चुसुणे बाड़ा यूहन्ना अपु कम शुरु करण
3
1 तेन्हि दिनि चुसुणे बाड़ा यूहन्ना यहूदिया राज्ये अरुणि धार अन्तर एई कइ प्रचार करण लगा, 2 “शुणे, शुणे! तुस अपु अपु मन बदलीण दिए, किस कि स्वर्गे राज्यa नीड़ा एई गो असा।”b 3 ए सेईंए भो जेसे बारे यशायाह भविष्य वक्ते पेहलाई बोलो थिउ“अरुणि धार अन्तर कोई हक देण लगो असा,
कि प्रभु जे बथ बणाण दिए त तसे बथ सुसुर कइ बड़ाए।”c
4 यूहन्ना ऊंटी के ऊनि के बड़ाउओ झिणे डबताथ, त छोड़ी मझीन पिड़ताथ। से टठ त जंगले मखीर खांताथ। 5 तोउं यरुशलेम शेहर, यहूदिया राज्य त यरदन दरेउए औत-कोती बइ सोब जगाई मेह्णु तसे भेएड़ एई गे। 6 तेन्हि सोबी अपु अपु पाप मने त यूहन्ने से यरदन दरेउ अन्तर चुसे। 7 जिखेईं तेन सुआ फरीसी त सदूकीd चुसीण जे एन्ते काए त तेन्हि जे बोलु, “ए जहरिले कीड़ी के गभुरुओ! तुस बि इरुह किस परमेश्वरे एणे बाड़ी लेहेर केईआं बचणे कोशिश करण लगो असे? 8 घेई कइ ईं कम करे जेसे बेलि पता लगाल कि तुसी सच्चे बि अपु मन बदलो असे। 9 तुस अपु अपु मन अन्तर ईं न सोचे कि ‘हें बोउ अब्राहम भो’e त असी मन बदलुणे कोई जरूरत नेईं; किस कि अउं तुसी जे बोता कि परमेश्वर अब्राहम जे घोड़ी अन्तरा बि गभुर किढ़ बटता। 10 हेरे! अभेईं बि झेउठ बुटे जील रख छो असा, ताकि जे बि बुटा खरा फल न देन्ता तेस काट कइ आग अन्तर छइ छते।”f
11 “शुणे, किस कि तुसी अपु मन बदलो असे त अउं तुसी पाणि अन्तर चुसुण लगो असा। पर जे मोउं केआं पता एन्ता, से मोउं केआं बि ताकतवर असा। अउं त तसे प्युले टाणे लेएक बि नेईं। से तुसी शुची आत्मा त आगी अन्तर चुसता। 12 तसे फटण तसे हतेउ असु। से अपु खला सुसुर साफ कता, त अपु अनाज केंचार अन्तर कठेरता। पर जे कऊ असा तेस आग अन्तर छता, जे कदी न हुशती।”
यूहन्ने यीशु चुसुण
13 तेस टेम यीशु गलील राज्य केआं यरदन दरेउ बन्ने आ, ताकि यूहन्ना तस पाणि अन्तर चुसे। 14 पर यूहन्ना तेस जे बोलुण लगा कि “मोउं तुसी केईं चुसीण जे एण चहिए। पर तुस मोउं केईं कीं ओ असे?” 15 यीशु तेस जे जवाब दिता, “अब त इहांणि भुण दे, किस कि असी इहांणि रीति रिवाज जोई धरम पूरा करण ठीक असा।” 16 तोउं यीशु चुसी कइ झट पोण अन्तरा बाहर एई गा। त तसे पुठे अम्बर पूरा खुल गा। तोउं तेन परमेश्वरे आत्मा अलणी वेश अन्तर अपु पुठे एन्ते काई। 17 तोउं अम्बर केआं ईं अवाज भुई कि “ए में ट्यारा कुआ भो, जेस हेर अउं सुआ खुश असा।”g