इबरा 7

मुकीयाल पेलाच मलीकीसीदक

1 ई मलीकीसीदक सालेम तो कोस आरू पोडीत बेड़तो मापोरबून पेलाच मेट्टेड। आरू इबराईम कोसकूलीन जीती किली मेल्लेरपेक, मलीकीसीदक इबराईमोड बेट गाट एरी किली इबराईमूग आसतीर चिञ्ञेड। 2 ऊनूगी आय इबराईम जाम्मा बानील तीग देस गोटा बाटेल तीग ओक बाटेन (देसांमस) चिञ्ञेड। ओन बीतेर तो पोईल तो पाटा इद आय: ओन पिदीर मलीकीसीदक एनोड देरमी कोस एनी चोमजूरानो आय। आरू मारी ओक पाटा, ओड सालेम तो कोस बेले आय। एनोड चुक तो कोस एनी चोमजूरानो आय। 3 ओनूग ईय्या, बुवा, आरू तेरानतेर चिल्लार। आरू ओन जियोमीन मुर आरू मुरजूरानो बेले चिल्ला; एरोड मापोरबून चिन्डीन आकाटी ओड जुग-जुग तो पेलाच मेन्डाड।

4 आम्म पुरकेत मुकीयाल इबराईम तान लेड़ेय चाजी बेटूरान बानील तीग देस गोटा बाटेल तीग ओक बाटा (देसांमस) मलीकीसीदकूग चिञ्ञेड जे? आदूग ऊड एदरा बेड़तेड मेट्टेड तेबे, एनी किन्डीक चुरता चाजी चूड़ूर! 5 नियोम तो इसाब ती लेवीन तेरान तीग पेलाच पोद्द बेटूरानेरूग, लोगीन तीग, एटे एनोड आपला तोल्लेनकूल तीग, देस गोटा बाटेल तीग ओक बाटा (देसांमस) पातरानो आय एनी पाटा चिड़ोतोना। ओर जाम्मा ई इबराईमीन तेरानतेर एरोड बेले, आदीन चियरानो ई आय। 6 मलीकीसीदक एके लेवीन तेरानतेड एराड; एरोडी बेले, इबराईमीन केय्य तीग देस गोटा बाटेल तीग ओक बाटा (देसांमस) पाती किली, जुमानीन बेटूरान इबराईमूग आसतीर चिञ्ञेड। 7 आरू पिटीतेड बेड़तेडीन तीग आसतीर बेटूरानो आय, एन्डान कान नाती दुय मेन्न चिल्ला। 8 आरू ओक्केर एके, एबे जियोम मेन्नी, पिटतेल चाय्यरान लेवीन तेरान तो मांजा देसांमस बेटूमेड; मारी ओक्केर एके जियोम मेन्डाड एनी पोक्की मेन्डान मलीकीसीदक देसांमस बेटूमेड गो, 9-10 आमूंग ईटे बेले पोक्कू एर्रा: लेवीकूल तेरान तो लोगी देसांमस बेटूरीरमीन। इना एके पिटतेल इबराईमीन तेरान ती उपजेर जे? आ लेवीकूल वित्तील आकाट इबराईमीन मेन ती मेन्डीर। आतोडी इबराईम मलीकीसीदकूग देसांमस चिञ्ञेड। आदूगी वित्तील आकाट ओन मेन ती मेन्डीड जे? आ लेवी बेले इबराईमीन मेन तीग ओनूग देसांमस चिञ्ञेड एन्डान आकाट एञ्ञो।

