पिलेमोनूग
पोलूस लिकूरान चिट्टी
जुवारतानो
1
1 आम्म बिसवासी तोल्लेड तिमूतीयूसीन चेंगे,
मसीयाल ईसून पाटेलीन वेनपीकतान चेत्तूग,
केयदाल मेन्डान पोलूसीन टिटाक ले,
आम्म चेंगे मापोरबून कामूल चाजूरान लाडराल पिलेमोनूग लिकूरान चिट्टी इद आय।
2 आरू आन इदीन बिसवासी चालाल आप्पीया,
आरू आम्म चेंगे मापोरबून कामूलीन चेत्तूग पालटेनीन आकाट आबोड़ एर्रान आरकीपूस आरू पिलेमोनीन ओलेक ती उलजूरान पोरबून बिसवात चाजूरान मान्देत लोगूग बेले लिकूमेन।
3 इमूंग,
आम्म बुवा मापोरबू आरू पोरबू ईसू मसीयालीन टिटाक ले माया पेम आरू चुक टोन्डारे मेनको।
पोलूस पिलेमोनूग बिन्ती जोड़रानो
4-5 ए बिसवासी तोल्लेडीने,
ईन पोरबू ईसून बिसवात चाजूरान बीतेर ती आरू मापोरबूग एलगाक मेन्डान जाम्मा लोगीन चोग चाजूरान बीतेर ती आन वेन्नी किली,
एतोड-एतोड बिन्ती जोड़ूमेन आतोड-आतोड इनीन चुरता चाजी किली आम्म मापोरबून एतोड नांग जुवार पोक पोक्की मेनमेन।
6 ईन आवूर बिसवासी लोगीन चेंगे मिसूरान ती चान्दी किली,
मापोरबू आमूंग चियी मेन्डान जाम्मा रेच्चाट इसाबूलीन पूरा चोमजू नाम्बीकपोकोत आरू आटनी तीग मसीयालूग इजीत टोन्डोको एनी आन बिन्ती जोड़ूमेन।
7 एटे एनोड मापोरबू तानूंग एलगाक मेन्डान लोगीन मेन्नूल,
इन तीग उचांग एञ्ञोव नाव।
आदूगी आन इन चोग तीग कुबे वेड़केन बेटूमेन आरू आन्न जियोम मान्डूमो।
उनेसीमूसूग गुवारतानो
8 आदूगी,
मसीयालीन टिटाक ले आनूंग टोन्डी मेन्डान पान्न तीग,
आनूंग इनीन तियारूक डाडू मेन्डा।
9 एरोड बेले,
ईन आनीन चोग चाजूरान चेत्तूग,
इनीन गुवारूकमेन।
आन मुत्ताक,
पोलूस एबे ईसू मसीयालीन चेत्तूग केयदाल मेन्डान।
10 आन इनीन आन्न चिन्डीन आकाट तो उनेसीमूसीनa इसाब ती गुवारूकमेन।
जेल ती मेनेक,
ओड आन पोकरान एडो पाटेन पातीयाकतानूग,
आन ओन बुवेन आकाट एञ्ञेन।
11 (ओड मुन्नी इनूंग नाती काम पाडायेड मेट्टेड,
एरोड एपोर चेत्ते इनूंग आरू आनूंग बेले कुबे काम पाडरानेड आय।)
12 ओनीन आन इन लेग्गाट मारी चोडूकमेन।
आन ओनीन कुबे पेम चाजूमेन।
13 एडो पाटेन वेनपीकतान चेत्तूग आन जेल ती मेनेक,
ओड इन पाड ती आन्न सेवा चाजेकेड एनी आन ओनीन आन्न लेग्गाटी इड्डू मेन्न चाजूमेन।
14 एरोड,
ईन राजी पाडाका नाती नी बेले,
इनीन बेरपेला चाजपीक आनूंग मेन्न चिल्ला।
एरोड ईन ई रेच्चाट इसाबीन मेन्न तीग चाजूरानो आय एनमेन।
15 एटे एनोड एरू नाम्बीकता,
ईन ओनीन मारी रोजे तीग बेटोकोत एनी,
ओड ओदो दिनेल आर्रे एलगेड एन्डान आकाट आनूंग बावूमो।
16 एरोड एपोर आमान कामीयालीन आकाट एरा,
एरोड कामीयालीन ले बेले आगेर,
लाडराल बिसवासी तोल्लेडीन आकाट मेनकेड।
ओड आन्न निक्के लाडराल गो आय।
आदूग ले बेले आगेर,
ओड आमान इन कामीयाल मेन्डानूग एरा,
एरोड ओड पोरबून बिसवात चाजूरानूग बेले इनूंग निक्के लाडराल एरकेड।
17 ईन आनीन,
इन चेंगेत पाट लागेतेन आय एनी चोमजूमोत एरोड गो,
आनूंग पाड चियरान आकाटी,
ओनूग बेले पाड चियू।
18 ओड इनूंग नातोन बेले कियाल चाजेड नाड,
चिलाड ओड इनूंग चियू लागूरान आकाट नातो एरको लागा मेन्डा एरोड,
आदीन आन्न पोडे चाय काड।
19 आन पोलूस,
कुदे लागेन चूट चियरान एनी आनी लिकूमेन;
एरोड आन इनीन एडो पाटेन वेनपीकतानूग,
ईन आपलेनी आनूंग चियू लागूरान लागा मेन्डा,
एन्डानोन आनूंग इनीन पोक्कू लागाया।
20 ओ,
ए दादा!
आम पोरबून चेंगे बिड़ी मेन्डानूग ई वेड़का आनूंग,
इन टिटाक ले टोन्डोको।
आरू आम मसीयालीन चेंगे बिड़ी मेन्डानूग आन्न जियोमूग उचांग चिय।
21 ईन आन पोकरान पाटेन मानूरात एनी बिसवात चाजूमेन आरू आदूग ले बेले आगेर ईन चाजूरात एनी पुन्नी किली लिकूमेन।
22 आरू ईम बिन्ती जोड़रान चेत्तूग,
मापोरबू आपला माया पेम तीग आनीन जेल तीग चोड़ाकपोड,
आन इन्नेली वेर्रान एनी आचा चाजूमेन।
आदूगी आनूंग तेबू पाड बेले तायार चाजी मेन।
चेरा चेरीत जुवार
23 ईसू मसीयालीन पाटेलीन वेनपीकतान चेत्तूग,
आन्न चेंगे जेल ती मेन्डान इप्परास इनीन जुवार पोक्कूमेड।
24 आरू आन्न चेंगे मापोरबून काम चाजूरान मरकूस,
आरीसतरकूस,
देमास आरू लूका बेले इनीन जुवार पोक्कूमेर।
25 आम्म पोरबू ईसू मसीयालीन माया पेम इम जियोमीन चेंगे मेनको।
आटनी एरको।