परमेश्वरे कोपे सत कटोरे
(16:1-21)
परमेश्वरे कोपे सत कटोरे
16
1 तोउं मेईं देहेर अन्तर केसेरी अवाज जोरी जोई तेन्हि सतो स्वर्गेदूती जे ईं बोते शुणी, “घिए, परमेश्वरे कोपे सतो कटोरे धरती पुठ डोल छड़े!”2 तोउं पेहले स्वर्गेदूते घेई कइ अपु कटोरा धरती पुठ डोल छड़ा। तोउं जेन्हि मेह्णु पुठ तेस जानवरे छाप थिआ त जे तसे मुर्ति पूजा कतेथ, तेन्हि पुठ यक सुआ चिड़ंग देणे बाड़े त खतरनाक खेड़े भुए।a
3 दोके स्वर्गेदूते अपु कटोरा समन्दर अन्तर डोल छड़ा। त से मरो मेह्णु के लहुए ईं बण गा, त समन्दर अन्तर हर यक जीव मर गे।
4 टेके स्वर्गेदूते अपु कटोरा दरेउ त पुओणि सुजल अन्तर डोल छड़ा, त से लहु बण गे।b 5 तोउं मेईं पुओणि पुठ हक रखणे बाड़े स्वर्गेदूत ईं बोता शुणा:
“ए परमेश्वरा, तु जे शुचा असा, होर जे थिआ त जे असा,
ई सोब कर कइ तेईं न्याय किओ असा;
6 किस कि तेन्हि तुं शुचे मेह्णु त तुं भविष्य वक्ती के लहु बोहाओ थिउ,
त तेईं तेन्हि लहु पिआउ।
जेसे जीं करणी, तेसे तीं भरणी भुन्ति।”
7 फि मेईं कुण्ड केआं ईं अवाज शुणी: “आं, ए सर्व शक्तिमान प्रभु परमेश्वरा, तें फैंसले सही त सच्चे असे।”
8 चौंथु स्वर्गेदूते अपु कटोरा दिस पुठ डोल छड़ा, त दिस मेह्णु आगी बइ टड़ण लगा। 9 मेह्णु सुआ गरमी बइ भुरड़ी गे, त तेन्हि तेस परमेश्वरे नओएं बुराई की, जेस अन्हि बुखताई पुठ हक थिआ। तेन्हि पछताण ना आउ, होर परमेश्वरे गुणगान करुण ना चहा।
10 पन्जु स्वर्गेदूते अपु कटोरा तेस जानवरे सिंहासन पुठ डोल छड़ा, त तसे राज्य अन्हारा भोई गा। मेह्णु दुख तकलीफे बझई जोई दन्त कुरुड़ खाण लगे।c 11 अपु दुख तकलीफ त खेड़ी के बझई जोई मेह्णु स्वर्गे परमेश्वरे बुराई की, पर अपु अपु बुरे कमी के लिए पछताण ना चहु।
12 छटूं स्वर्गेदूते अपु कटोरा यूफ्रातेस नओएं बोडा दरेउ पुठ डोल छड़ा, त तसे पुओणि शुख गोउ, ताकि पूरबे कनारी राजी के सेना जे बथ बण घियेल।d 13 फि मेईं तेस राकसे मुंहे बइ, त तेस जानवरे मुंहे बइ, होर तेस झूठे भविष्य वक्ते मुंहे बइ टाई जुठी आत्मा मेंढकी के रूप अन्तर निस्ती काई। 14 ए निशाण हरालणे बाड़ी दुष्ट आत्मा भो, जे पूरे मतोके राजी केईं तोउं घेन्ति कि तेन्हि सर्व शक्तिमान परमेश्वरे खिलाफ तेस बोडे दने युद्धे लिए किठेरुं।
प्रभु यीशु बोता,
15 “हेरे, अउं चोरे ईं अजगता एन्ता;e
धन्य से असा जे खड़ खड़ बिश्ता,
त अपु झिणि के निगरानी कता कि नगे न हंटे,
त मेह्णु तेस नगे न हेरियेल।”
16 होर तेन्हि दुष्ट आत्माई मतोके राजे युद्ध करणे जे तेस जगाई किठेरे, जेस जे इब्रानी भाषा अन्तर हरमगिदोनf बोते।g
17 तोउं सतूं स्वर्गेदूते अपु कटोरा ब्यार पुठ डोल छड़ा, त देहरे सिंहासन केआं ईं बोडी अवाज आई, “भोई गोउ!” 18 तोउं बिजली चमकी, त मेघ गड़कुणे अवाज आई, त यक ईं भुंजल गा कि धरती पुठ मेह्णु बसण केआं पता, अपल तकर कदी अत बोडा भुंजल नेओथ गो। 19 एसे बेलिए तेस बोडे बेबीलोन शेहरे टाई टुकुड़ भोई गे, त जाति जाति के शेहर ढेई गे। ई कर कइ परमेश्वर तेस बोडे शेहरे बुराई लिए अपु लेहरी कटोरे केईआं पिआउ। 20 त हर यक टापु डूब गे, त फाटी के पता ई न चला।h 21 अम्बर केआं मेह्णु पुठ जे मणे मणे शरवाठे झड़े। ए बुखता सुआ बोडी भारी थी। मेह्णु शरवाठी के बुखताई के बझई जोई परमेश्वरे बुराई की।i