ذِي ڒخْڒَا 25

إِسْرَائِيل ذ لَاصْنَامْ ن يسِّيسْ ن مُوآبَ

‏1 إِزْذغْ إِسْرَائِيل ذِي شِيطِّيمْ ؤُشَا إِبْذَا ڒْڭنْسْ أَذْ إِسّفْسذْ إِخفْ نّسْ أَكْ-ذ يسِّيسْ ن مُوآبَ.    ‏2 عَارْضنْ-د ڒْڭنْسْ غَارْ ثْغَارْصِي ن إِربِّيثنْ نْسنْثْ ؤُشَا ڒْڭنْسْ إِشَّا زَّايْسنْثْ ؤُشَا يُوضَارْ إِ إِربِّيثنْ نْسنْثْ.   ‏3 أَمُّو إِمُونْ ڒْڭنْسْ أَكْ-ذ بَاعْلْ-فَاغُورْ ؤُشَا يَارْغَا وغْضَابْ ن سِيذِي خْ إِسْرَائِيل.   

‏4 إِنَّا سِيذِي إِ مُوسَا: ”كْسِي مَارَّا إِرْيَازنْ نِّي ذ إِزدْجِيفنْ نْ ڒْڭنْسْ ؤُشَا أَيڒْ إِ-ثنْ زَّاثْ إِ سِيذِي ذِي ثْفُوشْثْ إِحَارّنْ، أَڒْ د غَا إِتّْوَاذْوڒْ ڒْحَاذُوقْ ن وغْضَابْ ن سِيذِي ن إِسْرَائِيل.“    ‏5 خنِّي إِنَّا مُوسَا إِ ڒْقُوضَاثْ ن إِسْرَائِيل: ”أجّْ كُوڒْ إِجّْ أَذْ إِنغْ إِنِّي زِي جَارْ يرْيَازنْ نّسْ إِمُوننْ أَكْ-ذ بَاعْلْ-فَاغُورْ!“

‏6 ؤُشَا خْزَارْ، إِجّْ ن ورْيَازْ زڭْ أَيْثْ ن إِسْرَائِيل يُوسَا-د ؤُشَا يِيوِي-د إِشْثْ ن ثمْغَارْثْ ثْمِيذِييَانشْثْ غَارْ أَيْثْمَاسْ زَّاثْ إِ ثِيطَّاوِينْ ن مُوسَا ؤُشَا زَّاثْ إِ ثِيطَّاوِينْ ن مَارَّا ثَامسْمُونْثْ ن أَيْثْ ن إِسْرَائِيل، أَمْ ثْرُونْ نِيثْنِي غَارْ وَاذَافْ ن ؤُقِيضُونْ ن ؤُمْسَاڭَارْ. ‏7 إِژْرَا إِ-ث فِينَاحَاسْ، مِّيسْ ن أَلِيعَازَارْ، مِّيسْ ن هَارُونْ، ؤُشَا نتَّا إِكَّارْ زِي ڒْوسْثْ ن ثْمسْمُونْثْ. نتَّا إِكْسِي إِجّْ ن ؤُحْرِيشْ ذڭْ ؤُفُوسْ نّسْ    ‏8 ؤُشَا إِرُوحْ أَوَارْنِي إِ ورْيَازْ أَيِيسْرَا إِلِي غَارْ ؤُقِيضُونْ س ڒْقُوبّثْ ؤُشَا إِسّْنُوقّبْ إِ-ثنْ س ثْنَاينْ، أَمُّو أَرْيَازْ زِي إِسْرَائِيل ؤُڒَا ذ ثَامْغَارْثْ س ؤُعذِّيسْ نّسْ. خنِّي ثْبدّْ جّْرِيحشْثْ خْ أَيْثْ ن إِسْرَائِيل. ‏9 ؤُشَا مُّوثنْ ذِي جّْرِيحشْثْ أَربْعَا ؤُ-عِيشْرِينْ-أَڒفْ ن إِوْذَانْ.   

‏10 إِسِّيوڒْ سِيذِي أَكْ-ذ مُوسَا، إِنَّا:

‏11 ”فِينحَاسْ، مِّيسْ ن أَلِيعَازَارْ، مِّيسْ ن هَارُونْ، أَكهَّانْ، إِسّذْوڒْ-د أَسْعَارْ إِنُو خْ أَيْثْ ن إِسْرَائِيل، مِينْزِي نتَّا ثُوغَا إِمْحضْ أَطَّاسْ ذِي ڒْوسْثْ نْسنْ ذِي طّْوعْ ن ثُوسْمِي إِنُو، أَڒَامِي نشّْ وَارْ هْذِيجغْ عَاذْ أَذْ ثحِّيغْ أَيْثْ ن إِسْرَائِيل ذِي ڒْوقْثْ ن ثُوسْمِي إِنُو.   

‏12 س ؤُيَا إِنِي: ’خْژَارْ، أَذْ أَسْ وْشغْ ڒْعَاهْذْ إِنُو ن ڒهْنَا.   

‏13 نتَّا ذ زَّارِيعثْ نّسْ أَوَارْنِي أَسْ أَذْ غَارْسنْ يِيڒِي ڒْعَاهْذْ ن ثُوكهَّانْثْ إِ ڒبْذَا، مِينْزِي نتَّا ثُوغَا إِمْحضْ ذِي طّْوعْ ن أَربِّي نّسْ ؤُشَا إِفْذَا خْ أَيْثْ ن إِسْرَائِيل.‘ “

‏14 إِسمْ ن ورْيَازْ أَيِيسْرَا إِلِي نِّي إِتّْوَانْغنْ، ونِّي ثُوغَا إِتّْوَانْغنْ جْمِيعْ أَكْ-ذ ثمْغَارْثْ ثَامِيذْيَانشْثْ، ثُوغَا-ث ذ زِيمْرِي، مِّيسْ ن سَالُو، أَمقّْرَانْ خْ ثَادَّارْثْ ن بَابَاثْسنْ ن إِشِيمْعُونِييّنْ.

‏15 إِسمْ ن ثمْغَارْثْ ثَامِيذْيَانِيشْثْ إِ ثُوغَا إِتّْوَانْغنْ ثُوغَا-ت كُوزْبِي، يدْجِيسْ ن صُورْ، ونِّي ذ إِجّْ ن ؤُزدْجِيفْ خْ ثقْبِيتْشْ ن إِشْثْ ن ڒَادْجْ ن إِمِيذْيَانِييّنْ.

‏16 إِسِّيوڒْ سِيذِي أَكْ-ذ مُوسَا، إِنَّا:

‏17 ”حْصَارمْ خْ إِمِيذْيَانِييّنْ ؤُشَا غلّْبمْ خَاسنْ،  

‏18 مِينْزِي نِيثْنِي حْصَارنْ كنِّيوْ س ثحْرَايْمشْثْ نْسنْ س مِينْزِي كنِّيوْ زڒْغنْ زِي جِّيهثْ ن فَاغُورْ ذ كُوزْبِي، يدْجِيسْ ن ؤُمْغَارْ ن مِيذْيَانْ، ؤُتْشْمَاثْسنْ، ثنِّي إِتّْوَانْغنْ ذڭْ وَاسّْ ن جّْرِيحشْثْ ذِي سِّيبّثْ ن فَاغُورْ.“   

‏19 ؤُشَا أَوَارْنِي إِ جّْرِيحشْثْ إِمْسَارْ مِينْ د-إِڭُّورنْ.