इबरा 6

बिसवात ती चान्दारे चेनार

1 आदूगी वेरूर, पोईल-पोईल मेरचीक मेन्डान बीतेर तो पाटेल ती आगे बोड़ी किली, बिसवात ती चान्दारे चेनार। आरू जियोमीन चाय्यरान कान उयरान एड़जाट कामूलीन चाजूरान तीग मेन्नीन उजराकतानो, मापोरबून बिसवात चाजूरानो, 2 ओगराक एर्रान इसाबूल, तेल्ल ती केय्य इडरानो, मेनगेर जियोम पाड्डीक एर्रानो, आरू मापोरबू जुग-जुग तो नियाव चिड़ाकतानो, ई जाम्मा इसाबूल पायेन आकाट मेन्डाव। आवीन मारी-मारी मेरीयू लागाया। 3 आरू एबे मापोरबून मेन्न मेनोड, आम आटनीची चाजूराम। 4 एटे एनोड एड एरको मुन्नी मापोरबून पूना मेन्डीर जे? ओर विलीज आकाट तो मापोरबून चेत्तीन एबे बिसवात चाजूरानूग, ओर मापोरबू तामूंग चियी मेन्डान इनाम तो तिरोमीन चाकेर नार। आरू आवूर बिसवासी लोगीन चेंगे, ओर बेले नाती केचूर चिला जियोमीन बेटेर नार। 5 आरू मापोरबून पोद्द रेच्चाट आय एन्डान तिरोमीन आरू वेर्रान जुग ती मापोरबू एटे ताकोत तीग पोरलेत काम चाजूराड एन्डान तिरोमीन बेले चाकेर नार जे? 6 ओर आदरा रेच्चाट बानीलीन बेटूरान पिटतेल बेले, बिसवात चाजूरानोन चायोड, ओर मेन्नीन उजराक किली मारी पुन्नोत चाजू एराया। एटे एनोड ओर मापोरबून चिन्ड ईसून ताम्म लाजूग मारी ओपोट कुरूस पारे ती कूटील कोटीक किली जाम्मा लोगीन मुन्देल ओनीन निन्दरूमेर। 7 एटे एनोड आरो एरको नेन्दील गेन-गेन वेर्रान बोरसेत नीरीन चोकी किली, आदीन कामाकतानेडूग कुच्चा पोर्रेन उपजाक किली, मापोरबून टिटाक ले आसतीरीन बेटूरा। 8 एरोड आद एके चाकेलीन आरू तुतरा पोर्रेलीन पान्डीकपोड, आ नेन्दील नाती कामूग एराया, आरू आदूग चेराप काटूरा आरू चेरा-चेरी आदीन किच पातीक किली चाय काडरार।

9 एरोड ए आन्न लाडरालेरे, एबे आम ईटे पोकोड बेले, ईम जाम्मेग ले रेच्चाट पाटेल ती चेलूमोर एनी चेत्ते पुट्टोम। आरू आव्वी बाचाकतान इसाब तो पाटेल आय। 10 एटे एनोड ईम मापोरबून पिदीरीन चेत्तूग, ओड तानूंग एलगाक मेन्डान लोगीन सेवा चाजी किली चोग चाजोर आरू एबे बेले चाज-चाजी मेनमोर जे? आटनी मापोरबू ईम चाजूरान चोग तो कामूलीन बूलकूरान ओदेरमी एरा। ओड आवीन बूलकाका, इमूंग देरोम चाजूरानेड आय। 11-12 आरू इम कान तीग जाम्मा लोग टेगरालेर एराका, बिसवात आरू दिरजा पात्ती, चिड़ाक मेन्डान जुमानूलीन बेटूरानेर चेल्लान आकाट चेलोकोर, ईम जियोम मेन्नारे आलवाल एरी किली आटनीत चोग चाजूरान कामूलीन चाज चाजी आचा चाजूरान कान चेरा चेरी आर्रे बेरकेच मेनूर एनी आम मेन्न चाजूमोम।

मापोरबू जुमान चिड़ाकतानो

13 आरू मापोरबू इबराईमीन चेंगे जुमान चिड़ाकपेक, तान्न ले बेड़तेड एडी चिल्ला कान्डूग आपला ई किरीया तिन्नी किली, 14 “आन चेत्तेगी इनूंग आसतीर चियरान, आरू इन तेरानतेरीन कुबे लोग एरीकतान” एट्टेड। 15 आरू आटनी तीग इबराईम जुमान चिड़ाक मेन्डान पाटेग दिरजा पात्ती कातेड आरू आदीन बेटेड बेले। 16 एटे एनोड मांजा नातो एरको कावडी उयरान पाटेन टिट्टे चाजू आपलेन ले बेड़तेडीन किरीया तिन्नी किली आ पाटेन टिट्टे तो चाजूराड। 17 आटनी मापोरबू बेले तान पाटा चियरानोन पूरा चाजूराड आरू ओन उवाटूल एतोडी बादलायोव आय एन्डान चेत्तीन जुमानीन बेटूरानेरूग चेत्त टोटीक तान्न किरीया ई गो तिन्देड नाड। 18 आदूगी इना एतोडी बादला जुमान चिड़ाकतानो आरू किरीया तिन्दान इयची इरडूकी पाटेल मेन्डाव। आवीन बीतेर ती मापोरबू एतोडी टेगू-टेगू पोकाडा। आदूगी मापोरबू आमीन राका चाजेकेड एनी ओन कान तूली वेरी मेन्डान आम, ओड चियरान आचे ती बेरकेच मेन्नी किली निक्के उचांग एरमोम। 19 आ आचा मारी नीर-जाजीन आटकाक इड़कीकतान लोवेत बोजेन आकाट, आम्म जियोमीन बेले बेरकेच एरीकता आरू चाकलूरा। आद आमीन आड़बान्दा मेन्डान गान्डेन ले बीतराम मापोरबून पाड आर्रे एपीकता। 20 आना मारी ईसू मलीकीसीदकीन नियोम तीग रोजे तीग तो मुकीयाल पेलाच एरी किली आम्म टिटाक तीग, आम्म ले मुन्नी मापोरबूनेल तान्नेड नाड।