Pepanännä'na kakeakasam
8:1-36
8
Tä' daka too metamba-tamba kakeakasam,anna umpa'pahingngiam gamahanna kamanähängam?
2 Ke'de' yabo ongeam matande dio bihim lalam,
dio ma'puhengana lalam,
3 dio sa'dena ba'ba suluhanna kota, dio olona ba'ba kota,
dio lalam messullu' tama kota, nasa'ba tohoi metamba naua:
4 “O mentu'nako ma'hupatau, kupamatingangko tula',
mentu'nako ma'tanda to lino, kusohongangko kada.
5 O mentu'nako to saidi' kapaissangammu, pakegunai akkalammu,
o inggannako to maho, popatahanni pikkihammu.
6 Patananni talingammu, aka la umpengkadaannä' kaha-kaha keangga',
anna la tiku'mi' pudu'ku umpassubum kaha-kaha tungka ianna.
7 Pudu'ku untula' kamaloloam,
anna lilaku napesapai la umpatappa tula' kadake.
8 Ingganna pessubungam pudu'ku malolo,
tama'sampa siluä tama'sepu' siapalam.
9 Masissä' napenabaam to kepikkiham,
anna malollä nasi'dim to deem kapaissanganna.
10 Paaha puhai ia penännä'ku anna la peha',
pa'kalandoi puhai ia kapaissangam anna la bulabam täsä'.
11 Aka kakeakasam keangga' puha ia anna la batu permata,
moi la ebangam maaka susi napemulu hupatau tala deenni nasipadaangam.
12 Kaom too inde kakeakasam, siajokakam akkalam,
anna kuissam lalanna untammu kapaissangam sola pikki' pali'.
13 Mengkahea' lako DEBATA kalembasanna ungkabassi kakadakeam;
kukabassi kao malangka' penaba, ussanga-sanga kale, panggauam kadake,
anna tula' mebaba bulim.
14 Siampuannä' petundam pepakilalaam anna pikki' pali',
siampuannä' pikkiham anna kamatohoam.
15 Kao anna malai ma'pahenta ingganna tomahaja,
kao anna malai unte'geham kamaloloam mentu'na to palumbängam.
16 Kao anna malai muampuam kakuasaam to kasalle,
teem toi duka' ingganna pedaengam anna to mahhotto' malolo.
17 Kukamasei mentu'na to umpohäeä',
anna to manontom umpameää' la nalambi'ä'.
18 Siampuannä' katomakakaam anna kamatandeam,
teem toi duka' kulle mananna' anna undu' lollä.
19 Ingganna aka-aka buttu illaam mai kaleku keangga' ia anna la bulabam, keangga' puha ia anna la bulabam täsä';
susi siam duka' keangga' puha ia anna la peha' ma'nini.
20 Mentekkaä' muundu' ulalam malolo,
mellao umpanete undu' lollä.
21 La kumana' ebangam ma'mata-mata lako to umpohäeä',
anna la kupalummi' panito lokona.
22 Inna napadadimä' DEBATA wattunna la umpahandu' pengkähänganNa,
yolona anna la umpalakoi pengkähänganNa wattu puha lessu'.
23 Pempom diopi mai anna nalanti'mä',
mengkalao diopi mai wattunna tä'pi dadi inde lino.
24 Tä'pi deem le'bo' kalua' anna dadimä' kao,
tä'pi deem mentu'na kalimbuä anna deemmä' kao.
25 Tä'pi deem dilemo buntu,
anna dibokkom tanete anna dadimä';
26 tä'pi deem dipadadi lino sola pädä kalua',
tä' toopi deem sobä' diita illaam lino.
27 Dioä' heem wattunna ungkumbä langi' DEBATA,
wattunna umpadadi katonanna le'bo' sola langi';
28 wattunna umpopa'ongeam gabum yabo lawwa,
anna wattunna umpopa'koä'-koä' kalimbuä dio le'bo',
29 wattunna ussapa' pali' uwai le'bo',
anna mala tä' lempam uwainna,
anna wattunna umpaokko' pelanggana lino.
30 Dioä' sa'deNa kao to disa'bu' änä' pa'pakamajanNa,
allo sibala' allo kupomasannam penabanNa,
anna tamonda takattu sundede buaku dio oloNa;
31 masannam penabangku muita lino pa'padadinNa,
tiala inabangku muita hupatau illaanna.
32 Dadi pa'pehingngikoa' di kao, o inggammua' to dipoänä',
aka maupa' anna katambasam to muoli' mamma' ussalungku metindo mentu' ulalangku.
33 Pehingngiiko pepanännä' anna malako keaka';
daa umpa'bahinni'i!
34 Maupa' anna katambasam to ma'pehingngi lako kaleku,
to allo-allo mangngampa dio ba'ba banuangku,
anna to unjagai andihi ba'ba suluhangku.
35 Aka menna-menna tinanda di kao, la ullambi' katuboam,
anna la untammu kamapiaam penabanNa DEBATA.
36 Sapo' menna-menna tä' tinanda di kao, uhhugiam kalena;
menna-menna ungkabassiä', umpemulu kamateam.”