Ayṯ-Kulus
Ṯabrat n arrasul Bulus
ɣar ȓmuminin n Ayṯ-Kulus
Lmuqaddima
1
1 Nec ḏ Bulus ḏ arrasul n Ƹisa Lmasiḥ s ȓxaḍar n Arebbi, akiḏi umaṯneɣ Timutawus.
2 Uriɣ ṯabrat-a i wawmaṯen iy ḏi iǧa lʼiman iǧan ḏ ṣṣaliḥin ḏi ṯendint n Kulus. Akiḏwem yiȓi arḍa ḏ ȓehna zi Arebbi Babaṯneɣ.
Ccuker ḏ ṯẓaǧiṯ n arrasul Bulus x ȓmuminin
3 Neccin ȓebda netcekkar Arebbi Babas n Siḏiṯneɣ Ƹisa Lmasiḥ xmi ḏas ntettar xawem.
4 Liʼanna netsȓa xawem x lʼiman nwem iy ḏaywem x Ƹisa Lmasiḥ ḏ ȓemḥibbeṯ nwem iy teggem i ṣṣaliḥin marra.
5-6 Lʼiman-a ḏ ȓemḥibbeṯ-a tasen-d zi lʼamal nni itwaxemmȓen i kenniw ḏeg ujenna. Tuɣa ṯesȓim xas ḏeg wawaȓ n ȓḥaqq iƹni ḏi Lʼinjil iy ɣarwem d yuwḍen. Ḏi marra ddunect-a Lʼinjil-a itarew itemɣar, mamc ƹaweḏ ixeddem jarawem zeg wami iy ḏas ṯesȓim ṯfehmem ḏ ṣṣaḥ arḍa n Arebbi.
7 Amenni iy ṯ ṯȓemḏem zeg wumaṯneɣ Pafras netta ḏ amsexxar iƹizzen ḏi ȓxeḏmeṯ. Ixeddem nican i Lmasiḥ ƹlaḥsab nneɣ.
8 Iƹaweḏ-aneɣ xawem x ȓemḥibbeṯ nwem lʼaṣel n ȓemḥibbeṯ-a ḏ Arruḥ iqeddsen.
9 X manaya zi nhar nni wami tuɣa nesȓa neccin xawem, netɣima ntettar-as i Arebbi xawem bac aḏ tƹemmarem s ṯusnaa x ȓxaḍar n Arebbi s marra ȓƹaqeȓ ḏ ȓefhameṯ ig iticcen Arruḥ iqeddsen.
10 Ḥima aḏ tuyurem x yijjen n ubriḏ iy ḏas iticcen i Siḏiṯneɣ lqima iy ḏas iteƹjiben marra. X ubriḏ-a aḏ tarwem marra ȓexḏayem ṯiṣebḥanin aḏ tmernim ḏi ṯusna nwem x Arebbi.
11 Ntettar i Arebbi aḏ tjehḏem ḏi marra ṯizemmar nwem ƹlaḥsab lquwwa nnes iǧan ƹaḍima bac aḏ tbeddem aḏ teṣbarem mliḥ s ȓefraḥeṯ,
12 bac aḏ tcekkarem Babaṯneɣ wenni iy ḏawem yucin ȓḥaqq aḏ tcarcem ḏi lwarṯ n ṣṣaliḥin ḏi nnur.
13 Isefȓeṯ-aneɣ zi ȓeḥkam n ṯaǧest isiweḍ-aneɣ ɣar ȓmulk n Mmis iƹizzen.
14 Zzayes netta isenjem-aneɣ iƹni iɣfar-aneɣ ȓmuƹṣiyaṯ nneɣ.
15 Mmis netta ḏ ṣṣifeṯ n Arebbi wenni war nzemmar neccin aṯ nẓer. Netta ḏ amenzub iḥekkem x qaƹ min d itwaxeȓqen.
16 Zzayes netta iy zi d twaxeȓqent qaƹ ṯimesȓayin ig iǧan ḏeg ujenna niɣ ḏi ṯmurṯ. Waxxa tbanent-id niɣ war d tbinent ca. Niɣ ḏ lƹarcaṯ niɣ ḏ lmemlakaṯ niɣ ḏ yinni iḥekkmen niɣ ḏ yinni ijehḏen. Qaƹ ṯimesȓayin-a zzayes iy d twaxeȓqent, twaxeȓqent-as-d i netta.
