इबरा 3

ईसू, मूसालीन ले मुकीयाल आय

1 आदूगी ए बायीयोवे आरू दादेरे! मापोरबू तानूंग एलगाक किली, सरग ती पीयरान जीवनेग पाट लागेतेर एरू, आम्म चेंगे इमीन बेले कूयेड नाड। आदूगी आम पोरबू नीतीकतानेड आरू मुकीयाल पेलाच एनी मानूमोम जे? आ ईसून कान ईम मेन्न लागाकपूर। 2 मूसाल बिसवात चाजू एर्रान बातेरतेड मेन्नी, मापोरबून ओलेक तो लोगूग जाम्मेगी सेवा चाजी मेन्डान आकाट, ईसू बेले तानीन नीतीकतानेडूग बिसवात चाजू एर्रान बातेरतेड मेन्नी सेवा चाजेड। 3 आरू ओलेक काट्टीकतानेड, ओलेकीन ले आगेर इजीत तो मान बेटूरान आकाट, ईसू बेले मूसालीन ले आगेर इजीत तो मान बेटूरान बातेरतेड एञ्ञेड। 4 (एटे एनोड जाम्मा ओलेकूलीन काट्टीकतानेर एड चिलाड एड बेले मेन्डाडी, एरोड जाम्मा बानीन गेड़रानेड मापोरबू आय।) 5 मूसाल, पिटतेल पारगाक एर्रान पाटेल तो गोवाई चियू, मापोरबून ओलेक तो जाम्मा लोगूग बिसवात चाजू एर्रान बातेर तो कामीयाल मेट्टेड। 6 एरोड मसीयाल एके, मापोरबून बिसवात चाजू एर्रान बातेर तो चिन्ड मेन्नी मापोरबून ओलेक तो मुकीयाल आय। आरू आम आचा चाजूरान ती बोड़पान एर्रान कान आरू डाडू चाजूरान कान चेरा चेरी आर्रे बेरकेच तीग ताम्बी मेनोडी गो आम मापोरबून ओलेक तो लोग आय।

पाबूरान पाड ती तानरानो

7 आदूगी नाती केचूर चिला जियोम पोकरान आकाट,

“इने, ईम ओन पोल्लेन वेनोड,

8 चिड़ा बाट तो कान पोरकूरान दिने ती आबूच एर्रान वादेक चाजूरान आकाट

आपला मेन्नीन ऊबागेरी चाजूमोर।

9 आना इम बुवेर आरू दादीलेर आनीन पोरकेर

आरू चालीस बेरेकूल आर्रे आन्न कामूलीन चूड़ेर।

10 इदीन चेत्तूगी आय, आन आ वादेक तो लोगीनोड बिर बिरा एरी किली,

‘ओर मेन्न एतोड नांग बूलकी चेनमो

आरू ओर आन्न पावूलीन चिताकपेरा’ एट्टेन।

11 आन रिच एरी किली,

‘आन आची मेन्डान पाबूरान पाड ती ओर तान्नू ओड़ार’ एनी किरीया तिन्देन।”

12 ए बायीयोवे आरू दादेरे! इम कान तीग एडी बेले कियाल तो आरू बिसवात चाजा गेरोबतेर एर्रानो एरा एनी लेक ती मेनूर। इम का कियाल तो आरू बिसवात चाजा गेरोब मेनोड, आद इमीन जियोम मेन्डान मापोरबून ले कोमाड उयरा। 13 एरोड इनेत ले एत्ती दिनेत्तार्रे पोलोंग मेन्डा, आत्ती दिनेत्तार्रे, ईम ओकूरीन ओकूर चोमजाक-चोमजाक मेनोड इम कान तीग एडी बेले पापदेरोम चाजू मेन्नीन ऊबागेरी एरीकपेरामीन। 14 एटे एनोड टेट ले, आम पात्ती मेन्डान बिसवात ती चेरा चेरी आर्रे मोंजीबूत मेनोडी गो, आम पाट लागेतोम एर्राम। 15 पोकरान आकाट,

“इने ईम ओन पोल्लेन वेनोड,

आबूच एर्रान वादेक चाजूरान आकाट आपला मेन्नीन ऊबागेरी चाजूमोर।”

16 एड आय मापोरबूनोन वेन्नी किली बेले आबूच एरी मेन्डीर? मिसर देचे तीग पेची किली मूसाल मेनगेन तीग चेलाक एर्रानेरी गो आय आटनी चाजेर। 17 आरू मापोरबू चालीस बेरेकूल आर्रे, एर पोडे बिर बिरा एरी मेन्डीड? पापदेरोम चाजी किली, ओर मोड़ील चिड़ा बाट तो कान पाड्डी मेन्डूव जे? आयची लोगोडी गो आय, ओड बिर बिरा एरी मेन्डीड। 18 आरू तान आची मेन्डान पाबूरान पाड ती ओर तान्नू ओड़ार एनी एरीन आय ओड किरीया तिन्नी मेन्डीड? तान पोकरान पाटेन माना लोगोडी गो आय, ओड किरीया तिन्देड। 19 आदूगी बिसवात चाजा कान्डूगी गो आय, ओर तान्नू ओड़ेर एनी आम पुनमोम।