5
1 Ɣar lḥurriya iḍȓeq-aneɣ-d Lmasiḥ bac a niȓi ḥurr ḏ ṣsaḥ. Beddeṯ nican baƹḏa, war tejjaṯ ca axawem ibesseȓ ƹaweḏ ijjen n dqeȓ n ṯzayȓut n isemɣan.a
Lḥurriya n ṣṣaḥ ḏi Lmasiḥ
2 Ṣennṭeṯ! Nec ḏ Bulus qqareɣ-awem meȓa ṯeggim ṭṭahareṯ n Musa, ataf Lmasiḥ war kenniw ineffeƹ s walu.
3 Aḏawem ƹawḏeɣ, aḏ iniɣ i kuȓ aryaz wenni iy ɣa iggen ṭṭahareṯ n Musa, itxeṣṣa labud aḏ iṭaƹ i Ccariƹa n Musa amen-ṯekmer.
4 Kenniw iy irezzun ṣṣulḥ s Ccariƹa nni ak Arebbi, aqa ṯetwaḥarrmem zi Lmasiḥ ṯbeƹƹḏem x arḍa nnes.
5 Qa neccin lla, netraja Arebbi aḏaneɣ isemṣȓaḥ akiḏes s lʼiman, u lʼamal-a nneɣ netta s jjehḏ n Arruḥ iqeddsen.
6 Liʼanna ḏi Ƹisa Lmasiḥ iƹni bnaḏem meȓa igga ṭṭahareṯ niɣ war t iggi ca manaya war ineffeƹ s walu. Min ineffƹen? Ineffeƹ lʼiman ig ixeddmen cɣeȓ nnes s ȓemḥibbeṯ.
7 Tuɣa kenniw ṯeǧam ḏeg yijjen n ubriḏ ɣar zzaṯ mliḥ. Wi kenniw isbedden bac war teggem ca array i lḥaqiqa?
8 Array-a iy teggem kenniw zaƹma maci zi Arebbi iy ḏawem d itȓaɣan.
9 Ɣir ḏrus n untunb isgaƹƹaḏ-d marra ȓƹajneṯ n urecṯi.c
10 Nec ɣari ttiqeṯ ḏi Arebbi war ṯqebbȓem bu can n array nneɣni. Walakin wenni iy kenniw isxerwaḍen, min ma iƹna netta aṯ iḥaseb s lƹiqab nnes.
11 Ay ayṯma, nec maƹlik ƹaḏ seȓmaḏeɣ ṭṭahareṯ n Musa zaƹma, iwa mayemmi ƹaḏ ḏayi tƹeddaben niṯni? Maƹlik labud ṭṭahareṯ-a, ataf ṣafi war itiȓi bu uḥeggar n ṣṣalib.
12 U yinni iy kenniw iheǧcen x ṭṭahareṯ-a tmenniɣ aḏ raḥen niṯni aḏ qessen ixef nsen!
13 Cuf ay ayṯma, iȓaɣa-yawem-d Arebbi bac aḏ tiȓim ḥurr. Walakin war tejjaṯ ca lḥurriya-ya nwem aḏ tiȓi ḏ ij ubriḏ iy zi ɣa ṯseƹƹifem ccehweṯ n array aƹeffan n nnefs nwem. Lla, aḏ tsexxarem i wayawya s ȓemḥibbeṯ.
14 Aqa marra ȓuṣiyaṯ n Ccariƹa n Musa munent-iḏ ḏanita: <Aḏ texseḏ ajjar nnec amecnaw ixef nnec.>
15 Walakin meȓa tmermacem ayawya am ȓuḥuc wa itett wa, ḥḍam ixef nwem aḏ tseɣȓim ayawya.
Arruḥ iqeddsen ḏ ṭṭabiƹa n bnaḏem
16 Fa nniɣ-awem, tƹiceṯ ƹlaḥsab ȓxaḍar n Arruḥ iqeddsen ṯumma war tseƹƹifim ca ccehweṯ n array aƹeffan n nnefs nwem.
17 Liʼanna min irezzu array aƹeffan n nnefs nneɣ netta ḍed min irezzu Arruḥ iqeddsen. U amenni min irezzu Arruḥ iqeddsen netta ḍed min irezzu array aƹeffan n nnefs nneɣ. Tƹarraḍen i wayawya ssenni war teggem ca ṯimesȓayin-a iy ṯexsem aḏ teggem.
18 U meȓa ȓxaḍar n Arruḥ iqeddsen indeh-ikenniw, ataf war xawem ṯḥekkim ca Ccariƹa.
19 Ȓexḏayem n array aƹeffan n nnefs nneɣ aqa tbanent-id iƹni lfasad ḏ min isexnizen ḏ ȓeqbaḥeṯ,
20 ḏ lƹibada n lʼaṣnam ḏ sḥur ḏ lƹadawa ḏ umenɣi ḏ lɣira ḏ uɣḍab ḏ ṭmaƹ ḏ lxilafaṯ ḏ lʼaḥzab,
21 ḏ ȓeḥseḏ ḏ waṭṭas n creb ḏ lmadella n ssekra ḏ min itcabbahen ḏi manaya. Ƹeǧmeɣ-awem-d ȓexxu mamc tuɣa ḏawem ƹeȓmeɣ zi qbeȓ: yinni iteggen ȓexḏayem-a war twariṯen ca ȓmulk n Arebbi.
22 Fa min d itarew Arruḥ iqeddsen? Itarew-d ȓemḥibbeṯ ḏ ȓefraḥeṯ ḏ ȓehna ḏ ttasiƹ n ȓxaḍar ḏ lkarama ḏ wuȓ acemȓaȓ ḏ bnaḏem ḏi iǧa ttiqeṯ
23 ḏ wuȓ iṣebbaren ḏ bnaḏem iḥekkmen x ccehweṯ nnes. War ṯeǧi bu can n ccariƹa ig isbeddan ṯimesȓayin-a.
24 U yinni iǧan n Ƹisa Lmasiḥ ṣafi ṣellben array nni aƹeffan n nnefs nsen akeḏ ccehweṯ ḏ ȓxaḍar n array-a.
25 Meȓa netƹic s Arruḥ iqeddsen, ataf labud a nuyur s ȓxaḍar nnes.
26 War nsemɣar ca ixef nneɣ s ttakebbur, war ḏayneɣ itiȓi ca ȓeḥseḏ ḏ ṯɣennant jaraneɣ.