Ayṯ-Filippas
Ṯabrat n arrasul Bulus
ɣar ȓmuminin n Ayṯ-Filippas
Lmuqaddima
1
1 Nec ḏ Bulus akiḏi Timutawus neccin ḏ ixeddamen n Ƹisa Lmasiḥ. Ntari ṯabrat-a i ṣṣaliḥin n Ƹisa Lmasiḥ iy iǧan ḏi ṯendint n Filippas ḏ imeqqranen nsen ḏ nnuyab nsen.
2 Aɣarwem yiȓi arḍa ḏ ȓehna zi Babaṯneɣ Arebbi ḏ Siḏiṯneɣ Ƹisa Lmasiḥ.
Ccuker ḏ dduƹaʼ
3 Tcekkareɣ Arebbi kuȓ ṯwaȓat xmi ḏaywem tfekkareɣ.
4 Kur ṯwaȓat tẓaǧiɣ xawem ḏi ṯẓaǧiṯ inu s yijjen n ȓefraḥeṯ ḏ ṯameqqrant
5 ȓaḥeqqac ṯcarrcem akiḏi ḏi Lʼinjil zi nhar amezwaru aȓ ȓexxu.
6 Nec aqayi mteyyqen ḏi ṯmesȓayṯ-a: wenni ig ibḏan ḏaywem ca n cɣeȓ ḏ aṣebḥan axas itsiɣi axas itkemmaȓ ḥetta aȓ nhar nni n Ƹisa Lmasiḥ.
7 Ɣari ȓḥaqq aḏaywem fekkareɣ amenni ȓaḥeqqac aqa kenniw ɣari ḏeg wuȓ inu. Aqa marra ṯcarrcem akiḏi ḏi arḍa n ȓxeḏmeṯ-a waxxa aqayi ḏi ȓeḥbes niɣ tḏafaƹeɣ x Lʼinjil ḏ ȓḥaqq iy ḏayes.
8 Ataf Arebbi ḏ ccaheḏ inu mecḥaȓ iy kenniw tweḥḥaceɣ s lḥanana n Ƹisa Lmasiḥ.
9 Ḏ ṯanita ḏ ṯẓaǧiṯ inu ataf aḏ terni ȓemḥibbeṯ nwem ktar u ktar bac aḏ tessnem marra aḏ tmeyyzem marra.
10 Ḥima aḏ tixḍarem min iǧan ḏ aṣebḥan ḥima aḏ tiȓim ṯeṣfam bȓa ȓƹib ɣar nhar n Lmasiḥ.
11 Zzayes zi Ƹisa Lmasiḥ aḏ tiȓim ṯƹemmarem s min d itarwen ȓḥaqq. Marra manaya i lƹaḍama n Arebbi ḏ lḥamd nnes.
Lʼinjil irenni waxxa ḥebbsen arrasul Bulus
12 Ay ayṯma rezzuɣ aḏ tessnem min ḏayi iweqƹen, manayenni ḏ ṣṣaḥ ixeddem i Lʼinjil bac aḏ itentacar.
13 Nec lḥala inu ṯeḏweȓ maƹrufa jar marra ȓƹaskar n ȓeqṣar ḏ marra iwḏan iƹni nec aqayi ḏi ȓeḥbes ƹlaḥsab Lmasiḥ.
14 X ssabab n snaseȓ-a inu azyen ameqqran n ayṯma twacejjƹen bac aḏ ssiwȓen s wawaȓ n Arebbi s yijjen n zƹameṯ ḥsen zi qbeȓ bȓa ṯiggwḏi.
15 Ḏ ṣṣaḥ ḏinni ȓebƹaḍ tbeccaren s Lmasiḥ s ȓeḥseḏ ḏ lƹadawa, u ḏinni ȓebƹaḍ tbeccaren nican s ȓxaḍar nsen.
