Dio Gaza Simson
16:1-3
16
Pissam wattu le'ba' lako Gaza Simson. Dioi, muitam mesa baine passunda', iya le'ba'um sola metindo. 2 Tappana ditulasam to Gaza diua: “Sule Simson,” iya suleim napepali'i indo ongeam anna naabunnii puli bengi dio ba'bana kota, sapo' tä'pi deem aka napogau' indo puli bengi aka nauai: “Tibukka'pi baja mane tapateia'.”3 Sapo' angga hi satängä bengi metindo Simson. Tängäi bengi bangommi Simson, anna le'ba'i lako ba'ba kota, anna napasisabalianni limanna naanda'i indo tutu' ba'bana kota napasianda'i indo dua andihi ba'ba anna nahebu'i sitonda pesulu'na. Mane napassanni, anna nababai längäm pusu' tanete sitingngajo Hebron.
Simson anna Delila
16:4-22
4 Masäe-säei lessu'na ia too, iya kende'um elo' bunga-bunganna Simson lako mesa baine dio Lembä Sorek isanga Delila. 5 Iya sulem sanaka-naka to ma'kuasa illaam botto dio Filistin umpellambi'i indo baine anna nauaanni: “Se'de'i Simson anna mala muissam akanna ma'pateem punalai matohona, anna la kiaka susi anna malai kitaloi, lambi' kipungo anna kipopa'bukkui. Maka' mala umpateem, iya la kibeengko sandakam si sasa'bu sahatu' doi' peha'.”
6 Iya umpa'tula'im Simson Delila naua: “Kupelau matim la untulasannä' akanna ma'pateem punalai matohomu, anna la diaka susi dipungoko anna dipopa'bukku?”
7 Natimba' Simson naua: “Maka' dipungoä' pitu hambunna uli'na bälä'du' bakahupi tä'pi mabangi, iya la mäläi kamatohoangku anna la susiä' tau biasa senga'.”
8 Tappana puha natulasam Delila indo to ma'kuasa illaam botto dio Filistin, iya suleim umbaba pitu hambunna uli' bälä'du' bakahupi tä'pi mabangi nabeem Delila, anna napungoanni Simson. 9 Wattu eta too mangngampa ia illaam tambim sanaka-naka to Filistin. Mane ma'kada kasallei Delila naua: “La nasakkako to Filistin, Simson!” Sapo' tappa naha'ba'-ha'ba' Simson indo uli' bälä'du' anggasanna bännä kattu naande api. Iya tä' diissam umba amo ngei naongei kamatohoanna.
10 Puhai ia too, iya ma'kadam Delila lako Simson naua: “Mannassa umpakamaho-mahoä' anna ungkaägä'-ägä'i. Tentomai, kupelau matim la untulasannä' tungkaianna aka la dipake umpungoko.”
11 Natimba' Simson naua: “Maka' dipungo manda'ä' uli' bakahu tuli tadeempi dipopassäke' aka-aka senga', iya la mäläi kamatohoangku anna la susiä' tau biasa senga'.”
12 Iya mualam uli' bakahu Delila, anna napungoanni Simson. Wattu eta too deem sanaka-naka to Filistin mangngampa illaam tambim. Mane ma'kada kasallei Delila naua: “La nasakkako to Filistin, Simson!” Sapo' tappa naha'ba'-ha'ba' Simson indo uli' bakahu dio limanna anggasanna salamba' bännä nakattu.
13 Iya nauam Delila lako Simson: “Umpakamaho-maho liupä' temo anna ungkaägä'-ägä'i. Tulasam manappaä' aka hiko la dipungoangko.”
Natimba' Simson naua: “Maka' umpakasepi'i api' inde pitu ampingngi'na beluä'ku, mane umpaahha'i balida, iya la mäläi kamatohoangku anna la susiä' tau biasa senga'.”
14 Tappana mamma' Simson, iya napakasepi'im api' Delila indo pitu ampingngi'na beluä'na, mane napaahha'i balida. Mane ma'kada kasallei Delila naua: “La nasakkako to Filistin, Simson!” Sapo' tappana tikkedu' Simson anna umpessintoam beluä'na, iya mäläi lao indo api' sola balida.
15 Iya ma'kadam Delila lako Simson naua: “Umbangka paha' indo muua: ‘Kupohäeko,’ inna tä' siam ia lu mai penabammu? Kapentallunnam umpakamaho-mahoä' anna tä' untulasannä' akanna ma'pateem punalai matohomu.” 16 Tappana allo-allo ma'henge liu Delila lako Simson anna nahahu' liu, lambi' la potti' bäbäm nasi'dim.
