हें मददगार, मसीह
2
1 ए में मठुड़ गभुरुओ! तुसी जे इन्हि बोकी अउं तोउं लिखता कि तुस पाप न करे; अगर कोउं पाप करियाल, त बोउ केईं विनती करण जे हें यक वकील असा, मतलब धर्मी यीशु मसीह। 2 ए सेईंए भो जेन हें पापी के लिए अपु भकत दिती। सद हेन्धेरी न, बल्कि पूरे मतोके पापी के लिए बि। 3 अगर अस तसे निआंग मानियेल त असी पक्का पता लगता कि असी से पिछाणो असे। 4 जे कोउं ईं बोता कि “अउं तेस जाणता” पर तसे निआंग न मानता, त से झूठा असा। होर तेस अन्तर सच्चाई नेईं। 5 पर जे कोउं तसे वचन मान कइ जीन्ता, सच्चे तेस अन्तर परमेश्वरे परेम एई गो असा। इसे बेलि असी पूरा पता लग घेन्ता कि अस तेस जुए जुड़ कइ असे। 6 जे कोउं ई बोता कि अउं तसे जोई जुड़ कइ असे, तेस लौतु कि से बि तिहांणि जीए जीं मसीह जीआ।नोई निआंग
7 ए ट्यारेओ! अउं तुसी जे कोई नोई नोई निआंग न लिखता, पर सेईंए पुराणि निआंग, जे तुसी शुरुवात केआं मेओ असी; ए पुराणि निआंग से समाचार भो जे तुसी शुणो असा। 8 तोउं बि अउं तुसी जे नोई निआंग लिखता। ए निआंग मसीहे अपु जीणे बेलि, होर तुसी अपु जिन्दगी अन्तर सही साबित किओ असे। किस कि अन्हारु मुकुण लगो असु त सच्ची टगड़ियार चमकुण लगो असी। 9 जे कोउं बोता कि अउं टगड़ियार अन्तर असा, होर विश्वासी हेर नफरत कता, त से अपल तकर अन्हारे अन्तर ईं असा। 10 जे कोउं विश्वासी जोई परेम कता से टगड़ियार अन्तर रेहन्ता, होर तेसे जिन्दगी अन्तर ईं कुछ नेईं जेसे बेलि होरी ठोकर लगियेल। 11 पर जे कोउं विश्वासी हेर नफरत कता से अन्हारे अन्तर असा त अन्हारे हंटता। तेस पता न लगता कि से को जे घेण लगो असा, किस कि अन्हारियारी तसे टीर अन्हे कइ छो असे।
12 ए में मठुड़ गभुरुओ! अउं तुसी जे तोउं लिखता कि
मसीहे बझई जुए तुं पाप माफ भोई गो असे।
13 ए स्याणेओ! अउं तुसी जे तोउं लिखता कि
जे शुरुवात केआं असा तुस तेस जाणते।
ए जवानों! अउं तुसी जे तोउं लिखता कि
तुस से दुष्ट शैतान केआं जीत गो असे।
ए गभुरुओ! अउं तुसी जे तोउं लिखता कि
तुसी बोउ पिछाण छड़ा।
14 ए स्याणेओ! अउं तुसी जे तोउं लिखता कि
जे शुरुवात केआं असा, से तुसी पिछाण छो असा।
ए जवानों! अउं तुसी जे तोउं लिखता कि
तुस ताकतवर असे,
त परमेश्वरे वचन तुसी अन्तर रेहन्ता,
त तुस तेस दुष्ट शैतान केआं जीत गो असे।
मतोक जोई परेम न करे
15 तुस मतोक त मतोके चीजी जोई परेम ना करे। अगर कोउं मतोक जोई परेम कता, त से स्वर्गे बोउ जोई परेम न कता। 16 किस कि जे मतोक अन्तर असु, मतलब जिसमे बुरी इच्छा, टीरी के लालच, त धने घमण्ड, ए सोब बोउए कनारा नेईं, बल्कि मतोके भो। 17 मतोक त तसे बुरे लालच दुहे खतम भोई घेन्ते, पर जे परमेश्वरे इच्छा पुठ हंटता से हमेशा रेहन्ता।
मसीहे दुश्माण
18 ए गभुरुओ! ई जुग खतम भुणे टेम भो। जीं तुसी शुणो असु कि मसीहे विरोधी एणे बाड़ा असा, मेल अभेईं बि सुआ मसीह विरोधी एई गो असे। एस केआं असी पता लगता कि ए अखिरि टेम भो। 19 से सम्हाई मसीह विरोधी हें बिचा निथे त सच्चे विश्वासी नेओथ। किस कि अगर से हें ईं सच्चे विश्वासी भुन्तेथ त असी जोई साते बिशतेथ। पर असी केईआं नश कइ तेन्हि ई हरालु कि से हें अपु नेओथ। 20 पर तेन शुचा परमेश्वरे तुन्धे रज्जि शुची आत्मा दुतो असी, त तुस सोब सच्चाई जाणते। 21 मेईं तुसी जे तोउं नेईं लिखो कि तुस सच्चाई ना जाणते। पर तोउं लिखो असु कि तेस जाणते। होर तुसी ई बि पता असा कि सच्चाई अन्तरा कदी झूठ ना निस्तु। 22 झूठा कोउं भो? सेईंए भो, जे यीशु “मसीह” भुणे इन्कार कता। मसीहे विरोधी सेईंए असा, जे परमपिता त तसे कुआ मसीह इन्कार कता। 23 जे कोउं कोईया इन्कार कता, तेस केईं बोउ बि नेईं। जे कुआ मानता, तेस केईं बोउ बि असा। 24 जे समाचार तुसी शुरुवात केआं शुणो असा, तेस तुस अपु मन अन्तर रखे। अगर से तुसी अन्तर रेहेल त तुस बि बोउ त कुआ जोई जुड़ कइ रेहन्ते। 25 होर जेस हेन्धे देण जे कोईये जुबान दुतो असी, से “अमर जीवन” भो।
26 मेईं ए बोके तुसी जे तेन्के बारे लिखो असी, जे तुसी बेहकान्ते। 27 पर मसीहे तुन्धे शुची आत्मा रज्जि दुतो असी, त से तुसी पुठ बणोरी रेहन्ती। त तुसी ई जरूरी नेईं कि कोउं तुसी शिचालियेल। से शुची आत्मा जे बि तुसी शिचालती, से सच्चु असु, त तेस अन्तर कोई झूठ नेईं। त जीं तेन तुसी शिचालो असु तीं तुस बि तेस मान कइ रिहे।
परमेश्वरे गभुर ईं जीण