एऊनेग
पारगाक एर्रान पाटा
ईसून कान तीग मापोरबू पारगाकतान पाटा
1
1 इद ईसू मसीयालीन कान तीग मापोरबू पारगाकतान पाटा आय:
मापोरबू तान जेटके नी चाजपीकतान इसाबूलीनa ईसू मसीयाल तान्न कामीयालेरीन टोटीकपेकेड एनी ओनूग चिञ्ञेड।
ऊड आदीन तान्न सरग दूतीन चोटची किली तान्न कामीयाल एऊनेग पारगाकतेड।
2 एऊना तान चूड़ी मेन्डान जाम्मा पाटेल तो इसाब ती गोवाईतेड एरी किली चेत्त-चेत्त लिकेड।
आ पाटेल नातो आय एनोड:
मापोरबून पोद्द आरू ईसू मसीयालीन चेत्त पाटा आय।
3 मापोरबून कान तीग एर्रान ई पाटेलीन पोरबून बिसवात चाजूरान मान्देन मुन्देल जोड़ ती पोड़रानेर आरू वेनदानेर आरू इना लिकी मेन्डान पाटेलीन पातीयाकतानेर आसतीरीन बेटूरार।
एटे एनोड इना लिकी मेन्डान पाटेल पूरा एर्रान बेरा एदोतो ना।
पोरबून बिसवात चाजूरान मान्देल तो लोगीन जुवारतानो
4-5 एऊनेन टिटाक तीग आसीया देचे ती मेन्डान,
पोरबून बिसवात चाजूरान सात गोटा मान्देल bतो लोगूग लिकूरान चिट्टी:
मापोरबू एबे मेन्डानेड आय;
ओड मुन्नीत ले मेट्टेड आरू पिटतेल वेर्रानेड बेले ओडी आय।
d ओन गाद्दीन मुन्देल सात गोटा जियोमूल मेन्डाव।
c ईसू मसीयाल चेत्त मापोरबून लोगूग टोटीकतानेडe आरू चाय्यरान कान तीग पोईल जियोम पाडरानेडf आरू मोंजीपूर तो कोसकूलीन आंगरूरानेड आय।
आयची मापोरबून टिटाक ले आरू ओन सात गोटा जियोमूल टिटाक ले आरू ईसू मसीयाल टिटाक ले इमूंग माया पेम आरू चुक टोन्ड-टोन्डी मेनको।
ईसू मसीयाल आमीन चोग चाजूमेड आरू ओडी तान्न नेतीरीन कुरूस ती पोड़पीक किली आमीन आम्म पापदेरोम तो बान्देन तीग चोड़ाकतेड नाड।g
6 ओड आमीन तान आंगरूरान राज तो लोग एरीक किली ताम्म बुवा मापोरबूग पेलाचकूल एरीकतेड।
hi ओनूग जुग जुगूग इजीत तो मान एरको आरू ओड आंगरूरानो एतोड नांग चेलोको।
आटनी एरको।
7 इद चूड़!
ओड बादोरूल चेंगे इड़ूराडj आरू जाम्मा लोग ओनीन चूड़रार;
ओनीन कूटील कोट्टी मेन्डीर जे?
