आत्मा परखिण
4
1 ए ट्यारेओ! हर यक जेईं पुठ विश्वास ना करे जे ईं बोते कि शुची आत्मा हें अन्तर असी। पर तेन्हि परखिण दिए कि से परमेश्वरे कनारा असे कि नेईं, किस कि मतोक अन्तर सुआ झूठे भविष्य वक्ता बणो असे। 2 तुस ईं कइ पता लाई बटते कि केसे आत्मा परमेश्वरे कनारा भो या ना भो। जे आत्मा मानती कि यीशु मसीह परमेश्वर केआं मनखे रूप नी कइ अओ असा, से आत्मा परमेश्वर केईआं भो। 3 होर जे आत्मा ई ना मानती, कि यीशु परमेश्वर केआं अओ असा; ए सेईंए मसीहे विरोधी आत्मा भो। एसे बारे ईं तुसी शुणो असु कि ए एणे लगो असी, त अभेईं बि इस मतोक अन्तर असी।4 ए गभुरुओ! तुस परमेश्वरे भिन्थ, त तुसी से झूठे भविष्य वक्ता हराई छोउ असे; किस कि जे परमेश्वर तुं अन्तर असा, से इस मतोक अन्तरी तेन्हि केआं बि बोडा असा। 5 से झूठे भविष्य वक्ते मतोके भिन्थ। तोउं त से मतोके चीजी के बोके कते होर मतोक बाड़े तेन्के शुणते। 6 अस परमेश्वरे भिन्थ। जे परमेश्वर जाणता, से हें शुणता; पर जे परमेश्वर ना जाणता, से हें ना शुणता। इसे बेलि अस परमेश्वरे आत्मा जे सच्चाई हरालती त शैताने आत्मा जे मेह्णु बेहकान्ति पिछाण बटते।
परमेश्वरे ईं असी परेम करण
7 ए ट्यारेओ! असी यक होरी परेम करण चहिए; किस कि परेम परमेश्वर केआं असा। जे कोउं परेम कता, से परमेश्वर केआं जमो असा त परमेश्वर जाणता। 8 जे परेम ना कता, से परमेश्वर ना जाणता किस कि परेम परमेश्वर केआं एन्ता। 9 जे परेम परमेश्वर असी जोई रखता, से ईं कइ प्रकट भुआ कि परमेश्वरे अपु इकलौता कुआ धरती पुठ लंघा, ताकि तसे बेलि असी अमर जीवन मेईंयाल। 10 ई नेईं कि अस परमेश्वर जोई परेम कते, बल्कि परेम त तेन असी जोई किआ, होर हें पापी के फल भुगतुण जे अपु कुआ लंघा ताकि असी माफी मेई बटियेल। 11 ए ट्यारेओ! किस कि परमेश्वरे असी जोई ईं परेम किओ असा, त असी बि यक होरी जोई परेम करण चहिए। 12 परमेश्वर कपल बि केनि नेईं काओ। पर अगर अस अपफ बुच परेम जोई बिशियेल, त परमेश्वर हें अन्तर बण बिश्ता, होर पूरे के पूरा असी तसे परेम मेई गो असा। 13 इसे बेलि पता लग घेन्ता कि अस तेस अन्तर त से हें अन्तर बण बिश्ता; किस कि तेन अपु आत्मा हेन्धे दुतो असी। 14 असी हेर छोउ त उगाह बि देन्ते कि बोउए अपु कुआ मनख बचाणे बाड़ा बणाई कइ लंघो असा। 15 जे कोउं ईं मान छता कि यीशु परमेश्वरे कुआ भो, त परमेश्वर तेस अन्तर, होर से परमेश्वर अन्तर बण बिश्ता। 16 जे परेम परमेश्वर असी जोई कता, तेस अस जाण गो असे त तेस परेम पुठ विश्वास बि कते। परेम परमेश्वर केआं एन्ता, होर जे होरी जोई परेम कता, से परमेश्वर जुए त परमेश्वर तेस जुए बण बिश्ता। 17 ईं कर कइ अगर असी परमेश्वरे पूरा परेम मेई गो असा त तेस न्याय करणे रोज हें हौसला भुन्ता; किस कि जीं परमेश्वर जुए जुड़ कइ मसीह जीआ, तिहांणि मतोक अन्तर अस बि परमेश्वर जुए जुड़ कइ जीन्ते। 18 परेम अन्तर डर ना भुन्ता, बल्कि सिद्ध परेम डर दूर कइ छता। किस कि जे डरता से सज्जा मेणे हेर डरता। तोउं त जे डरता, तस परमेश्वरे पूरा परेम नेईं मेओ। 19 अस परमेश्वर जोई त होरी जोई तोउं परेम कते, किस कि पेहले परमेश्वरे असी जोई परेम किआ। 20 अगर कोउं बोलियाल, “अउं परमेश्वर जोई परेम कता” होर अपु भाई भेणि हेर नफरत कता, त से झूठा असा। किस कि जेन विश्वासी से काओ असा अगर तेन्हि परेम ना कता त जे परमेश्वर तेन काओ बि नेईं तेस जोई कदी परेम ना कइ बटता। 21 तेस केआं असी ई निआंग मेओ असी कि जे कोउं परमेश्वर जोई परेम कता से अपु भाई भेणिओं जोई बि परेम करे।