पोरबून बिसवात चाजूरान मान्देत मुकीयालेर
3
1 पोरबून बिसवात चाजूरान मान्देत मुकीयाल एरू कानतान मांजा,
रेच्चाट कामीन मेन्न चाजूराड एन्डान पाटा बिसवात चाजू एर्रान बातेर तो आय।
2 आदूगी पोरबून मान्देत लोगीन मुकीयाल मांजा केचूर चिलायेड,
ओकती आयाल तो माईड,
चोमेनतेड,
आपलेन काटलाकतानेड,
इजीत्तेड,
लोगीन चेगा आय एनी मानूरानेड,
मापोरबून पाटेन रेच्चा मेरचीक नाम्बीकतानेड,
3 मातवार चिलायेड,
आबूच एराएड,
एरोड चुचारूतेड,
कावडी उयायेड आरू पोयसेलूग लालेच एरायेड मेन्डानो आय।
4 आरू तान्न ओलेकीन रेच्चा सामालतानेड,
आरू पूरा इजीत तीग तान्न पापकूलीन आपला काबजे ती चाजी मेन्डानेड मेन्डानो आय।
5 एड एरको तान्न ओलेकीन सामालूक ओड़ायेड एटे तीग मापोरबून बिसवात चाजूरान मान्देत लोगीन चाकलू नाम्बीकताड?
6 ओड पुन्न बिसवासी बेले मेना मेनकेड,
चिलाड ओड डेंग तीग बोड़पान एरी किली चेयतान बेटूरान डेन्डीन आकाट तो डेन्ड बेटूराड।
7 आञ्ञोती एरा,
ओड लाज पाड्डी किली चेयतानीन पान्दे ती चिरंगाका मेनूंग,
आवूर तो लोग बेले ओनीन रेच्चाल एनी चोमजूरानो आय।
मुकीयालेरीन चेंग चियी किली पोरबून काम चाजूरानेर
8 आटनी पोरबून बिसवात चाजूरान मान्देत मुकीयालेरीन चेंग चियी किली,
पोरबून काम चाजूरानेर बेले,
लोग ओरीन इजीत मानूरान बातेरतेर मेन्डानो आय;
ओर दुय बेदीयालेर मेना मेनकेर;
चोरनूरानेर मेना मेनकेर;
आरू लोगीन टेग्गी कामाकतान देनूग लोब एर्रानेर मेना मेनकेर।
9 ओर,
मुन्नी पाकीक मेन्नी एपोर पारगाक मेन्डान बिसवात इसाब तो पाटेलीन केचूर चिला,
बीतराम तो मेन्नीन गोवाईन तीग पातीयाक मेन्डानो आय।
10 आरू ओरीन मुन्नी पोरकूर;
आनातले ओर केचूर चिलायेर एनी नीतीक एञ्ञेर एरोड,
पोरबून बिसवात चाजूरान मान्देत मुकीयालेरीन चेंग चियी किली पोरबून काम चाजूरानेर एरकेर।
11 आटनी ओर आयचील बेले इजीत्तोव मेन्डानो आय;
लोगीन नेडीकतानोव एरा एरोड चोमेनतोव मेन्डानो आय आरू जाम्मा पाटेल ती बिसवात चाजू एर्रान बातेर तोव मेन्डानो आय।
12 पोरबून बिसवात चाजूरान मान्देत मुकीयालेरीन चेंग चियी किली पोरबून काम चाजूरान ओक-ओक मांजा ओकती आयालतेड मेन्डानो आय आरू तान्न पापकूलीन आरू ओलेकीन रेच्चा सामालतानेड मेन्डानो आय।
13 एटे एनोड पोरबून बिसवात चाजूरान मान्देत मुकीयालेरीन चेंग चियी किली पोरबून कामीन रेच्चा चाजूरानेर,
तामूंग पिदीर कामाकतार आरू ईसू मसीयाल कान चाजूरान बिसवात ती निक्के बेरकेचीन बेटूरार।
पाकीक मेन्डान बोकतीत पाटेल
14-15 आन जेटके नी इन लेग्गाट वेर्रान एनी आचा चाजूमेन।
आन जेटके वेराकोड,
मापोरबून कुटूम तो लोग,
एट्टो चेला बूलेल ती चेल्लानो आय एनी ईन पुन्दानो आय एनी ई केडीकतान पाटेलीन लिकूमेन।
ओर जियोम मेन्डान मापोरबून मान्देत लोग आय;
पेत आरू पाया ओलेकीन ताम्बूरान आकाट ओर चेत्त पाटेलीन ताम्बूमेर।
16 मुन्नी पाकीक मेन्नी पिटतेल पारगाक एञ्ञो जे?
आ पाटेल तीग उपजूरान,
मापोरबू मेन्न चाजूरान रेच्चाट बोकतीत जियोम निक्के बिचार चाजूरान बातेर तो आय।
आद नाताय एनोड:
ईसू मसीयाल मेन ती मांजेन आकाट पारगाक एञ्ञेड,
मापोरबून जियोम ओनीन चेत्तेतेड एनी टोटीकतेड,
सरग दूतकूल ओनीन चूड़ेर,
देचेल-देचेल ती ओन बीतेर तो पाटा पारगोतो,
मोंजीपूरतेर ओन कान बिसवात चाजेर,
आरू ओड इजीत तो मान तो पाड ती एतीक एञ्ञेड।