Hubä'-hubä' tembo'na kota Yerikho
6:1-27
6
Wattu eta too ditutu'i mäntäm ba'ba suluhanna kota Yerikho indana malai tama to Israel. Tä' deem moi podo la mesa tau dipabäi tama battu haka la messubum. 2 Iya ma'kadam DEBATA lako Yosua naua: “Pennassai, puhangko kupadokkoam lisu pala'mu kota Yerikho sola tomahajanna anna ingganna pa'bahani matittana. 3 Pahallua' la umpenggulilinni kota ia too. Ingganna tentaha la tiäto' ma'lengko umpenggulilinni indo kota pissam illaam sangngallo, annam allona la naolaam. 4 Pitu sando pahallu la umposanda simesa pitu sangkakala tandu' domba nababa dio olona indo Patti Pa'dandiam. Allo kapitunnai too pahallu la pempitu ia umpenggulilinnia' indo kota, anna ingganna sando la umponi indo sangkakala. 5 Maka' too uhhingnginna' napakalando moninna sando indo sangkakala tandu' domba, iya sangngim umbaku-bakuammokoa' a'da'mu. Iya la hubä'-hubä'um too tembo'na indo kota, iya tungga' ma'teka'ungkoa' längäm umpepatu olomu.”6 Iya untambaim ingganna sando Yosua änä'na Nun anna nauaanni: “Bulleia' pihakoa' inde Patti Pa'dandiam! Anna pitu sando pahallu la umposanda simesa indo pitu sangkakala tandu' domba la nababa dio olona indo Patti Pa'dandianNa DEBATA.” 7 Mane ma'kadai lako solana to Israel naua: “Pengkalaongkoa', penggulilinniia' inde dio kota. Anna indo tentaha to umbaba paha'buno pahallu la mendiolona Patti Pa'dandianNa DEBATA.” 8 Tappana puha ma'tula' Yosua lako solana to Israel, iya mellaom dio olona Patti Pa'dandianNa DEBATA indo pitu sando umposanda simesa indo pitu sangkakala tandu' domba. Naponi indo sangkakala anna natuhu'i indo to umbulle Patti Pa'dandianNa DEBATA. 9 Anna indo tentaha to umbaba paha'buno mellao dio olona indo sando to umponi sangkakala, anna lengkoanna tentaha senga' handam ibundi dio boko'na indo Patti Pa'dandiam manjaga. Indo wattunna mellao diponi liu indo sangkakala. 10 Sapo' inna puham umpakahi'di mate-mate to Israel Yosua naua: “Tä'koa' deem la mua'da', tä'koa' deem la ma'tula', anna tä' deem la messubum moi podo la sabattam kada dio pudu'mua' ke tä'koa' kuuaam. Kuuaampokoa': a'da'koa'! Mane mua'da'koa'.” 11 Susim too indo Patti Pa'dandianNa DEBATA napopebaba Yosua umpenggulilinni indo kota Yerikho, tiäto' ma'lengko pissam pali' napenggulilinni. Puhai, iya ma'pasuleim lako ongeanna ma'kema anna ma'bengii dio.
12 Makale'na, mebengngi'-bengngi'um bangom Yosua, iya nabulle oom sando indo Patti Pa'dandianNa DEBATA. 13 Indo pitu sando to umposanda simesa indo pitu sangkakala tandu' domba mellao dio olona indo Patti Pa'dandianNa DEBATA napasindum naponi indo sangkakala. Anna indo tentaha to umbaba paha'buno mellao dio olona indo sando to umponi sangkakala, anna lengkoanna tentaha senga' handam ibundi dio boko'na indo Patti Pa'dandiam manjaga. Indo wattunna mellao diponi liu indo sangkakala. 14 Indo allo kaduanna pissam napenggulilinni indo kota mane ma'pasulei lako kemana. Napateem lium too annam allona naolaam.
15 Allo kapitunnai, mebengngi'-bengngi'im bangom, ia sia buttunna allo, anna umpenggulilinnii kota Yerikho susi biasa pempitu opi pali'. Anggam allo eta too anna pempitui pali' napenggulilinni. 16 Kapempitunnai pali', iya umponim sangkakalana indo sando, iya ma'kadam Yosua lako to Israel naua: “A'da'koa', aka nabehom DEBATA dokko lisu pala'mua' inde kota! 17 Padahi kapu'i indo kota, anna dappo'i ingganna menabanna illaam. Susim too lalanna la tapehumalasanna' inde kota lako DEBATA. Anggam ia Rahab, indo baine passunda' sola ingganna to napasola tohho illaam banuanna, la dipabäi ia tubo, aka puha umbuni indo to tasuaa' lao ma'pesi'dim. 18 Sapo' ikoa'i, pissa'-pissa' akoa' la muala indo baham-baham to puham dipa'tantu la dipadahi kapu'. Maka' deem tau mualai indo to la dipadahi kapu', iya la napempa'deam asangkia' DEBATA illaam indo ongeam taongei ma'kema inggannakia' to Israel. 19 Ingganna bulabam, peha', anna pangkakka' tembaga sola bassi la dipaseheam ia DEBATA, anna la sangngim dipalutama ia ongeanna ebangam dipehumalasam lako DEBATA.”
20 Iya mua'da'um duka' to Israel anna umponi ia sangkakalana indo sando. Dadi, tappana nahingngi to Israel moni sangkakala anna sangngim umbaku-bakuammi a'da'na, iya hubä'-hubä' yabo mai tembo'na kota Yerikho. Iya tungga' umpepatu mandam olona to Israel ma'teka' ungkatama indo kota anna naokko'i. 21 Nadappo'i ingganna menabanna illaam indo kota natepa pa'dam, susi muane teem baine, susi tomatua teem to mangnguha, susi toi duka' sapim, domba, anna keledai. 22 Sapo' inna puham napakahi'di Yosua indo to dua to disua lao ma'pesi'dim indo lessu' naua: “Lakokoa' iko banuanna indo baine passunda' anna umpasolaia' messubum illaam mai sola ingganna to napasola illaam banuanna, umba susi puhangkoa' ma'dandi mate-mateam lako.” 23 Iya le'ba'um indo dua änä' gassim indo to ma'pesi'dim, anna umpasolai illaam mai banuanna Rahab, ambena, indona, solasubunna anna ingganna kasahapuanna to napasola illaam banuanna, anna napatuhoi ongeam la naongei tohho dio sulibanna ongeam naongei to Israel ma'kema. 24 Anna tentaha Israel ia ussobe indo kota sola ingganna issinna. Anggam bulabam, peha', anna pangkakka' tembaga sola bassi nababa ia tama ongeanna ebangam dipehumalasam lako DEBATA. 25 Rahab ia, indo baine passunda' sola ingganna kasahapuanna anna ingganna to napasola napabäi ia tubo Yosua. Tohho illaam alla'-alla'na to Israel sule lako temo, aka puha umbuni indo to nasua Yosua lao ma'pesi'dim lako Yerikho.
26 Puhai ia too, ma'dandim Yosua naua:
“Menna-menna ma'pattuju la umpake'de' sule inde kota Yerikho la natädo DEBATA.
Maka' napake'de' sule tembo' kotana la mate änä' uluana,
maka' napake'de' sule ba'ba suluhanna la mate änä' tämpä'na.”
27 Naundu' napatette DEBATA Yosua illaam ingganna pa'palakoanna, anna molele-lele sanganna illaam lembä ia too.