Ḍoóñr Nejat
2
Hétolla añára ziín fúinni, híin or uzu aró bicígori díyan diyar zorur, zeéne añára híin ottu dur ói no zaygói. 2 Kiyólla-hoilé zodi fírista ókkol or duara hoóil de hotá híin kaayem asé de óile, aar hárr hosúrir edde nafórmanir laayek sáñza faáil de óile, 3 tóoile añára héntu keéngori hári fariyúm zodi añára eén ḍoóñr nejat ore éckara gorí? Hé nejat or baabute toh age Malike elan goijjé, baade zetará fúinne ítara híyan sóiyi de sábut díye. 4 Fúañti-fúañti Alla ye yó Nizor moncá mozin illayi-nicán, taajuippa harhána, ḍoilla-boḍoilla keramot, edde Pak-Ruhr niyamot ókkol lói híyan or gobá díyat accíl.Nejat or bani
5 Íba ye añára ze aibár duniyair baabute hoóir, híyan ore toh fírista ókkol or kobzat nó deh. 6 Bólke pak-kalam ot ek zagat honókiye endilla hoiyé de asé,
“Insán kii deh, Tuñí híin olla kíyal rakó de?
Yáh adomzat kii deh, Tuñí híin ore saásita goró de?
7 Tuñí híin ore kessú ṭaim olla éna fírista ókkol or túaro niso banaiyó;
Tuñí híin ore tas ísafe diiyó de óilde mohíma edde izzot;
8 Tuñí hárr kessú híin or foor tole gorídiyo.”a
Hé ísafe, Alla ye hárr kessú híin or kobzat gorídile toh Íba ye híin or kobzat no di honó kessú bad raikké de nái. Montor aijjó añára hárr kessú híin or kobzat no dekír.
9 Lekin añára toh Isá re dekír, Zibá re kessú ṭaim olla fírista ókkol or túaro niso gorá gíyeh, zeéne Allar rahámote Íba ye fottí manúc olla moot mukabela gorí fare. Íbar dukkór moot or zoriya Íba re tas ísafe mohíma edde izzot diya giyéh.
10 Kiyólla-hoilé Alla, zibá lla hárr kessú asé, edde zibár usílaye hárr kessú asé, boóut fuain dore mohímat aní bolla Íba ttu ṭík laiggé de, ítarar nejat or bani re duk faa bay furafuri nal gorí bolla. 11 Kiyólla-hoilé zibá ye pak-sáf goré Íbar edde zetará re pak-sáf gorá gíyeh, ítara beggún or Baf toh ek. Hétolla Isá ye ítara re báiboináin hoité no córma; 12 Íba ye hoiyé de,
“Añí Tuáñr nam Añr báiboináin dor hañse boiyan goijjúm,
maáfil ot máze Añí Tuáñr taarif or seér gaiyúm.”b
13 Aró hoiyé de,
“Añí Íbar uore bóraca rakíyum.”c
Yián óu hoiyé,
“Ótiya, Añí edde Alla ye Añré diiyé de fuain híin.”d
14 Fuain híin zettót gusso edde lou ola, hétolla Isá Nize yó ekí ḍóilla boinné, zeéne moot or duara Íba ye uitaré dónco gorífelai fare zar ttu moot or uore taakot asé, yáni Ibilíc ore, 15 edde uitará re azad gorí fare zetará moot or ḍoore zindigibór gulamit asé. 16 Kiyólla-hoilé asóle Íba ye fírista ókkol ore modot goré de no, bólke Ibrahím or nosól ore beh modot goré. 17 Hétolla Íba ttu hárr ruwate Nizor báiyain lói ek ḍoilla ówa foijjé, zeéne Allar hédmot ot Íba ezzon raháman edde biccácdar boro imam boni insán or gunár koffara di fare. 18 Kiyólla-hoilé Íba Nize zettót entán or hálot ot duk bordac goijjé de asé, hétolla Íba ye zetará entán ot fore ítara re modot gorí fare.