3
1 Amma ṯimesȓayin nneɣni ay ayṯma, ttareṯ xaneɣ i Arebbi bac awaȓ n Siḏiṯneɣ aḏ itentacar aḏ itwasemɣar mammec iy iweqƹen jarawem.
2 Ttareṯ ƹaweḏ a nefȓeṯ zeg yiwḏan war iḥȓin ḏ iƹeffanen minzi lʼiman war iǧi ca ḏi marra iwḏan.
3 Walakin Siḏiṯneɣ ḏayes ttiqeṯ, akenniw isejheḏ akenniw iḥḍa zi ccerr.
4 Neccin qa metʼakkedin ḏi Siḏi Arebbi aqa minzi kenniw nweṣṣa qa teggem-ṯ, aṯ teggem ƹaḏ.
5 Aḏ isiweḍ Siḏiṯneɣ uȓawen nwem ɣar ȓemḥibbeṯ n Arebbi, ƹaweḏ ɣar ṣṣbar n Lmasiḥ.
6 Fa ay ayṯma, netweṣṣa-kenniw ƹlaḥsab isem n Siḏiṯneɣ Ƹisa Lmasiḥ aḏ tbeƹƹḏem zi mkuȓ ȓmumen itƹicen ḏ ameƹgaz, netta war iḏeffar ca ttaƹlim iy ṯqebȓem zzayneɣ.
7 Kenniw s yixef nwem ṯessnem u labud aḏ teggem abriḏ nni iy negga jarawem. Neccin war nteƹgiz ca wami tuɣaneɣ akiḏwem.
8 War necci bu uɣrum ak ḥadd baṭeȓ. Lla, nxeddem ǧiȓeṯ ḏ nhar, neccaṯ tamara nrebbeȓ bac war netbessiȓ x ḥadd zzaywem.
9 Negga manayenni maci war ɣarneɣ bu ȓḥaqq aḏaneɣ ṯƹawnem lla, nseḍhar-awem-d abriḏ iy ɣa ṯeḏfarem.
10 Waxxa wami tuɣaneɣ akiḏwem nuca-awem ȓuṣiyeṯ-a ṯanita: Wenni itagin aḏ ixḏem war itett ca.
11 Liʼanna netsȓa belli ḏinni ȓebƹaḍ zzaywem tagin aḏ xeḏmen. War xeddmen ca qaƹ, niṯni taḏfen ḏi cɣuȓaṯ n midden waha.
12 Iwḏan-a netweṣṣa-ṯen neqqar-asen aḏ xeḏmen s lmaƹqul aḏ ccen aɣrum iy iǧan nsen.
13 Amma kenniw ay ayṯma, ggeṯ ȓxir bȓa ma aḏ taḥȓem.
14 Wenni war itṭiƹin ca i wawaȓ nneɣ ḏi ṯebrat-a ggem-ṯ ḏi ȓbaȓ nwem, war kiḏes ggurem ca bac aḏ iseḏḥa.
15 Walakin war ṯ twaȓam ca am ȓaƹḏu nwem lla, nham-ṯ am yijjen zeg wuwmaṯwem.
Lxiṭam n ṯebrat-a
16 Siḏiṯneɣ n ȓehna aḏawem yuc ijjen ȓehna ḏi aya ȓweqṯ u s marra ṯimesȓayin. Aḏ yiȓi Siḏi Arebbi akiḏwem marra.
17 Sȓam-a wanita uriɣ-ṯ nec s ufus inu Bulus, ḏ ṯanita ḏ lƹalama inu iǧan ḏi marra ṯibraṯin inu. Ammu iy tariɣ nec.
18 Arḍa n Siḏiṯneɣ Ƹisa Lmasiḥ akiḏwem yiȓi marra.