इपीसूस तो सरग दूतूग काबेर
2
1 आरू आनातले ओड आनीन ईटे पोक्केड:
इपीसूस गेड़े ती मेन्डान,
पोरबून बिसवात चाजूरान मान्देत सरग दूतूग ई काबेरीन लिक:
वेला केय्य ती सात गोटा चुक्केलीन पात्ती किली,
दियेल मान्डाकतान सात गोटा कोमेलीन नाड़बूल चुरलूरानेडीन पोद्दूल ईव आय:
2 आन ईन चाजूरान कामीन आरू मोयमोतीन आरू ईन दिरजे ती सामालतानोन पुट्टेन;
आरू ईन कियाल तो लोगीन सामालूक मेन्न चाजाता आरू तामीन तामी पोरबू नीतीकतानेर आय एन्डानेर मेरचीकतान पाटेलीन ईन पोरकी किली ओर टेगरानेर एनी चोमजोत।
3 ईन दिरजे ती सामालूकमोत,
आरू आन्न पिदीरीन चेत्तूग आबोड़ बेट-बेटी पान्डाता।
4 एरोड आनूंग इन विरूद ती ई पाटा मेन्डा:
ईन मुन्नी आनीन चोग चाजूरान आकाट एपोट चाजाता।
5 आदूगी ईन मापोरबून चोग चाजूरान तीग आरे गूचोत नात?
आदीन चुरता चाज,
आरू मेन्नीन उजराक आरू मुन्नीत आकाट चोग चाज।
एरोड ईन मेन्नीन उजराकपाकोड,
आन इन लेग्गाट वेरी किली इन दियेल मान्डाकतान कोमेन आद मेन्डान कान तीग गुचाकतान।a
6 एरोड ईन निकूलाई देरोमb ती चेलानेरीन कामूलीन मेन्न चाजाता।
ई पाटा इन्नोत रेच्चाट आय।
आवीन आन बेले मेन्न चाजाना।
7 एरूग केकोचील मेन्डाव ओर मापोरबून जियोम पोरबून बिसवात चाजूरान मान्देल तो लोगूग पोकरानोन केकोचील ओनी वेनूर।
एड चेयतानीन आराकताड,
cd ओनूग आन मापोरबून पार्र ती मेन्डान,
जुग-जुग तो जियोम चियरान मेर तो पाल्लीन तिनूंग चियरान।e
इसमूरनेत सरग दूतूग काबेर
8 इसमूरना गेड़े ती मेन्डान पोरबून बिसवात चाजूरान मान्देत सरग दूतूग ई काबेरीन लिक:
एड मुरतेड आरू चेरा-चेरीतेड आय,
आरू एड चाय्यी मेन्डीड आरू एपोर जियोम पाट्टेड नाड,
ओड ईटे पोकूमेड:
9 आन ईन सताक एरमोत आरू गेरीबी मेन्डात एनी पुट्टेन।
(एरोड ईन आन्न नेंजेर ती सावकार आय।
f) तामीन तामी एऊदीकूल एन्डानेर चेत्ते एऊदीकूल चिल्लार;
g एरोड ओर चेयतानीन मान्देतेर आय।
ओर इनीन निन्दरूरानोन बेले आन पुट्टेन।
10 इनूंग एर्रान सतावूलूग ईन नारचूमेन।
इद चूड़!
चेयतान इम कान तीग ओदेरीन पोरकू जेल ती केडूक कानता;
आरू इमूंग देस दिनेल आर्रेh सतावूल बेटू लागूरा।
चाय्यारे चेत्त पातीयाक मेट्टोत एरोड आन इनूंग जुग-जुग तो जियोमीन तुरेयीनi आकाट तुन्दीकतान।
11 एरूग केकोचील मेन्डाव ओर मापोरबून जियोम,
पोरबून बिसवात चाजूरान मान्देल तो लोगूग पोकरानोन केकोचील ओनी वेनूर।
एड चेयतानीन आराकताड,
ओनूग दुसेर चाय्यकूडj तीग नोकसान एराया।
पीरगमून तो सरग दूतूग काबेर
12 पीरगमून गेड़ेत सरग दूतूग ई काबेरीन लिक:
इकलाट-आकलाट वान्डूल तो निक्के वान्ड मेन्डान कान्डेन पात्ती मेन्डानेडीन पोद्दूल ईव आय:
13 ईन चेयतानीन राज गाद्दी मेन्डान कान मेन्डात एनी आन पुट्टेन।
एरोड बेले ईन आन्न पिदीरीन पातीयाकतान ती मोंजीबूत मेन्डात आरू आन बिसवात चाजूरान बातेर तो गोवाईतेड अनतीपासीन,
इन नाड़बूल आनकीकतान वादेक बेले,
ईन आनीन बिसवात चाजू चायोता।
ओनीन आनकीकतान पाड ती चेयतान डेरा मेन्डा।
14 एरोड आनूंग इन विरूद ती ओदो पाटेल मेन्डाव।
एटे एनोड इन कान ओदेर बिलाम मेनगा मेरचीकतानोन मानूरानेर बेले मेन्डार।
