यीशु चेली केईं पौलुस घेण
2
1 तोउं, चौधा साल बाद अउं त बर्नबास दुबारी यरुशलेम शेहर जे गे। इस फेरि हें साथी तीतुस बि अस अपफ जुए साते घिन गो थिए। 2 परमेश्वरे दुतो दर्शण बझई जुए ईं अउं ता जे गा। त अउं गैर यहूदी बुच जे खुश खबरी प्रचार कताथ, तसे बारे तठि सतसंगे मुखिया जे अकेले अन्तर बोलु। मोउं इ ठीक करण थी कि जेस खुश खबरी जे अउं एत कष्ट कता त दुख सेहन्ता, से बेकार ना लौती गओ। 3-5 हांलाकि कुछ मेह्णु थिए, जे जासुस ईं बण कइ असी जुए मिओ थिए। से मसीह यीशु अन्तर जे अजादी मेओ असी, तस हड़प कइ असी दुबारी यहूदी धरमे नियम मनुण जे कैद करण चहन्तेथ। पर, असी धिक भइ बि तेन्के बोक ना शुणी, ताकि खुश खबरी अन्तर जे सच्चाई असी, तस पुठ तुस सुसुर बिशियेल। तोउं त, यरुशलेम शेहर अन्तर जे जे मुखिया थिए, तेन्हि में साथी तीतुस, जे कि यक गैर यहूदीa असा, तसे बि खतना कराण जे कोई मांग ना रखी। 6 त ई सोब अन्तर, तेन मुखिये में शिक्षा अन्तर कुछ बि जोड़ ना बटु। चहे बेशक मेह्णु से जत बि इज्जत देणे लेएक समझे, मोउं कुछ फरक ना पड़ता, किस कि परमेश्वर कदी शुन हेर कइ कम ना कता। 7-8 पर तेन्हि मुखिये हेरे कि पतरसे बेलि जीं परमेश्वर बोडी ताकत जुए यहूदी मेह्णु बुच कम कता, तीं में बेलि बि गैर यहूदी बुच कम कता। त तेन्हि पता लग गा कि परमेश्वरे जीं पतरस जे यहूदी मेह्णु बुच खुश खबरी प्रचार करणे जे प्रतिनिधि बणो थिआ, तीं अउं बि गैर यहूदी मेह्णु बुच प्रचार करणे जे प्रतिनिधि बड़ो असा। 9 त मोउं जे परमेश्वरे दुतो कम समझ कइ याकूब, पतरसb त यूहन्ना, जे यरुशलेम शेहरे सतसंगे खास मुखिया थिए, बर्नबास त मोउं खुश खबरी प्रचार अन्तर अपु साथी माने त बोलु कि “तुस गैर यहूदी बुच घिए त अस यहूदी बुच घेन्ते।” 10 तेन्हि सद यके मांग रखो थी कि अस तेन्के गरीब मेह्णु याद रखे, जेस करण जे अउं बि तीं चहन्ताथ।पौलुस पतरसे विरोध करुण
11 पर जपल पतरस अन्ताकिया शेहरc ओ थिआ, त मेईं तसे विरोध किआ, किस कि से गलत थिआ। 12 भु ईं कि याकूब लंघो कुछ यहूदी विश्वासी एणे पेहले पतरस गैर यहूदी विश्वासी जुए बिश कइ खांताथ पीन्ताथ; पर जपल से पुजे, जे बोतेथ कि बचुण जे खतना करण जरूरी असा, त से तेन्हि हेर कइ अपफ बखरा बिशा। 13 तेस हेर कइ होरे यहूदी विश्वासी तसे ईं ढंग करण लगे। बर्नबास बि तेसे जाल अन्तर फस गा। 14 त जपल मेईं हेरु कि से सम्हाई खुश खबरी सच्चाई हेसाब जुए नेईं हंटण नेईं लगो त मेईं सम्हाई के सम्हाणि पतरस जे बोलु, “अगर तुस यहूदी भोई कइ बि यहूदी रीति रिवाज ना मानते, त कीं कइ गैर यहूदी जे यहूदी रीति रिवाज मनण जे जोर देन्ते?”
यीशु मसीह पुठ विश्वास करणे बेलि बचुण
15-16 असी ईं पता असा कि कोई बि मेह्णु मूसे दुतो नियम मानणे कोशिश कर कइ बच ना बटता, बल्कि सिर्फ यीशु मसीह पुठ विश्वास करणे बेलि बचता। अस त यहूदी असे, होर से गैर यहूदी ईं नेईं जेन्हि अस जमते घड़ी केआं पापी समझते। फि बि असी अपफ यीशु मसीह पुठ विश्वास किआ, ताकि अस नियम मानणे कोशिश करणे बेलि ना, पर मसीह पुठ विश्वास करणे बेलि धर्मी बणियेल, किस कि कोई बि अपु कोशिशे बेलि धर्मी ना बणता। 17 मसीह पुठ विश्वास कर कइ अस धर्मी बणुण चहन्ते। पर अगर अस अपफ पाप कते रेहन्ते त कि मसीह असी पापी बणान्ता ना? कदी ना! 18 पर आं! बचुण जे अगर अउं तेस नियम दुबारी मनण लगाल जे मेईं छड़ दुतो थिए, त अउं हरालता कि मेईं पाप किओ थिआ। 19 पेहले पेहले त मेईं मूसा दुतो नियम मान कइ धर्मी भुणे भरपूर कोशिश की, पर में बेलि भु नउ त अउं मरणे दोषी बण गा। त धर्मी भुण जे अभेईं अउं अपफ पुठ ना बल्कि मसीह पुठ भरोसा कता त परमेश्वर जे जीन्ता। 20 में सम्हाई पुराणे गुण त चाल चलण मसीह जुए क्रूस पुठ ढनाई गो असे त अभेईं अउं नेईं, पर मसीह में अन्तर जीण लगो असा। आं, अउं जरूर जीन्ता, पर परमेश्वरे कुआ, मसीह पुठ विश्वास कर कइ जीन्ता, जेन मोउं जोई तीं परेम किआ त मोउं बचाण जे अपफ भकत दिती। 21 त अउं परमेश्वरे इस दाह बेकार घेण ना देन्ता। किस कि अगर नियम मानणे बेलि अउं धर्मी बणताथ, त मसीह मरुण जरूरी नेओथ।