17 Iya natulasammi indo to nabuniangam naua: “Tä'pi deem siisso gontim beluä'ku, aka illaampä' tambu'na indoku anna napasähä'mä' Puang Allataala mendadi nazir. Maka' dikalukku'i beluä'ku, iya la mäläi kamatohoangku anna la susiä' tau biasa senga'.”
18 Tappana naita Delila natula' si'dam pole' Simson indo to nabuniangam, iya umpopetambaim ingganna indo to ma'kuasa illaam botto dio Filistin nauaam: “Maingkoa' too pole le, aka natulasam asammä' indo to nabuniangam.” Iya suleim indo to ma'kuasa illaam botto dio Filistin napasindum nababaam doi'. 19 Puhai ia too, umpakamamma'um Simson Delila dio abinganna, mane untambai mesa tau anna nakalukku'i indo pitu ampingngi'na beluä'na. Dadi, napahandu'um Delila umpopa'bukku Simson, anna mäläim kamatohoanna.
20 Mane ma'kada kasallei Delila naua: “La nasakkako to Filistin, Simson!” Iya tikkedu'um Simson anna ma'kadai naua: “La lappa' omä' tia umba susi lessu'-lessu'na, anna la mengkaliuta'ä' ullappasam kaleku.” Sapo' tä' naissam naua natampeammi DEBATA.
21 Iya nasakkam to Filistin, nakalessu'i dua matanna anna napasolai dokko Gaza. Dihantei limanna hante tembaga anna dipopanggilim gandunni illaam tahungkum. 22 Sapo' napahandu' oom sule tubo beluä'na tappana puha dikalukku'i.
Kamateanna Simson
16:23-31
23 Masäe-säe lessu'na ia too, sitammu-tammum ingganna to ma'kuasa illaam botto dio Filistin la umpehumalasam tunuam buda lako Dagon, to si napa'debatai anna la umpakende' katilallasam aka nauai:
“Nabehoangammakia' debatanta tama pala' limanta
Simson balintaa'.”
24 Tappana muita Simson indo tau buda, iya umpujim sanganna debatanna naua:
“Nabehoammakia' debatanta dokko pala' limanta,
balintaa',
to undake-dake litä'taa',
anna to umpatei buda solataa'.”
25 Tappana mahassanni kassi tilalla', iya ma'kadaim naua: “Pasolaangkia' sule Simson illaam mai tahungkum, anna napopetabakia'.”
Iya dipopetambaim Simson illaam mai tahungkum, mane napakamaho-mahoi dio olonai, anna mane nasua ke'de' illaam alla'na dua andihi. 26 Deem mesa änä' muane untettei, iya ma'kadam Simson lako naua: “Palambi'ipä' indo dua andihi papana inde banua kapenombaam lako debata anna pabäiä' kuhama'i anna mala kusussahei.” 27 Wattu eta too ponno muane sola baine indo banua kapenombaam. Ingganna to ma'kuasa illaam botto dio Filistin dio asam heem, anna yabo papana indo banua kapenombaam kiha-kiha deem tallu sa'bu tau muane sola baine umpengkitai Simson dipakamaho-maho.
28 Iya mengkaalam Simson längäm DEBATA naua: “O PUANG ALLATAALA, Debata to kupenombai, kamaseiä' kilalaiä'. Beem siapä' kamatohoam la anggannam temo, o Puang Allataala, anna mala pissam liu kupabala'i la kupembalasam indo dua lise' matangku lako to Filistin.” 29 Anna mane naanda'i Simson dua andihi papana indo banua kapenombaam illaanna tängä, mane nasundemme'i lima kananna mesa indo andihi anna lima kaihinna mesa. 30 Anna mane ma'kadai Simson naua: “Pabäiä' sipuli inde mai to Filistin.” Mane napengkatohhäi nabussum, iya hompom indo banua kapenombaam untappai ingganna to ma'kuasa illaam botto dio Filistin anna ingganna indo tau illaam indo banua kapenombaam. Buda puha ia napatei illaam wattu kamateanna anna to napatei illaam wattunna tubopi.
31 Puhai ia too, le'ba'im dokko solasubunna Simson anna ingganna kasahapuanna la naalai bakkena anna nababai dio mai, mane nalamunni illaam alla'na Zora anna Esytaol napaillaam ku'bu'na Manoah, ambena. Dua pulo taunna ma'pahenta Simson umpangngului to Israel.