हाल्लेलुयाह - परमेश्वरे गुणगान भुओ लौतु
19
1 तढ़िया पता मेईं स्वर्ग अन्तर जीं सुआ मेह्णु के हुशेरि ईं बोते शुणी,“हाल्लेलुयाह!
बचुण, महिमा त ताकत हें परमेश्वरेरी असी।
2 किस कि तसे फैंसले सच्चे त सही असे।
तेन तेस बोडी वेश्याई सज्जा दिती,
जेन अपु नाजायज रिश्ते बइ मतोक भरमाई छओ थिआ,
त तेस केआं अपु सेवकी के लहुए बदला पूरा किआ।”
3 फि दोके लिंगि तेन्हि बोलु,
“हाल्लेलुयाह!
से टड़णे तुउ जुग जुग निस्ता रेहन्ता।”
4 तोउं से चोबिहो स्याणी त चोहरो जीव सिंहासन पुठ बिशो परमेश्वरे समाणि उटेऊ बिश कइ खुर बिने, त बोलुण लगे,
“आमीन, हाल्लेलुयाह!”
5 तोउं सिंहासन केआं यक अवाज आई:
“ए तुस सोबी परमेश्वरे सेवक, त तसे इज्जत करणे बाड़े! कि मठुड़ त कि बोडे,
तुस सोब तसे गुणगान करे।”
किएऊ ब्याह
6 तोउं मेईं सुआ हसुड़े अवाज, सुआ पाणि शणशणाते ईं त सुआ गड़कुणे अवाज ईं ई बोते शुणी:
“हाल्लेलुयाह!
किस कि प्रभु हें परमेश्वर सर्व शक्तिमान असा,
होर से राज कता।
7 एईए! अस खुशी मनान्ते, होर मज्जे कते,
त तसे गुणगान कते, किस कि किएऊ ब्याहे टेम एई गो असा,
त तसे दुल्हनa खरी ठाटि-ठुटि गो असी।
8 तस अब्बल त चिलकती मखमले झिणे डबण जे दुतो असी।”
ए अब्बल मखमले झिणे मतलब शुचे मेह्णु के धरमे कम असे।
9 तोउं स्वर्गेदूते मोउं जे बोलु, “लिख कि ‘धन्य असे से, जे किएऊ ब्याहे जे धामिए असे।’” फि तेन मोउं जे ई बि बोलु, “परमेश्वर केईआं अओ ए वचन सच भो।”
10 तोउं त, अउं तेस स्वर्गेदूते पूजा अराधना करण जे तसे खुरी पुठ उटेऊ बिश गा। पर तेन मोउं जे बोलु, “ईं ना कर, अउं त तें ईं त यीशु मसीहे उगाही देणे बाड़े तें एन्हि भाई के ईं यक सेवक भो। पूजा अराधना करीण असी त परमेश्वरेरी करे, किस कि भविष्य वाणि करणे खास मकसद यीशु मसीहे प्रचार भो।”
हच्छे घोड़े सवार
11 फि मेईं स्वर्ग खुला काआ, त हेरु कि यक हच्छा घोड़ा असा, त तेस पुठ यक सवार असा, जे यकीन लेएक त सच्चा बोलिन्ता। से धरम जोई न्याय त युद्ध कता। 12 तसे टीर आगी लौई ईं असे, त तसे मगरी पुठ सुआ मुकुट असे। तेस पुठ यक नओं लिखो असु, जे तेस छड़ दी कइ होर कोई ना जाणता। 13 तेन लहु अन्तर चुसिए झिणे डबो असे, त तसे नओं परमेश्वरे वचन असा। 14 स्वर्गे सेना अब्बल त चिलकते मखमले झिणे डबो, हच्छे घोड़ी पुठ सवार भोई कइ तेसे पता पता हंटते। 15 जाति जाति मेह्णु मारण जे तेसे मुंह केईआं यक टिखि तलवार निस्ती। से लोहिए लेउडे बइ तेन्हि पुठ राज कता।b से त सर्व शक्तिमान परमेश्वरे भयंकर कोपे बेलि तेन्के हाल रसकुन्न अन्तर दाख पिह्णे ईं कता। 16 तेसे झिणि त जंघि पुठ ए नओं लिखो असु:
“राजी के राजा त प्रभु के प्रभु।”
17 तोउं मेईं यक स्वर्गेदूत दिस पुठ खड़िए काआ। तेन लियारी दी कइ उडरणे बाड़े पखुरु जे बोलु, “एईए! परमेश्वरे बोडी धाम जे किठे भोई घिए। 18 ताकि तुस परमेश्वरे खिलाफ युद्ध करणे बाड़े राजी के, सेनापति के, ताकतवर मेह्णु के, घोड़ी त तेन्के सवारी के मासुं खाआल जे मर गो असे। मतलब कि अजाद त कि गुलाम, कि मठुड़ त कि बोडा, तुस सोबी के मासुं खाआल।”
19 तोउं मेईं से खतरनाक जानवर, त धरती राजे त तेन्के फौज, तेस घुड़सवार त तसे सेना जोई युद्ध करण जे किठे भुन्ते काए। 20 तोउं से खतरनाक जानवर त तेस जोई से झूठा भविष्य वक्ता बि टेइया, जे तेन्हि मेह्णु के समाणि होरे होरे निशाण हराल कइ भरमान्ताथ, जेन्हि पुठ तेस जानवरे छाप लगो थिए त जे तेसे मुर्तिपुजा कतेथ। ए दुहिए जीन्ते जी ईं तेस आगी टह्नु अन्तर फटाई छड़े, जे गन्धके बेलि जाती रेहन्ती। 21 जे मेह्णु बचो थिए, तेन्हि से घुड़सवार अपु आसी केआं निस्ती तलवारे बइ मारी छड़े त सोबी पखुरु तेन्के मासुं रज्जि कइ खउ।