Yawm nni n Siḏiṯneɣ
5
1 Fa ay ayṯma, war nteḥḏiji ca aḏawem ntari x lʼawqat niɣ ḏ ttawarix.
2 Aqa ṯessnem mliḥ belli Yawm n Siḏiṯneɣ aḏ d yas mammec d itas ij uceffar s ǧiȓeṯ.
3 Ataf xmi ɣa yinin yiwḏan aqa ḏinni lʼaman ḏ ḍḍaman ȓexddenni axasen d ihwa ijjen n lxarab ḏeɣya amecnaw mamc d itas ȓeḥȓiq n ṯarwa i ṯemɣart itarwen. Ataf war zemmaren niṯni aḏ rewȓen.
4 Walakin kenniw ay ayṯma, war ṯeǧim ca ḏi ṯaǧest bac Yawm nni axawem d ixḍeȓ am can uceffar.
5 Lla, kenniw marra ḏ ṯarwa n ṯfawt ḏ iḥenjiren n nhar. War neǧi ca ḏ ṯarwa n ǧiȓeṯ niɣ n ṯaǧest.
6 Iḏen, war nteṭṭeṣ ca am yiwḏan nneɣni, itxeṣṣa a niȓi nfaq aɣarneɣ yiȓi ȓaƹqeȓ.
7 Cuf, yinni iteṭṭṣen, teṭṭṣen s ǧiȓeṯ. Yinni itɣellan s ccreb, tɣellan s ǧiȓeṯ.
8 Neccin lla, neccin ḏ ṯarwa n nhar, aɣarneɣ yiȓi ȓaƹqeȓ. A negg ṯjilit nni n ȓeḥḏiḏ iǧan nettaṯ n lʼiman ḏ ȓemḥibbeṯ. A negg lkask nneɣ iǧan netta ḏ lʼamal n ufekki.
9 Qa war ḏaneɣ ixḍar ca Arebbi bac axaneɣ ikk uɣḍab lla, qa ixḍar-aneɣ bac a nenjem s ufus n Siḏiṯneɣ Ƹisa Lmasiḥ.
10 Netta immuṯ xaneɣ bac a neddar akiḏes waxxa neccin nfaq niɣ neṭṭeṣ ḏeg unḍeȓ.
11 Falihaḏa tcejjaƹeṯ ayawya tƹawaneṯ ayawya mammec teggem ȓexxu.
Ȓuṣiyaṯ ṯineggura
12 Fa ay ayṯma, neqqar-awem weqqarem yinni ixeddmen jarawem ig iǧan xawem nehhan-kenniw.
13 Ucem-asen ijjen n lqima ṯemɣar s ȓemḥibbeṯ nwem ƹlaḥsab ȓxeḏmeṯ nsen. Iȓim ƹaweḏ ḏi ȓehna ak wayawya.
14 Ay ayṯma, nhaṯ yinni iǧan ḏ imeƹgazen, cejjƹeṯ yinni itefciȓen, ƹawneṯ yinni iteḍƹifen, ṣebbareṯ ak marra.
15 Arrem-d ȓbaȓ nwem, itxeṣṣa uȓa ḏ ijjen war itxeǧis ccerr s ccerr nneɣni. Lla, ȓebda rezzuṯ min iǧan ḏ aṣebḥan jarawem ḏ jar yiwḏan marra.
16 Farḥem ȓebda,
17 tettarem i Arebbi bȓa ma aḏ tbeddem,
18 cekkarem-ṯ ḏi marra ṯimesȓayin. Liʼanna ḏ manaya ig itraja Arebbi zzaywem ḏi Ƹisa Lmasiḥ.
19 War tsexsayem ca Arruḥ iqeddsen.
20 War tseḥqarem ca awaȓen nni iy ƹeȓmen yiwḏan zi Arebbi qqaren-ṯen.
21 Lla, meyyzeṯ manayenni marra. Ṭṭfeṯ ḏi min iǧan ḏ aṣebḥan;
22 Aggwjeṯ x marra min iǧan ḏ aƹeffan.
23 Arebbi nneɣ n ȓehna akenniw isiṣfa ḏeg yixef nwem qaƹ. Buḥbeȓ nwem ḏ ȓaƹmer nwem ḏ ddat nwem aḏ qqimen kemȓen bȓa ȓƹib aȓ d ɣa yas Siḏiṯneɣ Ƹisa Lmasiḥ.
24 Wenni iy ḏawem d itȓaɣan ḏayes ttiqeṯ, ḏ netta iy kenniw ɣa isiwḍen ɣar manaya.