Ddejjal
2
1 Amma Yawm nni xmi d ɣa imeḍhar Siḏiṯneɣ Ƹisa Lmasiḥ neccin aɣares ngaƹƹeḏ. Ay ayṯma, neqqar-awem
2 war tenxȓiƹem ca ḏeɣya ḏi ȓaƹqeȓ nwem, war txeyyaqem ca ƹlaḥsab ca n arruḥ n lwaḥi niɣ ḏ ca n wawaȓ niɣ ḏ ca n ṯebrat zzayneɣ zaƹma iqqaren qa Yawm n Siḏiṯneɣ aqa yuweḍ-d.
3 Lla, war tejjam ḥadd akenniw icmeṯ s walu. Ataf war izemmar Yawm nni aḏ d yas qbeȓ ma aḏ semḥen aṭṭas aṭṭas n yiwḏan ḏ amezwaru ḏi Arebbi aḏ d imeḍhar lmesxuṭ mmis n ȓefna.
4 Netta itƹarraḍ i Arebbi isemɣar ixef nnes x marra minxef iǧa isem n Arebbi ḏ min ƹebbḏen yiwḏan ḥetta aḏ iqqim ḏi Ṯemziḏa ṯameqqrant n Arebbi aḏ iƹeyyeḍ aḏ yini qa nec ḏ Arebbi.
5 Ma war ṯeƹqiȓem ca? Iwa wami tuɣayi akiḏwem qbeȓ qqareɣ-awem ṯimesȓayin-a.
6 Kenniw ṯessnem min ṯ iteṭṭfen ƹaḏ bac war d itmeḍhar ca aȓ d ɣa yaweḍ ȓweqt nnes nican.
7 Cuf, ijjen n jjehḏ inuffaren n ssayyiʼaṯ ixeddem ȓexxu, walakin ḏinni ijjen nneɣni ƹaḏ iteṭṭef-iṯ ḥetta wanita nneɣni aḏ itwakkes zi ȓwesṭ.
8 Ṯumma aḏ d imeḍhar lmesxuṭ, axas iṣuḍ Siḏiṯneɣ Ƹisa s uqemmum nnes aṯ ineɣ, aṯ isbeṭṭeȓ s lƹaḍama nnes iy zi d ɣa iƹqeb Ƹisa.
9 Lmesxuṭ-a wanita aḏ d imeḍhar ḏi ddunect-a ƹlaḥsab ȓexḏayem n Cciṭan s marra ṯizemmar ḏ lburhanaṯ ḏ ȓaƹjayeb isxarriqen
10 ḏ marra ibriḏen n ccerr iy zi twacemmaṯen yinni ifennan. Niṯni aḏ fnan minzi war qbiȓen ca aḏ texsen lḥaqiqa bac aṯen isenjem Arebbi.
11 X manaya aḏ issekk Arebbi aṯen istexiyyal bac aḏ amnen s uxarriq-a.
12 Ḥima aḏ twaḥasben marra yinni war yuminen ca s lḥaqiqa arḍan s ccerr.
Ȓuṣiyaṯ ṯineggura
13 Fa ay ayṯma iy xef iƹizz Siḏiṯneɣ, labud a ncekkar Arebbi xawem minzi ixḍar-ikenniw ḏ imezwura nni iƹni ḏ yinni iy twasnejmen s ȓxeḏmeṯ nni isiṣfan n Arruḥ iqeddsen ḏ yijjen ttiqeṯ nwem ḏi lḥaqiqa.
14 Aqa iȓaɣa-d xawem ƹlaḥsab i manaya s Lʼinjil iy netbeccar bac aḏ tcarcem ḏi lƹaḍama n Siḏiṯneɣ Ƹisa Lmasiḥ.
15 Iḏen ay ayṯma, beddem nican, ṭṭfem ḏi ttaƹalim nni iy kenniw nseȓmeḏ waxxa s wawaȓ nneɣ waxxa s ṯebrat nneɣ.
16-17 Siḏiṯneɣ Ƹisa s yixef nnes u ƹaweḏ Arebbi Babaṯneɣ wenni iy ḏaneɣ yucin s arḍa nnes ijjen n ucejjaƹ war ifennin ca ƹemmarṣ ḏ ijjen n lʼamal iṣbaḥ, ataf akenniw icejjeƹ s wuȓawen nwem aṯen isejheḏ ƹlaḥsab ḏi kuȓ ȓxeḏmeṯ ḏ kuȓ awaȓ aṣebḥan.