इपी 5

मापोरबून चेला बूलेल ती चेल चेली मेनूर

1 आदूगी, ईम मापोरबून लाडराल पापकूल मेन्डानूग, ओन चेला बूलेल आकाट तो चेला बूलेल ती चेल चेली मेनूर; 2 आरू इमीन चोग चाजी किली तानीन तानी मापोरबूग मेन्न ती वेर्रान रेच्चाट बास तो दाग चियरान बोदनेन आरू जेतरेन आकाट चोत्तीकतेड जे? आटनी ईम बेले चोग ती चेलूर। 3 आरू इम कान नाती इसाब तो दोस पाडरान कामूल चिलाड चूत पाडरान कामूल चिलाड जिवड़ेय एर्रान कामूलीन ईम चाजूमोर एनी वेनूंग बेले एरा मेनको; एटे एनोड ईटो कामूल चाजूरानो मापोरबूग एलगाक मेन्डान लोगूग बानाया। 4 आरू लाज पाटतीकतान पाटेल आरू मापोरबून माना कान्डूग पेतान बाकवाट पाटेल आरू किच किचाट मोसका पाटेल वेनूंग एरा मेनको। ईव जाम्मा चाबाव तोव एरावा। एरोड मापोरबून जुवारतान पाटेली वेनूंग एरकोव। 5 एटे एनोड दोस पाडरान कामूल चाजूरानो चिलाड, चूत पाडरानो चिलाड जिवड़ेय एर्रानो ईव जाम्मा मुरीतूलीन मानूरान आकाट तोव आय। आटो कामूलीन चाजूरानेर एडी मसीयाल आरू मापोरबू आंगरूरानोन बेटारा एन्डानोन ईम चेत्ते पुट्टोर। 6 ईटो कामूलीन चाजोड नाती एराया एनी एड एरको इमीन पोका पाटेल पोक्की किली टेगा मेनकेर। एटे एनोड इयची कामूल चेत्तूग मापोरबू तान्न पाटेन पाता लोगीन डान्डूराड। 7 आदूगी ईम ओर चेंगे मीसूमोर। 8 एटे एनोड मुन्नी ईम पोरबून चेत्त पाटेलीन पूनाका चीकोड ती मेट्टोर; एरोड एपोर पोरबून चेत्त पाटेलीन पुन्नी किली विलीज ती मेन्डार। आदूगी ओन चेत्त पाटेलीन पुन्दान विलीज ती मेन्डान पापकूल आकाट चेलूर। 9 (एटे एनोड विलीज ती मेन्डानेर पालकूल आकाट तो जाम्मा बानीत रेच्चाट, आरू देरोम, आरू चेत्त कामूलीन चाजूरार।) 10 आरू पोरबू नातीन मेन्न चाजूमेड एनी पोरकी किली आवीन चाजूर। 11 आरू चीकोड ती मेन्डान लोग चाजूरान पोकात कामूल ती बिड़ूमोर, एरोड आवीन ईव कियाल तोव आय एनी पारगाकपूर। 12 एटे एनोड मापोरबून पाटेन पाता लोग पाकी किली चाजूरान कामूल बीतेर ती ऊबोड बेले इजीत चेन्डा एन्डान आकाट आय। 13 एरोड ओर ईम चाजूरान विलीज तो रेच्चाट कामूलीन चूड़ोड, ताम चाजूरान चीकोड तो एड़जाट कामूल पारगूरानूग आ कामूलीन चायी किली रेच्चाट कामूलीन चाजूरार। 14 आदूगी,

“ए माडरानोरे, चुलपूर;

आरू चाय्यरान कान तीग जियोम पाडूर;

तेबे गो मसीयाल विलीज इम कान मेडूरा”

