لُوكَا
ثَامزْوَارُوثْ
1
1 ؤُمِي أَطَّاسْ إِذْسنْ ثُوغَا نْوَانْ أَذْ أَرِينْ إِجّْ ن ؤُمزْرُويْ خْ ثْمسْڒَايِينْ إِ زِي نتّْوَاسّقْنعْ، 2 - أَمْ مَامّشْ ذ أَنغْ خبَّارنْ إِنِّي إِژْرِينْ أَوَاڒْ زڭْ ؤُمزْوَارُو ؤُ ثُوغَا أَثنْ ذ إِمْسخَّارنْ نّسْ - ، 3 إِبَانْ أَيِي-د نتَّا ؤُڒَا إِ نشّْ، مِينْزِي ضْفَارغْ مَارَّا ثِيمسْڒَايِينْ مْلِيحْ زڭْ ؤُمزْوَارُو، حِيمَا أَذْ أَشْ د-أَرِيغْ س ؤُستّفْ، أَ ثِييُوفِيلِيسْ إِعِيزّنْ، 4 حِيمَا أَذْ ثسّْنذْ مْلِيحْ ثِيذتّْ ن وَاوَاڒنْ نِّي زِي ثتّْوَاسْڒمْذذْ. زَاكَارِييَا ذ إِلِيصَابِيثْ
5 ثُوغَا ذِينْ ذڭْ وُوسَّانْ ن هِيرُوذُوسْ، أَجدْجِيذْ ن يَاهُوذِييَّا، إِجّْ ن ؤُكهَّانْ، قَّارنْ أَسْ زَاكَارِييَّا. نتَّا زِي ثرْبِيعْثْ ن إِكهَّاننْ ن ثَادَّارْثْ ن أَبِييَا، ؤُشَا ثَامْغَارْثْ نّسْ ثُوغَا-ت زِي ثَارَّاوْثْ ن هَارُونْ، قَّارنْ أَسْ إِلِيصَابِيثْ. ▪ 6 ثُوغَا س ثْنَاينْ إِذْسنْ ذ إِمْسڭَّاذنْ غَارْ أَربِّي، ضْفَارنْ مَارَّا ثِيوصَّا ذ ڒُومُورْ إِسڭّْذنْ ن سِيذِي بْڒَا ڒْعِيبْ. 7 وَارْ ثُوغِي غَارْسنْ بُو ؤُحنْجِيرْ مِينْزِي إِلِيصَابِيثْ ثُوغَا وَارْ د-ثتِّيرُووْ شَا ؤُ ثُوغَا س ثْنَاينْ إِذْسنْ مْغَارنْ ذڭْ وُوسَّانْ.
8 أَقَا إِمْسَارْ ڒَامِي ثُوغَا زَاكَارِييَّا إِتّڭّْ ڒْخذْمثْ ن ؤُكهَّانْ قِيبَاتْشْ إِ أَربِّي خْ نُّوبثْ ن ثرْبِيعْثْ نّسْ، ▪ 9 أَقَا يُوسَا-د ذَايسْ ؤُكشُّوضْ، عْلَاحْسَابْ لْقَاعِيذَا ن إِكهَّاننْ، حِيمَا أَذْ يَاذفْ غَارْ زَّاوشْثْ ثَامقّْرَانْثْ ن سِيذِي مَاحنْذْ أَذْ إِقدّمْ ثَاوْهِيبْثْ ن ڒبْخُورْ. ▪
10 ثُوغَا قَاعْ أَبَارُّو ن ڒْڭنْسْ إِتّْژَادْجْ بَارَّا ذِي ثْسَاعّثْ ن ثوْهِيبْثْ ن ڒبْخُورْ.
11 ڒخْذنِّي إِضْحَارْ أَسْ-د لْمَالَاكْ ن سِيذِي إِ زَاكَارِييَّا، إِبدّْ-د خْ ؤُفُوسِي ن ؤُعَالْطَارْ ن ڒبْخُورْ.
12 ؤُمِي ث إِژْرَا زَاكَارِييَّا، إِنّخْڒعْ ؤُشَا إِڭّْوذْ.
