إِزهِّيذنْ 141

‏1 أَزهّذْ ن ذَاوُوذْ.

أَ سِيذِي، نشّْ تّْڒَاغِيغْ غَاركْ، ذغْيَاثْ غَارِي،

سڒْ غَارْ ثْمِيجَّا إِنُو خْمِي د خَاكْ إِ غَا تّْڒَاغِيغْ.

‏2 إِڒِي أَذْ ثْبدّْ ثْژَادْجِيثْ إِنُو أَمْ ڒبْخُورْ إِتّْفُوحنْ زَّاثْ إِ وُوذمْ نّكْ،

ؤُڒَا ذ أَسْڭعّذْ ن إِفَاسّنْ إِنُو أَمْ ثوْهِيبْثْ ن ثْمذِّيثْ.   

‏3 أَ سِيذِي، أڭّْ إِجّْ ن ؤُعسَّاسْ غَارْ ؤُقمُّومْ إِنُو،

حْضَا ثَاوَّارْثْ ن إِينْشِيشنْ إِنُو.

‏4 أڭّْ أَقَا ؤُڒْ إِنُو وَارْ إِتّْنجْبِيذْ غَارْ إِشْثْ ن ثْمسْڒَاشْثْ ذ ثَاعفَّانْثْ،

مَاحنْذْ أَذْ ڭّغْ ثِيمڭَّا س ڒْغشّْ أَكْ-ذ إِرْيَازنْ نِّي إِتّڭّنْ ڒْمُوعْصِييّثْ،

أڭّْ أَقَا نشّْ وَارْ تّتّغْ زِي ثَازْيُوضِي نْسنْ.

‏5 أجّْ أَمْسڭّذْ أَذْ أَيِي إِوّثْ، مَاغَارْ أَيَا ذ ثَامخْسِيوْثْ إِشوَّارنْ،

مَاڒَا نتَّا إِتّْسڭّذْ أَيِي، أَيَا ذ زّشْثْ خْ ؤُزدْجِيفْ إِنُو،

أَذْ ت إِقْبڒْ ؤُزدْجِيفْ إِنُو،

مَاغَارْ أَمُّو ثَاژَادْجِيثْ إِنُو عَاذْ ضِيدّْ إِ ثْمڭَّا نْسنْ إِعفّْننْ.   

‏6 ڒْقُوضَاثْ نْسنْ مّنْضَارنْ سْوَادَّايْ خْ ؤُغزْذِيسْ ن جَّارْفْ،

أَقَا سْڒِينْ بلِّي أَوَاڒنْ إِنُو إِضَارْفنْ.

‏7 أَخْمِي ثتّْوَاشَارّزْ ؤُ ثنُّورْزمْ ثمُّورْثْ،

أَمُّو إِ تّْوَازدْجْعنْ إِخْسَانْ نّغْ غَارْ ؤُقمُّومْ ن ڒَاخَارْثْ.   

‏8 مَاشَا ثِيطَّاوِينْ إِنُو خزَّارنْثْ-إِ-د غَاركْ، أَ سِيذِي، سِيذِي إِنُو،

نشّْ تّشْڒغْ خَاكْ، وَارْ تّجِّي ڒعْمَارْ إِنُو ذ أَعَارْيَانْ.

‏9 سِيڭّْوجْ أَيِي إِ ومْنَاعْ ن ڒْفخْ إِ ذ أَيِي نذْينْ،

زِي ثْخشْفِينْ ن يِينِّي إِتّڭّنْ ڒْمُوعْصِييّثْ.

‏10 إِڒِي إِعفَّاننْ أَذْ وْضَانْ مَارَّا ذِي ثْرَاشَّاوِينْ نْسنْ،

مِينْ غَا كّغْ عدُّوغْ.