ईय्या बुवा आरू पापा पिला
6
1 ए पापकूले!
पोरबून पातीयाकतानूग आपला-आपला ईय्या बुवेर पाटेलीन मानूर;
एटे एनोड इद रेच्चाट आय।
2-3 “आपला ईय्या बुवेरीन इजीत चाज।
तेबे इनूंग रेच्चा एर्रा आरू ईन मोंजीपूर ती कुबे कोम्बेर जियोम मेन्डात”a एनी पाटा चियी मेन्डान इसाबीन पोकरान पोईल तो नियोम इद्दी आय।
4 आरू ए पापकूलतेरा,
आपला-आपला पापकूलीन रिच एरीकमोर,
एरोड पोरबून पाटेलीन मेरचीक किली चोमजाक-चोमजाक ओरीन पोरीकपूर।
सावकार आरू कामीयाल
5 ए कामीयालेरे!
ईम एटे मसीयालूग नारची किली इजीत मानूमोर,
आटनी इम मोंजीपूर तो सावकारकूलूग बेले नारचूर आरू इजीत चियी किली ओर पाटेन मेन्न तीग मानूर।
6 आरू मांजेन वेड़का एरीकतानेर आकाट ओर इमीन चूड़ेकेर एनी कामूल चाजूमोर,
एरोड मसीयालीन कामीयालेर आकाट मेन्न तीग मापोरबू उवाट चाजूरान आकाट चाजूर।
7 आरू ईम चाजूमोर जे?
आ कामीन मांजेन एरा एरोड पोरबून सेवा आय एनी मेन्न लागाक किली चाजूर।
8 एटे एनोड बान्देन ती मेन्डानेड एरको चिलाड एके बान्देन ती चिलायेड एरको ओड रेच्चाट चिलाड कियाल तो काम चाजोड पोरबून तीग आदीन पालटा बेटूराड एनी ईम पुट्टोर।
9 आरू ए सावकारकूले!
ईम बेले ओरूग आटनी तोन चाजूर।
दामकाकतानोन चाय काड्डी किली ओरोड रेच्चा चाजूर;
एटे एनोड इम आरू ओर इरूलीन सावकार सरग ती मेन्डाड,
आरू ओनूग जाम्मा ई लोग ओकती काटारतेर आय एनी ईम पुट्टोर।
चेयतानीनोड लेड़रान आतीयार
10 आञ्ञोती एरा,
पोरबून कान मोंजीबूत एरी किली ओन निक्के ताकोत तीग ईम बेले लावतोर एरूर।
11 मापोरबू चियी मेन्डान जाम्मा आतीयारूलीन पात्ती मेनूर।
तेबे ईम चेयतानीन चेतूर तो उवाटूलीन विरूद लेड़ू नाम्बीकतार।
12 एटे एनोड आम्म लेड़ेय नेतीर आरू चेप्पूल तीग बान्नी मेन्डान मांजेनोड एरा,
एरोड आम चूड़ू ओड़ा कियाल तो जियोमूलीन आंगरूरान आरू पान्न चेलाकतान ताकोतूल आरू मोंजीपूरीन चीकोड ती पाटतीक मेन्डान ताकोतूल आरू बादोर ती मेन्डान वेन्दीड बिटाचील आरू बूत डुमेल ताकोतूलोड लेड़ेय चाजूराम।
13 आदूगी मापोरबू चियरान जाम्मा आतीयारूलीन पात्ती मेनूर।
तेबे कियाल तो दिनेल ती चेयतानीन विरूद लेड़ेय चाजी किली लेड़ेय पोलान पिटतेल बेले ईम मोंजीबूत मेन्डार।
14 आदूगी एतोड नांग लेड़ू तायार मेनूर।
मापोरबून चेत्त पाटेलीन केरदेन आकाट किटे ती काट्टी किली जिलेयीन आकाट देरोमीन तुन्दी किली आदीन ती चेलूर।
15 आरू एडो पाटा मापोरबूनोड मिली मिसी मेन्डानोन पोक चियमो।
आदीन केलूल ती बुटूल तुन्दरान आकाट तुन्दी किली पूरा तायार मेनूर।
16 आरू आवीन चेंगे पालटेनकूल लेड़ेय ती चेनेक आतीयारूलीन रोकू आड्डोम चाजूरान लोवेन पात्ती चेन्डान आकाट एतोड नांग मापोरबून बिसवात चाज चाजी मेनूर।
तेबे गो बिसवातीन तीग एड़जाट चेयतानीन नीरूरान आम्बूल आकाट तो पोरकूरान इसाबूलीन रोकू नाम्बीकतार।
17 आरू मापोरबू बाचाकतान इसाबीन पातीयाकपूर।
इद तेल्लीन बाचाकतान टोपीन आकाट मेन्डा।
आरू मापोरबून पोद्दीन बेले पात्तूर।
इद चेयतानीन लेड़ेय चाजू मापोरबून जियोम चियरान कान्डेन आकाट मेन्डा।
18 आरू एतोड नांग,
जाम्मा इसाब ती मापोरबून जियोम इमीन बिन्ती जोड़पीकतान आकाट बिन्ती जोड़ जोड़ी आरू गुवारची-गुवारची मेनूर।
इदीन मेन्न ती पात्ती,
लेक ती मेन्नी किली ईम एसकोट बावाका मापोरबू तानूंग एलगाक मेन्डान जाम्मेगी बिन्ती जोड़ जोड़ी मेनूर।
19 आरू आनूंग बेले एडो पाटेन पाकीक मेन्डान इसाबूलीन डाडू चाजी किली वेनपीक पोद्दूल टोन्डोकोव एनी बिन्ती जोड़ूर।
20 आदीन वेनपीक आन कोसीन काबेर तो मांजेन आकाटतेन आय;
आदीन चेत्तूग जेल ती चिकरीलोड काटकीक एञ्ञेन नान।
आनूंग एडो पाटेन एटे पोकरानो आय आटनी आन डाडू चाजी किली पोक्केकेन एनी बेले बिन्ती जोड़ जोड़ी मेनूर।
चेरा चेरीत गुवारना
21 पोरबून चेंगे बिड़ी मेन्डानूग आन्न लाडराल बिसवासी तोल्लेड आरू बिसवात चाजू एर्रान बातेर तो पोरबून कामीयाल तुकीकूस,
आन एटे मेन्डान आरू नातो चाजूरान आ जाम्मा इसाबूलीन इमूंग पोक चियराड।
22 आम एटे मेन्डाम एनी ईम पुनकोर आरू ओड इम मेन्न ती उचांग चियकेड एनी गो आय आन ओनीन इम लेग्गाट चोटतेन नान।