13 إِنَّا أَسْ لْمَالَاكْ: ”وَارْ تّڭّْوذْ شَا، أَ زَاكَارِييَّا، مِينْزِي ثتّْوَاقْبڒْ ثَاژَادْجِيثْ نّكْ. أَقَا إِلِيصَابِيثْ، ثَامطُّوثْ نّكْ، أَذْ أَشْ د-ثَارُووْ أَحنْجِيرْ، أَذْ ث ثْسمِّيذْ يُوحَانَّا. ▪
14 أَذْ أَشْ ثِيڒِي ڒفْرَاحثْ ذ ثْڒِيوْڒِيوْثْ ؤُشَا أَطَّاسْ ن إِوْذَانْ أَذْ فَارْحنْ إِ وخْڒَاقْ نّسْ، ▪
15 مِينْزِي أَذْ يِيڒِي ذ أَمقّْرَانْ غَارْ سِيذِي، وَارْ إِسسّْ بِينُو ؤُڒَا ذ شّْرَابْ. أَذْ إِتّْوَاشُّورْ س أَرُّوحْ إِقدّْسنْ ذڭْ ؤُعذِّيسْ ن يمَّاسْ، ▪
16 ؤُشَا أَذْ د-يَارّْ أَطَّاسْ ن إِحنْجِيرنْ ن إِسْرَائِيل غَارْ سِيذِي، أَربِّي نْسنْ. ▪
17 نتَّا أَذْ يُويُورْ زَّاثسْ س أَرُّوحْ ذ جّهْذْ ن ؤُنَابِي إِلِييَا، حِيمَا أَذْ د-يَارّْ ؤُڒَاونْ ن لْوَالِيذِينْ غَارْ ثَارَّاوْثْ نْسنْ ؤُ إِنِّي وَارْ يُومِيننْ غَارْ ثُوسّْنَا ن ؤُمْسڭّذْ، حِيمَا أَذْ إِسّوْجذْ إِجّْ ن ڒْڭنْسْ إِكْمڒْ إِ سِيذِي.“ ▪
18 يَارَّا-د زَاكَارِييَّا خْ لْمَالَاكْ: ”مَامّشْ إِ غَا ڭّغْ أَذْ فهْمغْ أَيَا، مِينْزِي نشّْ ذ أَوسَّارْ ؤُڒَا ذ ثَامْغَارْثْ إِنُو ثمْغَارْ أَطَّاسْ!“ ▪
19 يَارَّا-د لْمَالَاكْ، إِنَّا أَسْ: ”نشّْ ذ جِيبْرِيلْ ونِّي إِبدّنْ زَّاثْ إِ أَربِّي، تّْوَاسكّغْ-د حِيمَا أَذْ كِيكْ سِّيوْڒغْ، أَذْ شكْ خبَّارغْ ڒخْبَارْ-أَ وَانِيثَا أَصبْحَانْ. 20 زِي ڒخُّو أَذْ ثڭْنُوذْ ؤُ وَارْ ثْزمَّارذْ أَذْ ثسِّيوْڒذْ أَڒْ أَسّْ مِينْ ذِي إِ غَا إِمْسَارْ ؤُيَا، مِينْزِي وَارْ ثُومِينذْ شَا س وَاوَاڒنْ إِنُو إِنِّي إِ غَا إِتّْوَاكمّْڒنْ ذِي ڒْوقْثْ نْسنْ.“ 21 ثُوغَا ڒْڭنْسْ ذِي بَارَّا إِتّْرَاجَا زَاكَارِييَّا ؤُشَا إِوْذَانْ تّْبهْثنْ ؤُمِي إِعطَّاڒْ ذَاخڒْ ذِي زَّاوشْثْ ثَامقّْرَانْثْ. 22 ؤُمِي د-إِفّغْ زَاكَارِييَّا، ثُوغَا وَارْ إِزمَّارْ أَذْ كِيسنْ إِسِّيوڒْ. خنِّي فهْمنْ بلِّي إِبَانْ أَسْ-د شَا ن ثْمژْرِيوْثْ ذِي زَّاوشْثْ ثَامقّْرَانْثْ. ثُوغَا إِتّْشيَّارْ أَسنْ، مَاشَا إِقِّيمْ إِڭْنُو. 23 ؤُمِي كمّْڒنْ وُوسَّانْ ن ڒْخذْمثْ ن ثُوكهَّانْثْ نّسْ، إِعْقبْ-د غَارْ ثَادَّارْثْ نّسْ.
