Asól forhésgari
3
Ahérit hoóir, ó añr báiboináin ókkol, Malik or ummot de hétolla kúci goró. Añr ttu ekí hotá lekíte duk no lage, kiyólla-hoilé héndilla goillé tuáñra héfazot tákiba. 2 Kuñir ókkol ottu úñciyar táikko, yáni hóraf ham-goróya uitará ttu zetará jisím haṛi-síri ázomi goré. 3 Kiyólla-hoilé añára éna asól ázomi goijjá manúc, zetará Allar Ruhr hédaiyote ebaadot gorí, Mosih Isá re lói borái gorí, aar jisím or uore honó bóraca no gorí, 4 zodi añí nizor ttu yó jisím or uore bóraca goríbar wajá asé de óile yo. Honókiye ítar ttu jisím or uore bóraca goríbar wajá asé bóuli ṭáare de óile, añr ttu toh aró bicí asé: 5 añré añcṭo din ot din ázomi gorá gíyl; añí Boni Isráili, Binyamin or háandan ottu, añí Hibraniól or ézzon Hibrani. Córiyot amól gorár baabute hoilé, añí ézzon Féroci accílam; 6 jus tákar baabute hoilé, añí Mosihr zomát ore zulúm goittám; aar Córiyote forhésgar ówar baabute hoilé, añré nidak faa zayto.7 Lekin ziín añr lla nofá accíl, yala híin ore Mosihr zoriya lussán bouli goni. 8 Aró hoitó sailé, añí hárr kessú re lussán bouli goni de kiyólla-hoilé Mosih Isá añr Malik ore zanat ódorbaára kimot asé, zibár zoriya niki añí hárr kessúr lussán cóoiyi aar híin ore fúrari bouli goni, zeéne añí Mosih re fai, 9 aar añré Íbar bútore faa zah, Córiyot amól goillé faa zah de héndilla nizor kucíc or forhésgarir zoriya no, bólke Mosihr uore iman aníle faa zah de forhésgarir zoriya, ze forhésgari Allar torfóttu iman or zoriya beh aiyé. 10 Añr ttu hé Mosih re, yáni Íbar zinda ówar kudurut ore edde Íbar dukkót híssa ówa re zainto monehoór, Íbar moot or nomunaye mori-mori; 11 zeéne honó bote añí mora ttu zinda ówar héddur foijjonto yó foóñsi.
Monzil-moksót or uzu duñra
12 Endilla no de ki, añí híyan furafuri faifélaiyi yáh añí furafuri sóiyi óigiyigoi, montor añí waán dórifelai bolla beh duñrat así ziyán or niyote Mosih Isá ye añré dórifelaiye. 13 Báiboináin ókkol, añí nizoré nize híyan aijjó dórifelaiyi bouli no ṭáari, lekin añí ekkán gorí de híyan óilde: fisé ziín asé híin ore foóraifelai muúntu ziín asé híin or héṛe foóñsibar kucíc. 14 Añí monzil-moksót or uzu duñrat así de, Mosih Isár duara asman or uzu Allar ze ḍak asé, boccíc ísafe yíba hásil gorí bolla.
15 Hétolla, añára zetará balok así, añára beggún ottu hé kíyal rakár zorur. Aar zodi honó kessút tuáñra ttu oinno ḍoilla kíyal táke, Alla ye tuáñra re híyan óu zahér goríbo. 16 Zeén óibo óuk, añára zeddúr ot foóñiccigoi héddur or mutafek zindigi haṛai.
17 Báiboináin ókkol, tuáñra beggúne añr ḍóilla góri solat táko, aar uitarár híkka díyan diyo zetará añára ttu tuáñra deikkó de hé nomuna mozin sole. 18 Kiyólla-hoilé añí toh tuáñra re yián boóut bar hoóilam, aar yala hañdi-hañdi yó hoóir, endilla boóut zon asé zetará Mosihr kúruc or duccon or ḍóilla góri sole; 19 ítarar tokdír ot borbadi asé, ítarar Kúda óilde nizor feṭ, ítara nizor ttu córom laga foitto de híin lói fohórai goré, ítara duniyaibi gún or híkka beh mon deh. 20 Montor añárar nagorita óilde asman ot, zentú añára éggwa Nejatdoya yáni Malik Isá Mosih aibár bicí azzur sáañte entezar ot así, 21 zibá ye níki añárar niróc haiya re Íbar mohíma ola gaar ḍóilla ói bolla bodolifélaibo; híyan oh taakot estemal gorí goríbo ziyán lói Íba ye hárr kessú re úddwa Nizor kobzat gorífelai fare.