3
1-2 Iḏen, wami nugi a neṣbar ƹaḏ ktar, tuɣa nfekkar ḥsen a neqqim ḏi ṯendint n Utina waḥeḏneɣ, Timutawus aṯiḏ nessekk ɣarwem bac akenniw isejheḏ akenniw icejjeƹ ḏi lʼiman nwem. Netta ḏ umaṯneɣ ixeddem akiḏneɣ ḏi ȓxeḏmeṯ n Lʼinjil n Lmasiḥ.
3 Nessekk-iṯ ḥima uȓa ḏ ijjen war itrejjiji ca s ȓemḥayen-a nwem aqa ṯessnem belli manaya iy xaneɣ yurin.
4 Wah, wami tuɣaneɣ akiḏwem qbeȓ neqqar-awem qa ȓemḥayen axaneɣ kkent. Ḏ manaya ig iweqƹen qa ṯessnem kenniw.
5 X manaya, wami ugiɣ aḏ ṣbareɣ ƹaḏ ktar, ssekkeɣ-d ɣarwem Timutawus bac aḏ ssneɣ lʼiman nwem. Ggwḏeɣ wenni itɣarran tuɣa iɣarr-ikenniw s ibriḏen nnes uca min tuɣa nexḏem jarawem imken iḏweȓ axmi war neggi walu.
6 Ȓexxu iḏweȓ-d ɣarneɣ zzaywem Timutawus, yuwi-yaneɣ-d ijjen n ȓexbar ḏ aṣebḥan x lʼiman nwem ḏ ȓemḥibbeṯ nwem. Inna-aneɣ aqa txemmamem ḏayneɣ mliḥ, ḏaywem ƹaweḏ mezȓi aḏaneɣ ṯeẓrem uȓa ḏ neccin ḏayneɣ mezȓi akenniw nẓer.
7 X manaya ay ayṯma, neccin netwacejjeƹ s lʼiman nwem waxxa aqaneɣ ḏanita ḏi ȓemḥayen ḏ yij uziyyar.
8 Ȓexxu aqa netƹic mliḥ wami tbeddam nican ḏeg ubriḏ n Siḏiṯneɣ.
9 Mammec iy ɣa negg a ncekkar Arebbi xawem?! Mecḥaȓ n ȓefraḥeṯ iy ɣarneɣ zzaṯ i Arebbi ƹlaḥsab kenniw!
10 Ǧiȓeṯ ḏ nhar ntettar-as i Arebbi s wuȓawen nneɣ bac akenniw nẓer ƹaweḏ, aḏawem nerni min ineqqṣen ḏi lʼiman nwem.
11 Aḏaneɣ irzem Arebbi Babaṯneɣ abriḏ ɣarwem netta s yixef nnes ak Siḏiṯneɣ Ƹisa.
12 Aḏ irni Siḏiṯneɣ ȓemḥibbeṯ nwem ak wayawya at isfeyyeḍ s waṭṭas ak marra iwḏan am neccin nexs-kenniw.
13 Aḏawem isejheḏ uȓawen nwem bac aḏ tiȓim bȓa ȓƹib aḏ tiȓim muqeddsin zzaṯ i Arebbi Babaṯneɣ xmi d ɣa yas Siḏiṯneɣ Ƹisa ak marra ṣṣaliḥin nnes.