24 أَوَارْنِي ؤُسَّانْ نِّي ثكْسِي ثَامْغَارْثْ نّسْ إِلِيصَابِيثْ س دّيْسثْ. ثفَّارْ إِخفْ نّسْ خمْسَا ن إِيُورنْ ؤُشَا ثبْذَا ثقَّارْ: 25 ”أَمُّو إِ زَّايِي إِڭَّا سِيذِي ذڭْ وُوسَّانْ نِّي ؤُمِي غَارِي د-إِخْزَارْ، حِيمَا أَذْ خَافِي إِكّسْ أَسحْقَارْ ن إِوْذَانْ.“ ▪
أَضْهَارْ ن لْمَالَاكْ إِ مَارْيَامْ
26 ذڭْ ؤُيُورْ وِيسّْ ستَّا إِسّكّْ-د أَربِّي لْمَالَاكْ جِيبْرِيلْ غَارْ إِشْثْ ن ثنْذِينْثْ ذِي لْجَالِيلْ، قَّارنْ أَسْ نَّاصِيرَا، 27 غَارْ إِشْثْ ن ثعْزَارشْثْ ذ ثَانخْضَابْثْ غَارْ ورْيَازْ زِي ثَادَّارْثْ ن ؤُجدْجِيذْ ذَاوُوذْ، قَّارنْ أَسْ يُوسُوفْ. ثُوغَا إِسمْ ن ثعْزَارشْثْ نِّي مَارْيَامْ. ▪ 28 يُوذفْ-د غَارسْ لْمَالَاكْ، إِنَّا أَسْ: ”سْڒَامْ خَامْ، أَ ثَامِيمُونْثْ! سِيذِيثْنغْ أَكِيذمْ! شمْ أَقَا ثتّْوَابَارْكذْ جَارْ ثمْغَارِينْ!“ 29 ؤُمِي ث ثژْرَا، ثنّخْڒعْ زڭْ وَاوَاڒْ نّسْ ؤُشَا ثْخَارّصْ مِينْ إِخْسْ أَذْ يِينِي سْڒَامْ-أَ. 30 إِنَّا أَسْ لْمَالَاكْ: ”وَارْ تّڭّْوذْ شَا، أَ مَارْيَامْ، مِينْزِي ثُوفِيذْ أَرْضَا غَارْ أَربِّي. 31 أَذْ ثكْسِيذْ دّيْسثْ ؤُشَا أَذْ ثَارْوذْ أَحنْجِيرْ، أَذْ ث ثْسمِّيذْ ’يشُّو‘. ▪ 32 وَانِيثَا أَذْ يِيڒِي ذ أَمقّْرَانْ، أَذْ خَاسْ تّْڒَاغَانْ مِّيسْ ن ؤُمْعُودْجِي خْ كُوڒْشِي، ؤُ أَذْ أَسْ إِوْشْ سِيذِي أَربِّي ڒْعَارْشْ ن جذِّيسْ ذَاوُوذْ. ▪ 33 نتَّا أَذْ إِحْكمْ خْ ثَادَّارْثْ ن يَاعْقُوبْ إِ ڒبْذَا، وَارْ إِتِّيڒِي ؤُنڭَّارْ إِ ثْڭلْذِيثْ نّسْ.“ ▪ 34 ثنَّا مَارْيَامْ إِ لْمَالَاكْ: ”مَامّشْ إِ غَا يِيڒِي ؤُيَا أَمْ وَارْ مْڒِيشغْ شَا أَكْ-ذ ورْيَازْ؟“ 35 يَارَّا-د لْمَالَاكْ، إِنَّا أَسْ: ”أَرُّوحْ إِقدّْسنْ أَذْ أَمْ إِڒحّفْ ؤُشَا جّهْذْ ن ؤُمْعُودْجِي خْ كُوڒْشِي أَذْ خَامْ يَارْسَا. س ؤُينِّي أَذْ يِيڒِي ونِّي إِ د غَا إِخڒْقنْ زَّايمْ ذ أَمْقدَّاسْ ؤُ أَذْ ث سمَّانْ مِّيسْ ن أَربِّي. 36 خْزَارْ، إِلِيصَابِيثْ، ڒَادْجْ نّمْ، نتَّاثْ عَاوذْ أَقَا-ت س دّيْسثْ ذِي ثوْسَارْ نّسْ. أَقَا ذ أَيُورْ ن ستَّا إِ نتَّاثْ ؤُمِي قَّارنْ ’وَارْ د-ثتِّيرُووْ!‘ 37 مِينْزِي وَارْ ذِينْ مِينْ يوْعَارنْ إِ أَربِّي.“ ▪ 38 ثنَّا مَارْيَامْ: ”خْزَارْ، نشّْ ذ ثَايَّا ن سِيذِي، أَذْ أَيِي إِمْسَارْ عْلَاحْسَابْ أَوَاڒْ نّكْ.“ خَاسْ ؤُشَا يُويُورْ خَاسْ لْمَالَاكْ.
