बिसवात चाजूरानेर पाबूरान पाड ती तानरार
4
1 आदूगी ओड आची मेन्डान पाबूरान पाड ती तानराम एनी चियी मेन्डान पाटा एबेत आर्रे मेन्डानूग,
आम्म कान तीग एडी बेले आना एदू जूका मेनकोम एनी नारची किली मेन्डानो आय।
2 एटे एनोड आम बेले आ इसराएली लोगीन आकाटी,
एडो पाटेन वेट्टोम नाम।
एरोड ओर आदीन वेन्नी किली बिसवात चाजा कान्डूग,
वेनदान पाटा ओरूग नाती काम पाडोया।
3-4 एरोड आम बिसवात चाजूरानोम,
आ पाबूरान पाड ती तानराम।
सातवां दिनेत बीतेर ती,
मापोरबून कागेत ती आरे आले,
“मापोरबू चोय दिनेल ती तान गेड़रान कामीन पोलेड आरू आटो काम तीग सातवां चिरीक पाबेड”a एनी मेन्डा।
मोंजीपूर उपजेक ले ओड तान्न कामूलीन पोली किली पाबूरानोन नीतीक मेनोडी बेले,
“आन रिच एरी किली,
‘आन आची मेन्डान पाबूरान पाड ती ओर तान्नू ओड़ार’ एनी किरीया तिन्देन”b
“ओर आन आची मेन्डान पाबूरान पाड ती तान्नू ओड़ार”
एनी पोक्केड।
6 मुन्नी एडो पाटेन वेनदानेर पाटेन माना कान्डूग तान्नू ओड़ेर।
एरोड,
आ पाबूरान पाड ती ओदेर तानरार एन्डानो एबले बेले मेन्डा।
7 आदूगी कुबे कोम्बेर एर्रान पिटतेल मापोरबून कागेत ती,
“इने ईम ओन पोल्लेन वेनोड,
आपला मेन्नीन ऊबागेरी चाजूमोर”c
एनी दाऊदीन लिकाक किली मापोरबू तान आची मेन्डान पाबूरान पाड ती तान्नू ओक चिरीकीन नीतीकतेड।
आ चिरीक “इने” आय।
8 एटे एनोड एओसू ओरीन कनान देचे ती एपीकपेक,
मापोरबू पाटा चियी मेन्डान पाबूरान पाड ती एपीक मेन्डीड एरोड,
मापोरबू पिटतेल आवूर ओक चिरीकीन नीतीकपेडामीन।
9 आटे मेन्डानूग,
पाबूरान इसाब तो पाबूरान पाड ती मापोरबून लोग तानरानो एबले बेले मेन्डा।
10 एटे एनोड एड एरको मापोरबून पाबूरान पाड ती तानरानेड मापोरबू आपला कामूल पूरा चाजी किली पाबूरान आकाट पाबूराड।
11 आदूगी आम्मोर आ पाबूरान कान तान्नू ओरबोर एरार।
तेबे एडी ओर आकाट पाटेन मानायेर एरा मेनकोम।
12 एटे एनोड मापोरबून पोद्द जियोम तो आरू लाव तो आरू इकलाट आकलाट वान्डूल तो कान्डेन ले बेले निक्के वान तो आय;
आरू आद जियोम आरू परानीन,
गेटकूल गेटकूलीन आरू बूलेल तो गाबेलीन मिन एलगाक किली निक्के गिड़ीये ती बेदूरा;
आरू आद मेन्न तो बिचारूल आरू उवाटूलीन पोरकूरा।
13 आरू ई मोंजीपूर ती गेड़ी मेन्डानो नाती बेले मापोरबून नेंजेर तीग पाकू ओड़ा।
एरोड जाम्मा बानील ओन नेंजेर ती नाती मारकाडा चिलाका जाम्मा देका पाडराव।
आमूंग ओनूग इसाब चियू लागूरा।
ईसू जाम्मेग ले मुकीयाल पेलाच
14 आदूगी आमूंग सरग ती चेन्डान मुकीयाल पेलाच,
मापोरबून चिन्ड ईसू मेन्डानूग आम्मोर आम मानूमोम जे?
आ पाटेलीन बेरकेच ती पात्ती मेनार।
15 एटे एनोड आम्म कोमजोरी ती आमूंग केरमा गोटोक एर्रान मुकीयाल पेलाच,
आमूंग मेन्डाड।
ओनीन जाम्मा पाटेल ती आम्म आकाट चेयतान पोरकोतो;
एरोड बेले ओड नाती पापदेरोम चाजायेड मेन्डीड।
16 आदूगी,
वेरूर आम्मोर माया पेम तो राज गाद्दी लेग्गाट डाडू एरी चेनार।
तेबे आमूंग जियोम नोयपीकतानोन आरू काम पाडरान वादेक चेंग चियरान माया पेमीन आम बेटूराम।