एनी एड आय आले पोकरान पाटा मेन्डा। 15 आदूगी एटे चेलूमोम आले एनी लेक ती मेनूर: आकेल चिलायेर आकाट एरा एरोड आकेल तो लोगीन आकाट चेलूर। 16 आरू दिनेल कियाल तोव मेन्डानूग बेरेन निक्के मोल्ले तो आय एनी चोमजी किली आटनी चेलूर। 17 आदूगी आकेल चिलायोर एरमोर, एरोड पोरबून उवाट नाताय एनी चोमजूर। 18 आरू आंगूर मेल उन्नी मातवारकूल एरमोर, एटे एनोड चोरनूरानो इमीन इजीत चेन्डान कामूल ती बीड़ाकता; एरोड मापोरबून जियोमीन ताकोत तीग कोप्पी मेनूर। 19 आरू ओकूरीन ओकूर मापोरबून पोद्दूल तो पाटेल आरू ओनीन जुवार चाजूरान पाटेल आरू ओन जियोम मेन्न चाजूरान पाटेल पाड पाडी उचांग चियूर; आरू आपला-आपला मेन्न तीग पाटेल पाड पाडी पोरबून जुवारपूर। 20 आरू जाम्मा इसाबूल ती आम्म पोरबू ईसू मसीयाल पिदीर पात्ती किली एतोड नांग बुवा मापोरबून जुवारची-जुवारची मेनूर। 21 आरू मसीयालीन इजीत चियरानूग ओकूर ओकूरीन काबजे ती मेनूर।

आयाल माईड

22 ए आयचीले! पोरबून काबजे ती मेन्डान आकाट आपला-आपला माईडीन काबजे ती मेनूर। 23 एटे एनोड एटे मसीयाल तान्न चोलेन आकाट तो पोरबून बिसवात चाजूरान मान्देत लोगूग तेल्लीन आकाट मेन्डाड आरू ओडी कुदे ओरीन बाचाकताड आटनी, माईड बेले आडेयीन तेल्लीन आकाट तो मुकीयाल आय। 24 आरू एटे पोरबून बिसवात चाजूरान मान्देत लोग मसीयाल काबजे ती मेन्डार, आटनी आयचील बेले जाम्मा पाटेल ती आपला-आपला माईडीन काबजे ती मेनकोव।

25 ए माईले! मसीयाल पोरबून बिसवात चाजूरान मान्देत लोगीन चोग चाजूरान आकाट ईम बेले आपला-आपला आडेयीनोड चोग चाजूर। 26 नातीन एरको नीर आलकी किली ओगराकतान आकाट मसीयाल बेले तान्न पोद्दोड पोरबून बिसवात चाजूरान मान्देत लोगीन ओगराक किली ओरीन मापोरबूग एलगाक तानीन ओरूग ओपीक चिञ्ञेड। आटनी माईल बेले आपला-आपला आडेयूग आपलेन ओपीक चियरानो आय। 27 आञ्ञोती एरा ओरीन दाग चिला चिलाड चुन्ना गान्डेलोड चिंगारची एरी मेन्डान एरोड नाती केचूर चिला आरू बोदी चिला कोड़ोलीन आकाट तो मेडूरान रेग तो पोरबून बिसवात चाजूरान मान्देत लोगीन तान्न मुन्देल नीतीक एनी बेले आटनी चाजेड। 28 मसीयाल आकाट माईल बेले आपला-आपला आयालीन आपला मेनीन चोग चाजूरान आकाट चोग चाजूरानो आय। एड एरको आपला आयालीनोड चोग चाजूरानेड, तानीन तानी बेले चोग चाजूराड। 29-30 एटे एनोड आम मसीयाल चोलेत ओक-ओक बागूल आकाटतोम मेन्डानूग, मसीयाल पोरबून बिसवात चाजूरान मान्देत लोग मेन्डान आमीन देक रेक चाजी किली आम तीग वेड़का एर्राड। आटनी मांजा बेले एडी आपला मेनोड कुचेर एराडा। एरोड ओड आदीन तितीकताड आरू आदीन तीग वेड़का एर्राड। 31 “आदूगी माईड आपला ईय्या बुवेन ले एलगी किली आपला आयालीन चेंगे ओकती चोर ती मेन्डाड, आरू ओर इरूल ओकती मेन एरी किली मेन्डार” एनी मापोरबून कागेत ती लिका मेन्डा। 32 इद निक्के गिड़ीयाट आरू मुन्नीत वादेक पाकीक मेन्डान पाटा आय। एरोड एपोर इद पोरबून बिसवात चाजूरान मान्देत लोग आरू मसीयाल बिड़ी मेन्डानोन टोटीकमो एनी आन पोक्कूमेन। 33 एरोड इम कान तीग ओक-ओक माईड आपला-आपला आयचीलोड इमीन ईमी एटे चोग चाजूमोर आटनी चोग चाजूर। आरू आयचील बेले आपला माईलूग इजीत चियूर।