مَارْيَامْ ثْرُوحْ أَذْ ثَارْزفْ إِلِيصَابِيثْ
39 ذڭْ وُوسَّانْ نِّي ثكَّارْ مَارْيَامْ، ثْرُوحْ ذغْيَا غَارْ إِذُورَارْ، غَارْ إِشْثْ ن ثنْذِينْثْ ن يَاهُوذِييَّا. 40 ثُوذفْ غَارْ ثَادَّارْثْ ن زَاكَارِييَّا، ثْسدْجمْ خْ إِلِيصَابِيثْ. 41 ؤُمِي ثسْڒَا إِلِيصَابِيثْ إِ سْڒَامْ ن مَارْيَامْ، إِمْسَارْ أَقَا إِنْهزّْ ؤُسيْمِي ذڭْ ؤُعذِّيسْ نّسْ. ؤُشَا ثذْوڒْ إِلِيصَابِيثْ ثشُّورْ س أَرُّوحْ إِقدّْسنْ، 42 ثسْغُويّْ س جّهْذْ، ثنَّا إِ مَارْيَامْ: ”شمْ أَقَا ثتّْوَابَارْكذْ جَارْ ثمْغَارِينْ، ثتّْوَابَاركْ ڒْغِيدْجثْ ن ؤُعذِّيسْ نّمْ! 43 زِي مَانِيسْ غَارِي أَيَا، حِيمَا أَذْ غَارِي د-ثَاسْ يمَّاسْ ن سِيذِي إِنُو؟ 44 ڒَامِي د-ثِيوضْ ثْمِيجَّا ن سْڒَامْ نّمْ غَارْ ؤُمزُّوغْ إِنُو، إِنْهزّْ ؤُسيْمِي ذڭْ ؤُعذِّيسْ إِنُو س ڒفْرَاحثْ. 45 سّعْذْ ن ثنِّي يُومْننْ أَقَا أَذْ إِتّْوَاكمّڒْ مِينْ ذ أَسْ إِتّْوَانَّا زِي سِيذِي.“ ▪
إِزْڒِي ن مَارْيَامْ إِ ؤُسمْغَارْ ن أَربِّي
46 ثنَّا مَارْيَامْ:
”ڒعْمَارْ إِنُو إِسّمْغَارَا ذِي سِيذِي،
47 إِفَارْحْ بُوحْبڒْ إِنُو س أَربِّي، ڒْعُونْصَارْ إِنُو ن ثُوذَارْثْ،
48 س مِينْزِي إِخْزَارْ غَارْ ؤُمدُّورْ أَوَاضعْ ن ثَايَّا نّسْ.
خْزَارْ، زِي ڒخُّو مَارَّا أَرَّاونْ أَذْ أَيِي سمَّانْ ’ذ ثَامِيمُونْثْ!‘
49 مِينْزِي ونِّي غَارْ إِدْجْ ثِيزمَّارْ إِڭَّا ذَايِي ثِيمسْڒَايِينْ مْغَارنْثْ،
أَقَا إِسمْ نّسْ إِقدّسْ.