ओरी बेले ओनीन चूड़रारk आरू मोंजीपूर तो जाम्मा जातीतेर ओन चेत्तूग कूय कूयी आड़रार।
ओ।
आटनी एरको।
8 यावे मापोरबू,
“आनी जाम्मेनी उपजाकतानेन आरू आनी जाम्मेनी मुरजाकतानेन आय।
lm आन सोब ले लावतेन मेन्नी किली एबे बेले मेन्डान;
मुन्नीत ले मेन्डीन आरू वेर्रानेन बेले आनी आय” एनी पोक्कूमेड।
एऊना देरसेन ती सरग तो मांजेन चूड़रानो
9 इम बिसवासी तोल्लेड,
आन एऊना,
ईसून चेंगे बिड़ी मेन्नी किली मापोरबू आंगरूरानोन पातीयाकतान चेत्तूग वेर्रान सतावूलीन दिरजे ती सामालतान ती इम चेंगे पाट लागेतेन आय।
आन मापोरबून पाटेलीन पोक चियी किली ईसून गोवाई एर्रान चेत्तूग,
डेन्ड बेटी किली पतमूसn पिदीर तो डिपके ती मेट्टेन।
10 आन पोरबून दिनेo ती ओन जियोमीन ताकोत तीग कोप चेन्डेन आरू आन्न पोटतेल मोरीन आकाट तो जोड़ तो पोल्लेन वेट्टेन।
आद ईटे पोकोतो:
11 “नातीन ईन चूड़ूमोत आदीन कागेत ती लिकारे चेन आरू इपीसूस,
इसमूरना,
पीरगमून,
तुआतीरा,
सरदीस,
पिलदीलपीया,
आरू लोदीकीया गेड़ेल ती उलजूरान पोरबून बिसवात चाजूरान सात गोटा मान्देलूग चोटची काड”p एनी पोकरू।
12 तेबे आन,
आनीन ऊबीकतान ई पोल्ला एरोत आय एनी चूड़ू मोकोम ओरचीकतेन,
आरू मोकोम ओरचीकतानूग,
आन सोन तो दियेल मान्डाकतान सात गोटा कोमेलीन चूड़ेन।
13 आरू आ दियेल मान्डाकतान सात गोटा कोमेलीन नेनगा,
मांजेन चिन्डीन आकाटतेड ओकूरीन चूड़ेन।
ओड जेलेंगनाय कुड़ता तुन्दी मेन्डीड आरू एदरोम ती सोन तो पोटी काट्टी मेन्डीड।
14 आरू ओन तेल्ल आरू तेलताकूल विल नूलीन आकाट आरू एदीरीन आकाट जेग-जेगाचील मेन्डूव।
आरू ओन बोम्मेल एके रेग रेगूरान किच्चीन आकाट टोन्डूरूव।q
15 ओन केलूल गुड़-गुड़रान किच बाटी ती ताड़कीक किली एबे नी पुचरान पीतेलीन आकाट तोव,
r आरू ओन ऊबाल कुबे नीरीन पोल्लेन आकाट तो मेन्डू।
16 ओड तान्न वेला केय्य ती सात गोटा चुक्केलीन पात्ती मेन्डीड।
ओन चोन्ड तीग इकलाट-आकलाट वान्डूल मेन्डान निक्के वान्ड तो कान्डेन आकाट तो पोद्द पेतू।
s ओन मोकोम एके पोकाल निक्के नेन्ड वादेक मेडूरान आकाट तो मेडूरू।
17 आन ओनीन चूड़ी किली ओन केलूल किड़ी चाय्यरानेडीन आकाट उरकेन।
ओड एके तान्न वेला केय्योड आनीन टोड्डी किली,
“नारचूमेन;
आन मुरतेन आरू चेरा-चेरीतेन आय।
18 आरू आन जियोम मेन्डानेन आय।
आन चाय्यी मेट्टेन,
आरू इद चूड़!
आन एपोर जुग जुगूग जियोम मेन्डान आरू चाय्यकूड तो आरू चाय्यरान लोग मेन्डान किड़ीतपूर तो पान्न आनूंगी मेन्डा।t
19 आदूगी ईन नातीन चूड़ोत नात आरू नातो एरमो आरू इदीन ले पिटतेल नातो एर्रा बे आवीन जाम्मेनी लिकी मेन।
20 ईन आन्न वेला केय्य ती चूड़ोत जे?
आ सात गोटा चुक्केलीन इसाब तो आरू आ दियेल मान्डाकतान सात गोटा कोमेलीन इसाब तो पाकीक मेन्डान पाटा इद आय:
आ सात गोटा चुक्केल पोरबून बिसवात चाजूरान सात गोटा मान्देल तो सरग दूतकूलu आरू आ दियेल मान्डाकतान सात गोटा कोमेल पोरबून बिसवात चाजूरान सात गोटा मान्देल आय” एट्टेड।