16 Yina tbeccaren s ȓemḥibbeṯ nsen wami ssnen twaxḍareɣ bac aḏ dafƹeɣ x Lʼinjil.
17 Yinni nneɣni lla, tbeccaren s Lmasiḥ s lƹadawa maci s wuȓ nsen iṣfa, rezzun aḏayi ggen lmacakil wami ǧiɣ ḏi ȓeḥbes.
18 Walakin maƹlic, s ṯnayen n ibriḏen-a Lmasiḥ itwabeccar. Ḏ manayenni iy iǧan muhim waxxa s wuȓ iy iǧan ḏ aɣeddar niɣ s wuȓ iy iǧan iṣfan. U s manayenni iy zi farḥeɣ nec.
Wah, aḏ qqimeɣ nec farrḥeɣ.
19 Liʼanna ssneɣ xmi tettarem xafi i Arebbi ḏ Arruḥ n Siḏiṯneɣ Ƹisa Lmasiḥ itƹawan-ayi ataf min ḏayi itewqiƹen aḏ iḏweȓ ḏ asefȓeṯ inu.
20 Trajiɣ s wur inu nec tmenniɣ war tseḏḥiɣ ca qaƹ x lwajib inu. Lla, nec tzeƹƹameɣ ȓexxu aḏ zeƹmeɣ menbaƹd bac s ddat inu azzayes imɣar Lmasiḥ waxxa aḏ mmṯeɣ niɣ aḏ ddareɣ.
21 Minzi ɣari Lmasiḥ netta ḏ ṯuḏarṯ inu, ɣari ȓmewṯ nettaṯ ḏ ljaʼiza inu.
22 Meȓa qqimeɣ ddareɣ s ddat-a inu, ataf aḏ rniɣ mliḥ ḏi ȓxeḏmeṯ inu. Walakin nec war ssineɣ ca min ɣa ixḍareɣ.
23 Ȓexxu aqayi jar ṯnayen n ṯmesȓayin-a iy ɣa ixḍareɣ. Ḏayi mizȓi aḏ uyureɣ zi ṯuḏarṯ-a aḏ iȓiɣ ak Lmasiḥ ȓaḥeqqac manaya qaƹ ḥsen zi marra.
24 Walakin labud ḥsen i kenniw meȓa qqimeɣ ddareɣ s ddat-a inu.
25 Aqayi teyyqeɣ s lwajib-a inu ssneɣ aḏ qqimeɣ aḏ siɣiɣ ḏanita akiḏwem bac aḏ ternim ḏi lʼiman azzayes ṯfarḥem.
26 Aɣarwem d ƹeqbeɣ ƹaweḏ. X ssabab-a ataf ȓefraḥeṯ nwem ḏi Ƹisa Lmasiḥ aḏ d tenfeyyeḍ ƹlaḥsab nec.
27 Lmuhim, suyureṯ ixef nwem ḏeg yijjen n ubriḏ iticcen lqima i Lʼinjil n Lmasiḥ. Ṯumma waxxa nec usiɣ-d akenniw ẓreɣ niɣ ɣabeɣ xawem ataf axawem sȓeɣ ȓexbar belli ṯuggurem nican x yijjen n array, ṯxeddmem fus ḏeg ufus x ssabab n lʼiman ig iǧan ḏi Lʼinjil,
28 ƹaweḏ war teggwḏem ca qaƹ zeg yinni iy ḏawem itƹerraḍen. Manaya iy teggem aɣarsen ṯiȓi ḏ ijjen n lƹalama iy d isbeyyanen mliḥ niṯni aḏ fnan kenniw aḏ tnejmem. Marra manaya aḏ d yas zi Arebbi.
29 Maci ƹlaḥsab Lmasiḥ azzayes ṯamnem waha, lla. Labud ƹaweḏ aḏ twaƹeddbem ƹlaḥsab ssabab nnes.
30 Minzi kenniw tmenɣam ḏeg umenɣi nni iy ḏi tuɣa tmenɣiɣ nec u ƹaḏ tesȓim belli tmenɣiɣ ḏayes.