मसीहे सेवक: पौलुस त अपोलुस
3
1 पर, ए में ट्यारेओ! पेहले पेहले मेईं तुसी जुए तेसे ईं बोक ना कइ बटी, जीं विश्वास अन्तर पक्के मेह्णु जुए बोक करिए लौती। बल्कि मेईं त तुसी जुए मठुड़ गभुर के ईं बोक की, किस कि तुस मसीह पुठ विश्वास करण अन्तर गभुर ईं थिए। 2 तोउं त, जीं गभुर केआं सद दुध पिआन्ते त होरु कुछ ना देन्ते, तीं मेईं तुसी सिधि बोक शिचाली किस कि तपल तुस ओखी बोक समझ ना बटतेथ, त अभेईं बि ना समझते, 3 किस कि अभेईं तकर तुस अपु जिसमे इच्छाई मुताविक जीणे बाड़े असे। अगर तुसी बुछ जड़ुण, त झगड़ीण भुओल त की तुस जिसमे हेसाब जुए ना जीन्ते ना? तुस त मतोके मेह्णु के ईं असे। 4 तुं बुछ जपल कोई बोता कि “अउं पौलुसे चेला भो” त होरा बोता, “अउं अपोलुसे भो” त कि तुं नीत मतोके मेह्णु के ईं नेईं ना?a 5 मोउं बस बताण दिए कि अपोलुस कोउं भो? त पौलुस कोउं भो? से त बस सेवक भिन्थ। त जीं प्रभु ठीक किओ थिउ, तीं तेन्के बेलि तुसी मसीह पुठ विश्वास किआ। 6 मेईं बिएजु बाउ, अपोलुसे कुलरेई, पर परमेश्वरे से लुंगाण कइ बोडु किउ। 7 त ना बिएजु बाणे बाड़ा, होर ना कुलरेणे बाड़ा बोडा भो, बल्कि परमेश्वर बोडा भो, जे तेन्हि बोडेरता। 8 जेन बिएजु बाउ त जेन कुलरेई, से दुहिए बराबर असे त तेन्के कमे हेसाब जुए परमेश्वर तेन्के धे मुल देन्ता। 9 परमेश्वरे सेवा अन्तर अस साथी असे त तुस परमेश्वरे बगे ईं भो त तसे गी भो।10 परमेश्वरे अपु बोके मेह्णु शिचालणे जे वर मेन्धे दुतो असा, तसे बेलि जीं अब्बल मिस्त्री खाई देन्ता तीं मेईं बि मेह्णु शिचाल कइ विश्वासे खाई दुतो असी। त होरा जेईं तेस पुठ चणाई करण लगो असा। पर हर यक मेह्णु चलाकी जुए बिशे, कि से तेस पुठ की चणाई कता। 11 किस कि जे खाई मेईं दुतो असी, से यीशु मसीह भो। होर कोई जेईं बि तसे ईं दोकी खाई बड़ाईए ना बटता। 12 कुछ मेह्णु एस खाई पुठ सुन्ने, चन्नी, हीरा मोतीb चणाई कते, त होर कुछ कठोड़े, भुजोठे, कंगिशिc चणाई कते। 13 पर यीशु मसीहे एणे रोज से सोब सामणि एई घेन्ते, त हर यक मेह्णु कम केई घेन्तु। से रोज आगे बेलिए सामणि एन्ता त हर यक जेईं के कम परखता कि कीं असु। 14 अगर आग अन्तर तेस खाई पुठ केसे मेह्णु कम न टड़ते त तेस तढ़ि फल मेता। 15 अगर केसे मेह्णु कम तेस आग अन्तर जाई कइ पटास भोई घेन्तु, त तेस नुकसान भुगतुण एन्ता। पर से अपफ बच घेन्ता जीं कोई आग शचो गी केआं टड़ते टड़ते बाहर निस्ते।
16 त कि तुस न जाणते ना कि तुस सोब परमेश्वरे देहेर भो, त परमेश्वरे आत्मा तुं अन्तर भुन्ति?d 17 अगर जे कोउं परमेश्वरे देहेर बरबाद करियेल त परमेश्वर तेस मुकाई छता; किस कि परमेश्वरे देहेर शुचा असा, त से तुस भो। 18 अपु मन अन्तर कोई गलतफेमि न रखे। अगर तुसी अन्तरा कोउं जेईं इस मतोक अन्तर अपु अपफ चलाक समझता, त तस सुआ सिधा बण कइ बिशण चहिए, ताकि परमेश्वरे अगर अक्लदार बण घियेल। 19 धरमे कताब अन्तर लिखो असु,
“परमेश्वर चलाक मेह्णु तेन्के चलाकी अन्तर फसाई छान्ता”e
“प्रभु जाणता कि अक्लदार के ज्ञान बेकार असा।”f