50 أَرّحْمثْ نّسْ خْ ثَارْوَا ذ جِّيڒَاثْ،
خْ ينِّي ث إِتّْوقَّارنْ. ▪
51 س ؤُغِيڒْ نّسْ أَقَا يِيوِي-د ڒغْڒبْ.
إِفَارْثكْ إِنِّي إِعفَّارنْ ذڭْ إِخَارِّيصنْ ن وُوڒَاونْ نْسنْ. ▪
52 إِنِّي غَارْ ثدْجْ صُّولْطَا إِغْضڒْ إِ-ثنْ زِي ڒكْرَاسِي نْسنْ،
إِمْوَاضْعنْ إِسّْڭعّذْ إِ-ثنْ. ▪
53 إِسّْجِيونْ س ڒْخَارْ إِنِّي إِدْجُوژنْ،
إِسْقَاذْ أَيْثْبَابْ ن وَاڭْڒَا س إِفَاسّنْ خْوَانْ. ▪
54 أَمْسخَّارْ نّسْ إِسْرَائِيل، إِعَاونْ إِ-ث،
أَقَا إِعْقڒْ خْ أَرّحْمثْ نّسْ، ▪
55 أَمْ مَامّشْ إِسِّيوڒْ أَكْ-ذ ڒجْذُوذْ نّغْ،
أَكْ-ذ إِبْرَاهِيمْ ذ زَّارِيعثْ نّسْ،
إِ ڒبْذَا.“ ▪
56 ثكَّا مَارْيَامْ عْڒَاحَاڒْ ثْڒَاثَا ن إِيُورنْ غَارْ إِلِيصَابِيثْ، خنِّي ثعْقبْ غَارْ ثَادَّارْثْ نّسْ.
أَخْڒَاقْ ن يُوحَانَّا أَمْسغْضَاصْ
57 ڒَامِي د-ثِيوضْ ڒْوقْثْ ن إِلِيصَابِيثْ حِيمَا أَذْ د-ثَارُووْ، ثجّْ-د أَحنْجِيرْ. 58 سْڒِينْ جِّيرَانْ ذ ڒَادْجْ نّسْ بلِّي أَربِّي إِسّْشنْ أَسْ أَرّحْمثْ نّسْ أَطَّاسْ، فَارْحنْ نِيثْنِي أَكِيذسْ. ▪
59 ذڭْ وَاسّْ وِيسّْ ثْمنْيَا ؤُسِينْ-د حِيمَا أَذْ خثْننْ إِ ؤُسيْمِي ؤُشَا سمَّانْ ث س يِيسمْ ن بَابَاسْ زَاكَارِييَّا، ▪ 60 مَاشَا ثَارَّا-د يمَّاسْ، ثنَّا: ”لَّ، أَذْ إِتّْوَاسمَّا يُوحَانَّا.“ ▪ 61 نَّانْ أَسْ: ”وَارْ إِدْجِي حذْ زِي ڒَادْجْ نّمْ، تّْڒَاغَانْ أَسْ-د س يِيسمْ-أَ.“ 62 خنِّي شِييَّارنْ غَارْ بَابَاسْ مَامّشْ إِخْسْ أَذْ ث إِسمَّا. 63 إِتَّارْ ثَاڒْوِيحْثْ ؤُشَا يُورَا خَاسْ، إِنَّا: ”إِسمْ نّسْ يُوحَانَّا.“ ؤُشَا ثْبهْثنْ إِوْذَانْ مَارَّا. 64 ڒخْذنِّي يَارْزمْ أَقمُّومْ نّسْ ذ يِيڒسْ نّسْ ؤُشَا إِسِّيوڒْ عَاوذْ، إِبَاركْ أَربِّي.
65 ثهْوَا-د ثِيڭّْوُوذِي خْ مَارَّا جِّيرَانْ نْسنْ، سِّيوْڒنْ أَطَّاسْ خْ مَارَّا مَانْ أَيَا ذِي كُوڒْ إِذُورَارْ ن يَاهُوذِييَّا. 66 مَارَّا إِنِّي إِسْڒِينْ إِ مَانْ أَيَا، خمّْڒنْ ث ذڭْ وُوڒَاونْ نْسنْ، نَّانْ: ”أَقَا مِينْ غَا يِيڒِي ؤُحنْجِيرْ-أَ؟“ ثُوغَا أَفُوسْ ن سِيذِي أَكِيذسْ.
