إِزهِّيذنْ 142

‏1 أَخمِّي ن ذَاوُوذْ.

ثَاژَادْجِيثْ ؤُمِي ث ثُوغَا ذڭْ يفْرِي.

‏2 س ثْمِيجَّا إِنُو سْغُويّغْ غَارْ سِيذِي،

س ثْمِيجَّا إِنُو حشّْمغْ سِيذِي.

‏3 نشّْ تّْزدْجَاعغْ إِفقُّوصنْ إِنُو زَّاثْ إِ وُوذمْ نّسْ،

سَّارْڭْبغْ أَسْ ڒحْصَارثْ إِنُو زَّاثْ إِ وُوذمْ نّسْ.

‏4 مَاڒَا بُوحْبڒْ إِنُو إِذْقڒْ خَافِي أَطَّاسْ، شكْ ثسّْنذْ أَمسْرُوقْ إِنُو.

نِيثْنِي سّْنُوفَّارنْ أَيِي إِجّْ ن ڒْفخْ ذڭْ وبْرِيذْ نِّي ذِي ڭُّورْ أَذْ ؤُيُورغْ.   

‏5 سْوضْ غَارْ ؤُفُوسِي، ؤُ خْزَارْ، وَارْ ذِينْ ثُوغِي حذْ إِ ذ أَيِي غَا إِوْشنْ ثَايْنِيثْ،

إِتّْوَاكّسْ أَيِي قَاعْ مَانِي إِ غَا أَروْڒغْ،

وَارْ ذِينْ ثُوغِي ؤُڒَا ذ إِجّْ إِ غَا إِسّقْسَانْ خْ ڒعْمَارْ إِنُو.

‏6 نشّْ سْغُويُّوغْ-د غَاركْ، أَ سِيذِي. قَّارغْ:

”شكْ ذ أَمْشَانْ إِنُو ن ثَاروْڒَا،

ثَاسْغَارْثْ إِنُو ذِي ثمُّورْثْ ن يِينِّي إِدَّارنْ.  

‏7 حْضَا خْ ؤُغُويِّي إِنُو، مَاغَارْ فْنِيغْ قَاعْ.

فكّْ أَيِي زڭْ إِنِّي ذ أَيِي إِضفَّارنْ،

مَاغَارْ نِيثْنِي جهْذنْ خَافِي.   

‏8 سُوفّغْ ڒعْمَارْ إِنُو زِي ڒحْبسْ مَاحنْذْ أَذْ قَاذِيغْ إِسمْ نّكْ.

إِمْسڭَّاذنْ أَذْ أَيِي د-نّْضنْ،

مَاغَارْ شكْ ثتّڭّذْ ذَايِي س ثْشُونِي.“