एरूग आरू एटे बिन्ती जोड़रानो आय
2
1 एपोर,
ईम जाम्मा मांजाकूलूग बिन्ती जोड़ूर,
पारातना चाजूर,
गुवारपूर आरू जुवारपूर एनी आन सोब ले मुन्नी इमीन पोक्कूमेन।
2 आम आसतीर तीग आरू चुक तीग,
जाम्मा इसाबूल ती मापोरबू मेन्न चाजूरान बोकती तो जियोम आरू ओनूग एलगाक मेन्डान जियोम पीयकोम एनी कोसकूलूग आरू बेड़कूल-बेड़कूल पोद्दूलतेरूग बिन्ती जोड़ूर।
3 इद्दी आमीन बाचाकतान मापोरबून नेंजेरूग रेच्चा बावूरा आरू आद ओनूग मेन्न ती वेर्रा।
4 ओड जाम्मा मांजाकूल बाचेकेर आरू ओर चेत्तीन रेच्चा चोमजेकेर एनी मेन्न चाजूमेड।
5 एटे एनोड मापोरबू ओकूरी आय,
आरू मापोरबू आरू मांजेन नाड़बूल मिलाकतानेड बेले ओकूरी आय,
ओड मांजेन रूप एरी जेनमूरान मसीयाल ईसू आय।
6 ओडी जाम्मा लोगीन,
कुदे तान्न नेतीर तीग मोलयाक किली चोड़ाकतेड आरू इदीन तीग मापोरबून उवाट नाताय एनी,
तान नीतीक मेन्डान बेरे ती पारगाक एरमो।
7 आनीन आ उवाटीन वेनपीकतानेड आरू पोरबू नीतीकतानेड,
आरू एऊदीकूल चिलायेरूग बिसवात आरू चेत्त तीग मेरचीकतानेड एनी,
मापोरबू आनीन नीतीकतेड नाड।
(आन चेत्ते पोक्कूमेन,
टेगाना)।
8 आदूगी मापोरबून मोड़कू लोग उलजूरान जाम्मा पाडकूल ती,
माईंड चिन्ड रिच एराका आरू पोका पोकी एराका,
केचूर चिला आपला केय्यूलीन पोडी एतीकa किली बिन्ती जोड़रानो आय एनी मेन्न चाजूमेन।
9 आटनी आयचील बेले आपलेनी आपला ई सामालतान,
सादा गान्डा कोटेलोड,
लोग इजीत मानूरान आकाट तामीन तामी सिंगारपोकोव।
बेनी आन्डरान कान आरू सोन आरू मोतील आरू मोल्लेत गान्डेलोड आपलेनी आपला ई सिंगारपाका,
10 एरोड मापोरबून बोकती चाजूरान आयचील एटे मापोरबून पातीयाक मेन्डानो आय आटनी मेन्नी,
निक्के रेच्चाट कामूल तीग सिंगारची एरी मेन्डानो ई,
आवूग पोबूरा।
11 मापोरबून मोड़कू उलजेक आयचील किटूक काटूकनाय पूरा काबजे ती मेन्नी किली मेरीयूरानो आय।
12 आरू आयचील,
माईंड चिन्डीन मेरचीकतानोन आरू ओर पोडे पान्न चेलाकतानोन आन माना चाजूमेन;
एरोड आव किटूकनाय मेन्नी मेरीयोकोव।
13 एटे एनोड मापोरबू आदमीन मुन्नी आरू आव्वेन पिटतेल गेड़ेड;b
14 आरू आदम बूलकाक एरेडा,
एरोड आयाल आय बूलकाक एरी किली पापीयाट एञ्ञो।c
15 एरोड बेले आयाच पारना आपलेन सामालची किली बिसवात ती,
चोग ती,
आरू केचूर चिलायेर मेन्डान ती चेल चेली मेनोड,
पापकूल ओंगरान चेत्तूग,
बाचाक एर्राव ई।d