Injil Córif or Síyara
FILÍPPAIÓL
Síyara Filíppaiól or Foriso
E síyara Filíppaiól óilde ekkán ceñṛí. Yián or lekóya óilde sáhabi Pául. Ceñṛí yián ore Isá Mosih zormo ói tokoriban háiṭ-ek bosór baade leká gíyeh. Héñtte yóggwa ziyól ot accíl (1:13), óitofare Rom cóor or ziyól ot. Ceñṛí yián Filíppi cóor ot accíl de zomát twar hañse leikkíl deh. Filíppi cóor or baabute síyara Hamól ottu kessú zani fari. Filíppi óilde Makedóniya elakar rasdáni. E zomát twa óilde Makedóniya elakat foóila zomát. E zomát twa re Páule edde Sílase bóng bañdí cúru goijjíl. Ítara héṛe táite ítara re ek rait olla ziyól ot úddwa diya gyíl (Hamól 16).
Óitofare Páule e ceñṛí gán boóut ḍóilla niyote leikkíl. Yóggwa ziyól ot de fúni e zomát twa ye yóggwa lla ze modot tun foóñsaiye híin olla yóggwa ye ítara re cúkuriya goijjé (4:10-19). Yóggwa ye ítara re nizor ziyól or hálot or baabute yó noya hóbor ókkol foóñsaiye, aar Timóti edde Epaforoditus olla tuaijjo diyé (2:19-30) zeéne ítara tará re estekbal goré aar tarár netaham ore izzot deh.
Súrki ókkol
1. Filíppi cóor or zomát ore Pául or sólam (1:1-2)
2. Pául nizor hálot or kessú noya hóbor edde íbar kessú sintabáfana (1:3—2:30)
3. Isáyi zindigir kessú amóli nosíyot (3:1—4:9)
4. Filíppi cóor or zomát twa re cúkuriya edde sólam (4:10-23)