11 इसराएली लोगूग लेवी कुटूमतेरी पेलाचकूल एर्रानो आय एन्डान इसाब, ओर नियोम ती मेन्डू। (आदीन इसाब ती लोग नियोमीन बेटेर।) एरोड लेवीन कुटूम तो पेलाचकूल एके, लोगीन देरमीकूल एरीकतान कामीन पूरा एरीक ओड़ेर। लेवी कुटूम तो आरूनीन तेरान तो पेलाचकूल आदीन चाजू नाम्बीकपोड, मलीकीसीदकीन नियोम इसाब ती, मारी आवूर तो ओक पेलाच नीतीक लागोयामीन। 12 एटे एनोड पेलाच पोद्दीन बादलोड नियोमीन बेले बादलाकतानो आय। 13 एटे एनोड आम पोक्कूमोम जे? आ मलीकीसीदकीन नियोम तीग पेलाच एर्रान ईसू, लेवी तेरानतेड एरा; ओड आवूर तेरानतेड आय। आ तेरान तीग एडी बेले मापोरबूग जेतरा आरू दूप नेडीकतान पाड ती एतोडी सेवा चाजाडी गो, 14 आम्म पोरबू एऊदेन तेरान तीग जेनोम एञ्ञेड एन्डानो पारगोड मेन्डा। आरू ई तेरानतेर पेलाच पोदीन बेटूरार एनी मूसाल मुरले बेले पोकाडी। 15 आञ्ञोती एरा, मलीकीसीदकीन आकाट मारी बेले ओक पेलाच वेञ्ञेड नाड एन्डानो, आगेर चेर चेरा एञ्ञो। 16 ओड आपला पिलूर तो नियोम इसाब तीग एरा, एरोड ओक एतोडी चाय्या जियोमीन ताकोत तो इसाब तीग आय पेलाच एञ्ञेड। 17 एटे एनोड ओन इसाब ती,

“ईन मलीकीसीदकीन नियोम तीग

रोजे तीग तो पेलाच आय”

एनी गोवाई चियरानो मेन्डा। 18 एटे एनोड पोईल तो नियोम लाव चिलायो आरू पोकातो मेन्डानूग मापोरबू आदीन गुचाक काट्टेड। 19 (एटे एनोड नियोम नाती पाटेनी पूरा एरीकपोया); आदूगी मारी आगेर रेच्चाट आचा मुरीयाकतानो मेन्डा। आरू आदीन तीग आम मापोरबून लेग्गे चेनूंग नाम्बीकताम।

20 मापोरबू किरीया तिन्नी किली ईसून पेलाच नीतीकतेड। एरोड मुन्नीत पेलाचकूल एर्रानेरीन किरीया तिनाका पेलाचकूल एनी, आटनी नीतीक मेन्डीर। 21 एरोड

“आन यावे, जुमान चिड़ाकतेन नान

आरू आन मारी पाचताकपाना, ‘ईन रोजे तीग तो पेलाच मेन्डात’”

एनी किरीया तिन्नी किली ईसून नीतीकतेड; आतोडी ओड पेलाच एञ्ञेड। 22 आदूगी ईसू आदूग ले रेच्चाट जुमान तो बायानेतेड एञ्ञेड।

23 मुन्नीत पेलाचकूल चाय्यारे चेन्डानूग, आपला पोद्द ती मेनूंग ओड़ा मेन्डीर। आदूग कुबे लोगीन पेलाचकूल एनी नीतीक लागूरू। 24 एरोड ईसू एके जुग जुगूग मेन्डानेड आय; आदूग ओन पेलाच पोद्द एतोडी पोलाया। 25 आदूगी ओड, तानीन बिसवात चाजूरान तीग, मापोरबून लेग्गाट वेर्रान लोगीन पूरा नाम्बीकताड। आरू ओरूग बिन्ती जोड़ू एतोड नांग जियोम मेन्डाड। 26 नाती केचूर चिला, बोदी चिला, चूत पाडा, पापीयालेर ले एलगा मेन्डान, आरू सरगूल ले आकलाट डेंग पाड ती एतीक एर्रान मुकीयाल पेलाच, ईसू ई आमूंग लागूरानोन पूरा चाजू नाम्बीकताड। 27 ओनूग मुन्नीत मुकीयाल पेलाचकूल आकाट, पोईल तान्न पापदेरोमूग, पिटतेल लोगीन पापदेरोमूग रोजे जेतरा चाजू लागाया। ओड आपला जियोमीन जेतरेन आकाट चियरानूग, ओपोट तीगी जेतरा चाजूरानोन निबड़ाक काट्टेड नाड। 28 एटे एनोड नियोम गो कोमजोर तो मांजेन मुकीयाल पेलाच नीतीकतो। एरोड नियोमूग ले पिटतेल वेर्रान किरीया तिन्दान इसाब तो पाटा एके, जुग जुगूग तीग किन्डीक बेले नाती कोमी चिलायेड एरीक एर्रान चिन्डीन नीतीकतो।