Isá óilde añárar boro imam
8
Ziín howá gíyeh híin or mul hotá óilde, añára ttu eggwá endilla boro imam asé, zibá asman ot mazé Alla Tálar toktór den ḍak ottu boiṛá asé, 2 zibá pak zagat hédmot goré, yáni asól ṭambu waán ot, ziyán Mabude beh ṭaikké, insáne no.3 Hárr eggwá boro imam ore tulá zah de toh nozorana edde kurbani ókkol peec gorí bolla éna, hétolla añárar gwá ttu yó peec gorí bolla kessú tákar zorur. 4 Íba zodi duniyait tákito, Íba bilkúl imam ói no faitto, kiyólla-hoilé Córiyot mozin nozorana peec gorí bolla de age lóti imam asé, 5 zetará asmani siz ókkol or nomunar edde sábar hédmot goré. Hétolla toh Muúsa ye ṭambu ṭakibárcot Alla ye íba re endilla úñciyari díyl, “Saáic, faár or uore toré ze nomuna dahá gíyeh, fottí ekkán hé mutafek banaic.”a 6 Montor yala toh Isá ye ítarar túaro uttom hédmotdari faiyé, eddúr zeén níki Íba beétor razinama waán or usíla yó, ziyán beétor waada ókkol or buniyadir uore gorá gíyeh.
7 Foóilar razinama gán zodi nikút óito, tóoile toh dusára razinamar honó zorurot no óito. 8 Montor Alla ye Nizor bonda ókkol or hosúri daháidi bolla hoiyé de,
“Mabude fórmair, soó, din uúin aiyér,
zeñtté Añí ekkán noya razinama goijjúm
Isráil or manúc lói
edde Yohúdahr manúc lói.
9 Híyan razinama waán or ḍóilla no óibo,
ziyán Añí ítarar bafdada ókkol lói oñtté goijjílam
zeñtté Añí ítara re át ot dóri
Ijíp dec ottu neelai ainnílam.
Kiyólla-hoilé ítara Añr hé razinamat zari nó táke,
hétolla Añí yó ítarar uzu díyan nó díh,
Mabude fórmair.
10 Mabude aró fórmair, din híin baade Añí Isráil or manúc lói ze razinama goríyum
híyan óilde yiána:
Añí Añr córiyot ókkol ítarar zehén ot ḍálidiyum,
edde híin ítarar dil ot lekídiyum.
Añí ítarar Alla óiyum,
aar ítara Añr bonda óibo.
11 Yárbaade lóti ítara ttu nizor atehañsór maincóre
yáh nizor bái ore endilla taalim diya no foribó de ki, ‘Mabud ore sinó,’
kiyólla-hoilé ítara ḍoóñr cóñṛo beggúne
Añré siníbo.
12 Kiyólla-hoilé Añí ítarar hosúri ókkol maf gorídiyum,
aar ítarar guná ar monot no raikkúm.”b
13 Íba ye zeñtté “ekkán noya razinama” hoiyé, Íba ye toh agor gán ore baáldai félaiye. Aar ziyán baáldai zagoi edde furan óizagoi, híyan toh hára gaib óizayboi.