمِي إِتّعْجِيبْ ڒكْرَاسِي ن زَّاثْ ذِي ثمْزِيذَاوِينْ، ؤُڒَا ذ إِمُوشَانْ إِمزْوُورَا غَارْ إِمنْسِيونْ ن وُورَارنْ، 40 إِنِّي إِتّتّنْ ثُوذْرِينْ ن ثِيجَّاڒْ ؤُمِي تّْژَادْجَانْ أَطَّاسْ ذِي طّْوعْ ن إِشْثْ ن ثوْهِيبْثْ. أَقَا إِنَا أَذْ كْسِينْ ڒْحُوكْمْ ذ أَمقّْرَانْ.“ ▪
صّذْقثْ ن ثَاجَّاتْشْ
41 أَمْ إِقِّيمْ يشُّو قِيبَاتْشْ إِ سّنْذُوقْ ن صّذْقثْ، إِژْرَا مَامّشْ إِنطَّارْ ڒْغَاشِي ثِينْعَاشِينْ ذِي سّنْذُوقْ. أَطَّاسْ ن أَيْثْبَابْ ن وَاڭْڒَا ثُوغَا نطَّارنْ ذَايسْ أَطَّاسْ. ▪ 42 ثُوسَا-د إِشْثْ ن ثَاجَّاتْشْ ذ ڒْمسْكِينَا ثنْضَارْ ذَايسْ ثْنَاينْ ن ؤُقِييَّاثْ ن نّْحَاسْ، قَّارنْ أَسنْثْ ’شَامُونَاثْ‘. ▫ 43 خنِّي إِڒَاغَا يشُّو إِ إِمحْضَارنْ نّسْ، إِنَّا أَسنْ: ”س ثِيذتّْ، نشّْ أَذْ أَومْ إِنِيغْ، ثَاجَّاتْشْ-أَ ڒْمسْكِينَا أَقَا ثنْضَارْ ذَايسْ كْثَارْ خْ مَارَّا إِنِّي إِنْضَارنْ ذِي سّنْذُوقْ ن صّذْقثْ. ▪ 44 مِينْزِي مَارَّا نْضَارنْ ذَايسْ زِي مِينْ غَارْسنْ أَطَّاسْ، مَاشَا ثَا زِي ذْرُوسْ نّسْ ثنْضَارْ ذَايسْ كُوڒْشِي مِينْ غَارسْ، مَارَّا ڒعْوتْشْ نّسْ.“