पौलुस यरुशलेम शेहर घेण केआं ना डरुण
21
1 तेन्हि जे आबिश कर कइ जपल असी जहाजे सफर शुरु किआ त अस सिधे बते बइ कोस नओएं टापु पुठ गे। त दोके रोजे रुदस नओएं टापु, त तठिआ पतरा नओएं शेहर पुजे। 2 तठि असी फीनीकेa इलाके जे घेणे बाड़ा यक जहाज मेईंया त तेस पुठ चढ़े, होर घेण लगे। 3 कुप्रस टापु केण केआं पता, तसे बउंए कनारी बइ घेई कइ सीरिया राज्य जे घेण लगे। तोउं सूर शेहर निथे; किस कि तठि जहाजे माल उतारण थिआ। 4 तठि असी विश्वासी तोपे। जपल से मेईंए त तठि तेन्हि जोई सत रोज बिशे। शुची आत्माई बेलि जाण कइ कि यरुशलेम शेहरे मेह्णु पौलुस भुंजान्ते, तेन्हि पौलुस यरुशलेम शेहर ना घेण जे बोलु। 5 तठिआ घेणे टेम जपल आ, त अस तठिआ घेण लगे। होर तेन्हि सोबी जेईं, जुएली त गभुरु समेत अस शेहर केआं बाहर तकर पुजाए। तोउं असी औत पुठ उटेऊ बिश कइ प्रार्थना की। 6 त यक होरी जे आबिश कर कइ अस जहाज पुठ चढ़ गे, होर से अपु अपु गी जे घेई गे।7 तोउं अस सूर शेहर केआं घेई कइ पतलमियासb बंदरगाह पुजे। तठियाणि विश्वासी भाई भेणि जोई मिए त यक रोज तेन्हि जोई साते बिशे। 8 दोके रोजे अस तठिआ घेई कइ कैसरियाc शेहर जे आए, होर खुश खबरी प्रचार करणे बाड़ा फिलिप्पुसे गी बिशे। से यरुशलेमे तेन्हि “सतोही चुणो सेवकी”d बुचा यक थिआ। 9 तसे चोउर कुवांरी कुई थी, जे भविष्य वाणि कतीथ।
10 तठि बिशो असी जपल केहि रोज भोई गे, त अगबुस नओएं यक भविष्य वक्ता यहूदिया राज्य केआं आ। 11 तेन हें भेएड़ एई कइ पौलुसे मझीन नीउ, त अपु हथ खुर बन्हि कइ बोलु, “शुची आत्मा ईं बोती कि जेस मेह्णु ई मझीन भो, तेस यरुशलेम शेहर अन्तर यहूदी मेह्णु इहांणि बन्हते, त गैर यहूदी मेह्णु के हवाले कते।” 12 जपल असी ईं बोके शुणी, त असी होर तठियाणि विश्वासी मेह्णु पौलुस तीं छनेअरे कर कइ समझा कि यरुशलेम शेहर न घेण। 13 पर पौलुसे जवाब दिता, “ईं रोल रोल कइ तुस में काजा टुकड़ेरण किस लगो असे? अउं त प्रभु यीशु नओएं लिए यरुशलेम शेहर अन्तर न सद कैद भुण जे, बल्कि मरण जे बि तेयार असा।” 14 जिखेईं अस तेस मनाई ना बटा त ईं बोल कइ चुप बिश गे कि “प्रभु इच्छा पूरी लौती भो।” 15 तढ़िया पता, असी तेयारी की त यरुशलेम शेहर जे घेई गे। 16 कैसरिया शेहर केआं बि कुछ विश्वासी असी जोई साते आए। यरुशलेम शेहर अन्तर अस मनासोन नओएं कुप्रस टापु यक पुराणे विश्वासी गी अण्ह छड़े कि अस तसे गी बिशियेल।
पौलुस याकूब जोई मीण
17 जपल अस यरुशलेम शेहर पुजे, त विश्वासी भाई भेणि सुआ खुश भोई कइ हें आबिश किउ। 18 दोके रोजे पौलुस असी जोई साते यरुशलेम सतसंगे मुखिया याकूबे गी गा। तठि होरे सोब सतसंगे स्याणे कठे थिए। 19 तोउं पौलुसे तेन्हि जे नमस्ते किउ, होर जे जे कम परमेश्वरे तसे सेवाई बेलिए गैर यहूदी मेह्णु बुछ किओ थिए, यक यक कर कइ सोब तेन्हि जे बताए। 20 तेन्हि ईं शुण कइ परमेश्वरे गुणगान किआ, तोउं तेस जे बोलु, “ए भाई, तु अपफ हेरता कि यहूदी मेह्णु अन्तरा हजारों मेह्णु विश्वास किओ असा; होर से सोब मूसे लिखो नियमे लिए मस्त असे। 21 तेन्हि तें बारे उफाह शुणो असी कि तेईं गैर यहूदी मेह्णु बुछ बिशणे बाड़ी यहूदी मेह्णु जे शिचालो असु कि ‘मूसे दुतो नियम मनण छड़ दिए। तुसी ना अपु गभुरु के खतना कराण, होर ना तेन्हि पुराणि रीत जोई चलुण।’ 22 त अब की करुण? किस कि मेह्णु जरूर पता लग घेन्ता कि तु इठि अओ असा। 