ذِي ڒخْڒَا 27

يسِّيسْ ن صَالُوفْحَاذْ

‏1 خنِّي ؤُسِينْثْ-إِ-د يسِّيسْ ن صَالُوفْحَاذْ، مِّيسْ ن حَافَارْ، مِّيسْ ن جِيلْعَاذْ، مِّيسْ ن مَاكِيرْ، مِّيسْ ن مَانَاسَّا، إِنِّي ن ڒَادْجْ ن مَانَاسَّا، مِّيسْ ن يُوسُوفْ، ذ إِنَا ذ إِسْمَاونْ ن يسِّيسْ: مَاحْلَا، نُوعَا، حُوجْلَا، مِيلْكَا ذ ثِيرْصَا.   ‏2 ثُوغَا بدّنْثْ زَّاثْ إِ وُوذمْ ن مُوسَا ؤُ زَّاثْ إِ وُوذمْ ن أَلِيعَازَارْ، أَكهَّانْ، ؤُ زَّاثْ إِ وُوذمْ ن إِمْغَارنْ ؤُ زَّاثْ إِ وُوذمْ ن مَارَّا ثَامسْمُونْثْ غَارْ وَاذَافْ ن ؤُقِيضُونْ ن ؤُمْسَاڭَارْ، نَّانْثْ: ‏3 ”بَابَاثْنغْ إِمُّوثْ ذِي ڒخْڒَا ؤُ وَارْ ث ثُوغِي جَارْ ؤُبَارُّو ن يِينِّي إِمُوننْ ضِيدّْ إِ سِيذِي، ذڭْ ؤُبَارُّو ن قُورَاحْ وَارْ ذِينْ ث ثُوغِي نتَّا، مِينْزِي إِمُّوثْ ذِي دّْنُوبْ نّسْ ؤُ ثُوغَا وَارْ غَارسْ شَا إِحنْجِيرنْ.      ‏4 مَايمِّي إِ غَا إِكّسْ إِسمْ ن بَابَاثْنغْ زِي جَارْ ڒَادْجْ نّسْ، مَا مِينْزِي وَارْ غَارسْ ثُوغِي شَا إِحنْجِيرنْ؟ أوْشْ أَنغْ أَڭْڒَا ذِي ڒْوسْثْ ن أَيْثْمَاسْ ن بَابَاثْنغْ.“

‏5 مُوسَا يِيوِي دّعْوَا نْسنْثْ زَّاثْ إِ وُوذمْ ن سِيذِي. ‏6 إِسِّيوڒْ سِيذِي أَكْ-ذ مُوسَا، إِنَّا:

‏7 ”أَقَا أَيَا أَمْ مَامّشْ ث نَّانْثْ يسِّيسْ ن صَالُوفْحَاذْ. إِتّْخصَّا أَذْ أَسنْثْ ثوْشذْ ثَاسْغَارْثْ ن ڒْوَارْثْ ذِي  ڒْوسْثْ ن أَيْثْمَاسْ ن بَابَاثْسنْ ؤُشَا أَذْ خَاسنْثْ ثسّعْذُوذْ ڒْوَارْثْ ن بَابَاثْسنْثْ.    ‏8 ؤُشَا أَذْ ثسِّيوْڒذْ أَكْ-ذ أَيْثْ ن إِسْرَائِيل، أَذْ ثِينِيذْ ’مَاڒَا شَا ن يِيجّنْ إِمُّوثْ بْڒَا مِّيسْ، خنِّي أَذْ ثسّعْذُومْ ڒْوَارْثْ نّسْ غَارْ يدْجِيسْ، ‏9 ؤُ مَاڒَا وَارْ غَارسْ يدْجِيسْ، أَذْ ثوْشمْ ڒْوَارْثْ نّسْ إِ يَايْثْمَاسْ.

‏10 مَاڒَا وَارْ غَارسْ أَيْثْمَاسْ عَاوذْ، أَذْ ثوْشمْ ڒْوَارْثْ نّسْ إِ يَايْثْمَاسْ ن بَابَاسْ.

‏11 مَاڒَا بَابَاسْ وَارْ غَارسْ أَيْثْمَاسْ عَاوذْ، أَذْ ثوْشمْ ڒْوَارْثْ نّسْ إِ رَادْجْ نّسْ، إِ ونِّي إِ ذ أَسْ د-يُوذْسنْ زِي ڒَادْجْ نّسْ، حِيمَا أَذْ ت إِوَارْثْ نتَّا.‘ مَانْ أَيَا أَذْ ثِيڒِي ذ إِشْثْ ن ثوْصيّثْ ن ڒْحقّْ إِ ڒبْذَا إِ أَيْثْ ن إِسْرَائِيل، أَمْ مَامّشْ ث يُومُورْ سِيذِي إِ مُوسَا.“

أَڒقّمْ ن يَاشُووَا

‏12 خنِّي إِنَّا سِيذِي إِ مُوسَا: ”ڭَاعّذْ-د أَذْرَارْ-أَ أَبَارِيمْ ؤُشَا خْزَارْ ثَامُّورْثْ نِّي وْشِيغْ إِ أَيْثْ ن إِسْرَائِيل.   