ओडी आय बालाक कोसीन,
“ईन इसराएली लोगीन पापदेरोम चाजपीक,
मुरीतूलूग चोत्तीकतान बानीलीन तिनूंग आरू दारीयाट कामूल चाजू लालेच टोटीक” एनी उवाट पोक चिञ्ञेड।k
15 आटनी इन कान बेले ओदेर मेन्डार ओर निकूलाई देरोम तो पाटेलीन पातीयाकमेर।
16 आदूगी मेन्नीन उजराक चिलाड आन इन लेग्गाट जेटके नी वेरी किली आन्न चोन्ड तीग पेतान कान्डेन आकाट तो पोद्दोड लेड़रान।l
17 एरूग केकोचील मेन्डाव ओर मापोरबून जियोम पोरबून बिसवात चाजूरान मान्देल तो लोगूग पोकरानोन केकोचील ओनी वेनूर।
एड चेयतानीन आराकताड,
ओनूग आन ओदो पाकीक मेन्डान मन्नेनm चियरान आरू ओनूग ओक विल केल्लn बेले चियरान।
आरू आ केल्ल ती ओक पुन पिदीर गोदूरानो मेन्डा;
o आदीन आ केल्लीन बेटूरान लोगीन चायी आवूर एडी पूनार।
तुवातीरेत सरग दूतूग काबेर
18 तुआतीरा गेड़े ती मेन्डान पोरबून बिसवात चाजूरान मान्देत सरग दूतूग ई काबेरीन लिक:
किच रेगीन आकाट बोम्मेल आरू रेग रेगूरान पीतेलीन आकाट केलूल मेन्डान मापोरबून चिन्डीन पोद्दूल ईव आय:
19 आन इन कामूलीन,
चोगीन,
बिसवातीन,
सेवेन आरू ईन दिरजे ती सामालतानोन पुट्टेन आरू इन पिटतेल तो कामूल मुन्नीत कामूल ले आगेर तोव आय एनी बेले आन पुट्टेन।
20 एरोड आनूंग इन विरूद ती ई पाटा मेन्डा:
ईन तानीन तानी,
आन मापोरबून कान तीग काबेर वेन्नी किली लोगीन पोक चियरान गुरू आय एनी टेगरान आयाल इजेबेलीन सामालूकमोत।
आद एके आन्न कामीयालेरीन दारीयाट कामूल चाजू आरू मुरीतूलूग चोत्तीकतान बानीलीन तिनूंग मेरचीक किली ओरीन आन्न पाव तीग बुलकाकमो।
21 आन आद,
तान्न मेन्नीन उजराकपोको एनी बेरा चिञ्ञेन,
एरोड आद तान्न दारीयाट कामूलीन चायू,
मेन्नीन उजराकपाना एन्डू।
22 इद चूड़!
आन आदीन बेमार ती पाटतीकतान;
आरू एड आदीनोड दारीयाट काम चाजूरार ओर बेले आदीन आकाट दारीयाट कामूलीन चाजूरान तीग मेन्नीन उजराकपाकोड,
आन ओरीन निक्के डेन्ड ती पाटतीकतान।
23 आन आदीन चेलालेरीन चाय्यीकतान;
तेबे लोगीन मेन्नीन आरू गेरोब तो बिचारूलीन पोरकूरानेन आनी आय एनी पोरबून बिसवात चाजूरान जाम्मा मान्देल तो लोग पुन्दार।
आनी इम कान तीग जाम्मेगी ताम्म कामूल इसाब ती पालटा चियरान।
24 एरोड तुआतीरेत बाकी लोगीन,
एंगोट लोग ई पाटेलीन पातीयाकपोरा आरू चेयतानीन गिड़ीयाट इसाबूल तो पाटेल एन्डार जे?
आवीन मेरीयोरा,
ओरीन आन पोकरानो इद्दी आय:
इमीन मारी बेले नियोमूल पुच्ची किली आगेर बोजा काञपीकपाना एनमेन।
25 एरोड इमूंग मेन्डान बिसवातीन पात्ती मेनूर।
26 आरू एड आन्न कामूलीन चेरा-चेरी आर्रे चाज-चाजी मेन्नी किली,
चेयतानीन आराकताड,
आन ओनूग देचेल-देचेल तो लोगीन चेलाकतान पान्नीन चियरान।
27 ओड लोवेत बाड़याp पात्ती किली किन्डीक बेले लोगीन पोडे जियोम नोयपीकपाका,
केरमा गोटोक एराका आंगरूराड।
आरू कुमाल तूक तो टान्डीलीन बिलाकतान आकाट ओड ओरीन नाचाकताड।
q आटनीत पान्नीन आन आन्न बुवेन तीग बेटेन नान।
28 आरू ओड जीतेड एन्डानोन टोटीक,
आन ओनूग पोकात चुक्केन चियरान।r
29 एरूग केकोचील मेन्डाव ओर मापोरबून जियोम,
पोरबून बिसवात चाजूरान मान्देल तो लोगूग पोकरानोन केकोचील ओनी वेनूर।