17 Ḏ netta ig iǧan qbeȓ x ṯmesȓayin qaƹ u x dsas nnes iy tmunent qaƹ ṯimesȓayin.
18 Ḏ netta iy iǧan ḏ azeǧif n ddat iƹni n jmaƹeṯ n ȓmuminin. Ḏ netta ig iǧan ḏ amezwaru, ḏ netta ig iǧan ḏ amenzu zeg imettinenc bac ḏ netta iy ɣa yiȓin ḏ amezwaru ḏi ṯmesȓayin qaƹ.
19 Liʼanna iƹjeb-as i Arebbi aḏayes isezḏeɣ ḏi Mmis qaƹ min ɣares.
20 Ṯumma isemṣȓaḥ Arebbi qaƹ ṯimesȓayin i yixef nnes ig iǧan ḏi ṯmurṯ niɣ ḏeg ujenna iƹni igga ȓehna s iḏammend n Mmis iy yuzzȓen x ṣṣalib.
21 Kenniw tuɣa qbeȓ tiggwjem x Arebbi tmenɣam akiḏes s ȓaƹquȓaṯ nwem teggem ṯimesȓayin ḏ ṯiƹeffanin.
22 Walakin ȓexxu lla, Arebbi isemṣȓaḥ-kenniw akiḏes s ddat n Lmasiḥ iƹni s ȓmewṯ nnes bac akenniw iqeddem zzaṯes ṯeṣfam bȓa ȓƹib war ḏinni bu wi kenniw iy ɣa itahamen.
23 Walakin labud aḏ teqqimem ḏi lʼiman nwem nican aḏ tbeddem x dsas, war ṯsemmḥem ca ḏi lʼamal n Lʼinjil tuɣa iy tesȓim. Lʼinjil-a twabeccarent zzayes qaƹ ṯimesȓayin itwaxeȓqen swadday ujenna, u nec Bulus ḏewȓeɣ ḏ axeddam nnes.
Ȓxeḏmeṯ n arrasul Bulus ḏi jmaƹeṯ n ȓmuminin
24 Ȓexxu nec farrḥeɣ x minxef tƹeddabeɣ ƹlaḥsab kenniw. Liʼanna ḏi ddat-a inu kessiɣ ȓḥaqq inu zi min ƹaḏ ineqqṣen zeg uƹeddeb nni n Lmasiḥ ƹlaḥsab ddat nnes iƹni jmaƹeṯ n ȓmuminin.e
25 Jmaƹeṯ-a ḏewȓeɣ ɣares nec ḏ ijjen n uxeddam nnes ƹlaḥsab lwajib nni zi Arebbi iy ḏayi d immucen bac akenniw beccareɣ s wawaȓ ikmaȓ n Arebbi.
26 Awaȓ-a netta ḏ ȓmaƹna nni iy tuɣa inuffaren ḏi zmanaṯ ḏ ljilaṯ iƹḏun, ȓexxu arrin-d xas ȓexbar ṣṣaliḥin.
27 Niṯni ixḍar-iṯen Arebbi bac aḏ xebbaren i yinni war ǧin ca zi Ayṯ-Israʼil aḏasen inin mecḥaȓ imɣar ȓxir-a lƹaḍim n ȓmaƹna inuffaren wanita. Min iƹna ȓmaƹna-ya? Lmasiḥ netta iǧa ḏaywem, ḏ lʼamal n lƹaḍama.