‏13 خْمِي ت إِ غَا ثْژَارذْ، خنِّي أَذْ ثتّْوَاسَّارْسذْ ذڭْ ونْضڒْ أَكْ-ذ ڒجْذُوذْ نّكْ، شكْ عَاوذْ أَمشْنَاوْ مَامّشْ كِيذْسنْ إِتّْوَاسَّارْسْ ؤُمَاشْ هَارُونْ،   

‏14 مِينْزِي كنِّيوْ ثْغوّْغمْ زَّاثْ إِ ثِيطَّاوِينْ نْسنْ ضِيدّْ إِ ڒُومُورْ إِنُو مَاحنْذْ أَذْ أَيِي ثسّْقدّْسمْ ذِي ڒخْڒَا ن صِينْ، ڒَامِي ذِينْ ثُوغَا أَمْشُوبّشْ ذِي ثْمسْمُونْثْ. أَقَا ذ إِنَا ذ أَمَانْ ن مَارِيبَا، غَارْ قَاذَاشْ ذِي ڒخْڒَا ن صِينْ.“   

‏15 إِسِّيوڒْ مُوسَا أَكْ-ذ سِيذِي، إِنَّا:

‏16 ”أَذْ إِڭّْ سِيذِي، أَربِّي ن بُوحْبڒَاثْ ن مَارَّا دَّاثْ، أَحطُّو خْ ثْمسْمُونْثْ-أَ ذڭْ ؤُفُوسْ ن إِجّْ ن ورْيَازْ،   

‏17 حِيمَا نتَّا أَذْ يُويُورْ زَّاثْ إِ وُوذمْ نْسنْ ؤُشَا أَذْ يَاذفْ زَّاثْ إِ وُوذمْ نْسنْ ؤُشَا أَذْ ثنْ إِنْذهْ غَارْ بَارَّا، أَذْ ثنْ إِسِّيذفْ غَارْ ذَاخڒْ مَاحنْذْ ثَامسْمُونْثْ ن سِيذِي وَارْ ثتِّيڒِي أَمْ وُودْجِي بْڒَا أَمكْسَاوْ.“     

‏18 خنِّي إِنَّا سِيذِي إِ مُوسَا: ”كْسِي يَاشُووَا، مِّيسْ ن نُونْ، إِجّْ ن ورْيَازْ إِ ذِي إِدْجْ أَرُّوحْ ؤُشَا سَارْسْ خَاسْ أَفُوسْ نّكْ   

‏19 ؤُشَا أَذْ ث ثڭّذْ زَّاثْ إِ وُوذمْ ن ؤُكهَّانْ أَلِيعَازَارْ ؤُ زَّاثْ إِ مَارَّا ثَامسْمُونْثْ، أَذْ أَسْ ثوْشذْ ڒُومُورْ زَّاثْ إِ ثِيطَّاوِينْ نْسنْ ‏20 ؤُشَا أوْشْ أَسْ شَا زڭْ ؤُوقَّارْ نّكْ حِيمَا أَذْ أَسْ ثْسڒْ ثَامسْمُونْثْ مَارَّا ن أَيْثْ ن إِسْرَائِيل. ‏21 نتَّا أَذْ إِبدّْ زَّاثْ إِ ؤُكهَّانْ أَلِيعَازَارْ، ونِّي إِ غَا إِشَاوَارْ زَّاثْ إِ وُوذمْ ن سِيذِي عْلَاحْسَابْ ڒحْكَامْ ن ؤُرِيمْ. خْ ڒُومُورْ نّسْ أَذْ د-فّْغنْ غَارْ بَارَّا ؤُ خْ ڒُومُورْ نّسْ أَذْ أَذْفنْ غَارْ ذَاخڒْ، نتَّا ذ مَارَّا أَيْثْ ن إِسْرَائِيل ؤُڒَا ذ مَارَّا ثَامسْمُونْثْ.“   

‏22 ؤُشَا مُوسَا إِڭَّا أَمْ مَامّشْ إِ ذ أَسْ يُومُورْ سِيذِي. يِيوِي يَاشُووَا ؤُشَا إِسّْبدّْ إِ-ث زَّاثْ إِ ؤُكهَّانْ أَلِيعَازَارْ ؤُ زَّاثْ إِ وُوذمْ ن مَارَّا ثَامسْمُونْثْ. ‏23 إِسَّارْسْ خَاسْ إِفَاسّنْ نّسْ ؤُشَا إِسّعْذُو أَسْ ڒُومُورْ أَمْ مَامّشْ ذ أَسْ إِنَّا سِيذِي س ؤُفُوسْ ن مُوسَا.