إِزْڒِي ن زَاكَارِييَا إِ ؤُسمْغَارْ ن أَربِّي
67 إِتّْوَاشُّورْ بَابَاسْ زَاكَارِييَّا س أَرُّوحْ إِقدّْسنْ، إِنبَّا، إِنَّا:
68 ”أَذْ إِتّْوَابَاركْ سِيذِي، أَربِّي ن إِسْرَائِيل،
مِينْزِي إِفكَّارْ ذِي ڒْڭنْسْ نّسْ
ؤُشَا يِيوِي أَسنْ-د أَصْڒَاحْ.
69 إِسّْبدّْ أَنغْ-د إِجّْ ن يِيشّْ ن وصْڒَاحْ،
ذِي ثَادَّارْثْ ن ذَاوُوذْ، أَمْسخَّارْ نّسْ، ▪
70 أَمْ مَامّشْ ثُوغَا ذ أَنغْ إِنَّا
س ؤُقمُّومْ ن إِنَابِييّنْ إِقدّْسنْ نّسْ،
إِنِّي ذِينْ ثُوغَا زڭْ وشْحَاڒْ ؤُيَا، ▪
71 مَاحنْذْ أَذْ أَنغْ إِفكّْ زِي ڒْعذْيَانْ نّغْ،
ؤُ زڭْ إِفَاسّنْ ن يِينِّي إِ ذ أَنغْ إِشَارّْهنْ،
72 مَاحنْذْ أَذْ إِڭّْ أَرّحْمثْ نّسْ إِ ڒجْذُوذْ نّغْ
ؤُ أَذْ إِعْقڒْ خْ ڒْعُوهُوذْ نّسْ إِقدّْسنْ،
73 خْ ثَاجَادْجِيثْ ثنِّي إِجِّيدْجْ إِ إِبْرَاهِيمْ، جذِّيثْنغْ،
حِيمَا أَذْ ذ أَنغْ إِوْشْ ▪
74 مَاحنْذْ أَذْ نْفكّْ زڭْ إِفَاسّنْ ن ڒْعذْيَانْ نّغْ،
ؤُ أَذْ أَسْ نْسخَّارْ بْڒَا ثِيڭّْوُوذِي، ▪
75 س ثْقدَّاسْثْ ذ ثْسڭْذَا،
مَارَّا ؤُسَّانْ ن ثُوذَارْثْ نّغْ. ▪
76 إِ شكْ، أَ أَحنْجِيرْ، أَذْ أَشْ تّْڒَاغَانْ أَنَابِي ن ؤُمْعُودْجِي خْ كُوڒْشِي،
مِينْزِي أَذْ ثْرَاحذْ زَّاثْ إِ ؤُغمْپُوبْ ن سِيذِي،
حِيمَا أَذْ ثسّوْجْذذْ إِبْرِيذنْ نّسْ، ▪
77 حِيمَا أَذْ إِوْشْ إِ ڒْڭنْسْ نّسْ ثُوسّْنَا ن ثُوذَارْثْ،
إِ إِدْجَانْ س وغْفَارْ ن دّْنُوبْ نْسنْ، ▪
78 س ڒَادْجَاغْ ن أَرّحْمثْ ن أَربِّي نّغْ،
إِ زِي خَانغْ إِ غَا إِحِينّْ ڒفْجَارْ زِي ڒُوعْڒَا،
79 حِيمَا أَذْ إِسِّيرْغْ ثْفَاوْثْ إِ ينِّي إِقِّيمنْ
ذِي ثَادْجسْثْ ذ ثِيڒِي ن ڒْموْثْ،
حِيمَا أَذْ إِڭوّذْ إِضَارنْ نّغْ ذڭْ وبْرِيذْ ن ڒهْنَا.“ ▪
80 أَمْ إِڭَّامْ ؤُحنْجِيرْ، يَارنِّي ذَايسْ أَرُّوحْ ؤُ ثُوغَا-ث ذِي ڒخْڒَا أَڒْ أَسّْ إِ ذِي د-إِضْهَارْ إِ إِسْرَائِيل. ▪