23 तोउं त, जे अस बोते, तस मनीण दे। हेर, हें इठि चोउर मड़द असे, जेन्हि कान्छा मगो असी। 24 एन्हि साते नी कइ तु अपु अपफ शुचेरीण दे; त एन्हि जे खर्चा बि दे कि से अपु भकत चढ़ाल त अपु मगरी कोर दियेल। ईं करणे बेलि तेन्हि सोबी पता लग घेन्ता कि जे बोके तेन्हि तें बारे शुणो असी, से सच्ची नेईं। पर तु अपफ बि नियम मानता त तिहांणि जीन्ता। 25 होर तेन्हि गैर यहूदी विश्वासी मेह्णु के बारे बोक ईं असी कि असी ई फैसला नी कइ लिख कइ लंघाओ असु कि
तुस मुर्ति केईं भकत चढ़ो जानवरी के मासुं ना खाए,
लहु ना खाए, ना पिए,
कियाड़ी केआं घोप कइ मरो जानवरी के मासुं ना खाए
त लछबन भुण केआं दूर बिशे।”
26 त पौलुस तेन्हि मेह्णु घिन गा, त दोके रोजे अपफ शुचा करण जे तेन्हि चोउर मेह्णु जोई साते देहेर अन्तर गा, त शुचा भुणे सत रोज कपल पूरे भुन्ते, त तेन्हि चोउर जेईं जे भकत कपल चढ़ान्ते, तेस बारे तठि बोल छउ।
देहेर अन्तर पौलुस टाण
27 जपल से सत रोज पुरीणे बाड़े थिए, त एशिया इलाके यहूदी मेह्णु पौलुस देहेर अन्तर काआ त हुसुड़ा उकसा त तेन्हि से टाइ छड़ा, 28 होर हुशेरि दी दी कइ बोलु, “ए इस्राएली मेह्णुओ! मदत करे; ए सेईंए मेह्णु भो, जे हें जाति, हें नियमे त इस देहरे खिलाफ हर जगाई सोबी मेह्णु शिचालता। एन त हद कइ छइ कि गैर यहूदी मेह्णु बि देहेर अन्तर अण्ह कइ ई शुची जगाह बि जुठी कइ छड़ी।” 29 इस केआं पेहले, तेन्हि इफिसुस शेहरे भाई त्रुफिमुस तेस जोई साते शेहर अन्तर काओ थिआ। तोउं त, तेन्हि गलत समझु कि पौलुस जरूर तेस देहेर अन्तर घिन गो भोल। पर से नेओथ नीओ। 30 त पूरे शेहर अन्तर हल्ला भोई गा, त चोहरो कनारा दौड़ी कइ मेह्णु कठे भोई गे त तेन्हि पौलुस ढीड़ कइ देहरा बाहर अण्हा। त तिखेईंए देहरे दुआर बन्न कइ छड़े। 31 से तेस मारणे बाड़े थिए कि रोमी सेनापति केईं जवाब पूज गोउ कि पूरे यरुशलेम शेहर अन्तर हल्ला भो असा। 32 त तिखेईंए से सपाही त सुबेदारे जोई साते दौड़ कइ तेन्हि केईं पुजा। जपल तेन्हि सेनापति, होर सपाही काए, त पौलुस मडण केआं रुक गे। 33 तोउं सेनापति भेएड़ एई कइ से टाइ छड़ा; त दुई शंकीड़ी बइ बन्हणे निआंग दी कइ पुछुण लगा, “ए कोउं भो त एन की किओ असु?” 34 पर हसुड़े अन्तर कोउं की त कोउं की हुशेरि देन्ते रिहे। जपल हल्ले अन्तर तेस सुसुर पता न लगा, त तेन तेस किले अन्तर नेणे निआंग दिती। 35 जपल पौलुस पौड़ी केईं पुजा, त हसुड़े केईआं खतरा हेर कइ सपाही से कल्हाई कइ नेण आ। 36 किस कि “एसे अन्त कइ छड़े। अन्त कइ छड़े” हुशेरि देन्ते मेह्णु के हुसुड़ा तसे पता पता अओ थिआ। 37 जपल सपाही पौलुस किले अन्तर नेणे बाड़े थिए, त तेन सेनापति जे यूनानी भाषा अन्तर बोलु, “महाराज! कि अउं तोउ जे कुछ बोल सकता ना?” तेन शवान भोई कइ बोलु, “तु यूनानी भाषा जाणता ना? 38 कि तु सेईंए मिस्री मेह्णु न भो ना, जे कुछ टेम पेहले बगावत कर कइ, चोउर हजार कटार रखणे बाड़ी अरुणि धार अन्तर घिन गा?” 39 पौलुसे बोलु, “ना महाराज, अउं से ना भो! अउं त यक यहूदी मेह्णु भो! त अउं किलिकिया इलाके सुआ खास तरसुस शेहर अन्तर बिशणे बाड़ा भो। अउं तें छने कता कि मोउं हुसुड़े जोई बोक करण दे।” 40 जपल सेनापति राजि भुआ त पौलुसे पौड़ी पुठ खड़ भोई कइ मेह्णु जे हथे बइ भाश की। जपल से सोब चुप भोई गे त से इब्रानी भाषा अन्तर बोलुण लगा: