चाय्यकूड तीग जियोमीन टिटाक
2
1 आरू ईम इम पापदेरोमूल आरू ओदेरोमूल चेत्तूग इम कान चेत्त जियोम चिला कान्डूग चाय्यरान लोगीन आकाटतोर मेन्डूर।
2 एटे एनोड मुन्नी ईम ई मोंजीपूर तो लोगीन पाटे ती चेलूरूर।
आरू मापोरबून पाटेन माना ई मोंजीपूर तो लोगीन तान्न नियोम ती चेलाकता जे?
आ बादोर तो बूत डुमेलीन कोसीन आकाट तो चेयतानीन पाटेल ती चेलूरूर।
3 ओर आकाट मुन्नी आम जाम्मा ई बेले मेन्न के लागेन तो लालेचूलूग दिना काटाकतूम,
आरू आपला चोला आरू मेन्न तो उवाटूलीन पूरा चाजूरूम,
आरू आवूर जाम्मा लोगीन आकाट एड़जाट चेलनूकूड़ूल ती चेली किली मापोरबू डान्डूरान बातेरतोम मेन्डूम।
4 एरोड चेड़ीगेन जियोम नोयपीकतान मापोरबू,
तान आमीन निक्के चोग चाजूरान चेत्तूग,
5 आम आम्म पापदेरोमूल तीग चाय्यरानेर आकाटतेर मेनोड बेले,
आमीन मसीयालीन चेंगे जियोम पाटतीकतेड।
तान्न माया पेमीन चेत्तूगी ओड इमीन बाचाकतेड।
6 आरू मसीयाल ईसून चेंगे बिड़ी मेन्डान चेत्तूग आमीन मसीयालीन चेंगे एतीकतेड,
आरू ओन चेंगे सरग तो पाटकूल ती उन्डतीकतेड।
7 मसीयाल ईसून चेंगे बिड़ी मेन्डान चेत्तूग,
वेर्रान वादेक,
मापोरबू आपला पेम तीग आमीन आपला एजा चाजू ओड़ा कियाल तीग चेड़ीगेन माया पेम चाजूमेड एन्डानोन टोटीक आटनी चाजेड।
8 एटे एनोड ईम बिसवात चाजूरानूगी मापोरबू आपला माया पेम तीग इमीन बाचाकतेड नाड;
आरू इद इम टिटाक ले एरा,
एरोड मापोरबून इनाम आय।
9 आरू एडी बोड़पान एरा मेनकेर एनी इदीन एड एरको तान चाजूरान कामूल तीग बेटेडा।
10 एटे एनोड मापोरबू ई आमीन पुन्नेर गेड़ेड।
आरू तान मुन्नीत ले तायार चाजी मेन्डान आ रेच्चाट कामूलीन आम चाजोकोम आरू आना चेल चेली मेनकोम एनी आय ओड मसीयाल ईसून तीग आमीन गेड़ेड।
मसीयालीन मानूरान चेत्तूग आम ओकती लोग आय
11 आदूगी एऊदीकूल चिला लोगीन का जेनोम एर्रान इमीन,
जियोम पाड तो तीप तोलीन चोले ती केय्योड कुडीकतोम नाम एनी डेंग एर्रान एऊदीकूल,
जियोम पाड तो तीप तोलीन कुडीकपायेर एनी इमीन निन्दरूरीर जे?
आदीन चुरता चाजूर।
12 ईम आतोड मसीयाल तीग पुटा मेन्डूर,
आरू मापोरबू आची मेन्डान इसराएल लोगीन पाट लागेतोर चिला मेन्डूर,
मापोरबू चिड़ाक मेन्डान जुमान ती चियी मेन्डान पाटेलूग पोर देचेतोर मेन्डूर आरू आचा चाजू एरा कियालतोर मेन्डूर,
आरू ई मोंजीपूर ती मापोरबून चेंगे चिला मेन्डूर जे?
आ जाम्मेनी चुरता चाजूर।
13 एरोड एपोर मसीयाल ईसून चेंगे बिड़ी मेन्डानूग,
मुन्नी मापोरबून कान तीग आरू ओन लोगीन कान तीग कोमाड मेन्डान ईम,
मसीयाल इड़कीक मेन्डान नेतीर तीग लेग्गेतोर एरीक एञ्ञोर नार।
14 एटे एनोड ओडी आमीन मिलाकतानेड एञ्ञेड।
एऊदीकूल आरू एऊदीकूल चिलायेर एनी पुटा-पुटा चाजी मेन्डान नेनगाम मेन्डान बीतीन आकाट तो इरका कुचेरीन बोसड़ाकतेड आरू आ इरडू मान्देलीन ओकती लोग एरीकतेड।
15 ओड आपला मेनीन कुरूस पारे ती चाय्यीक इड्डी किली मूसाल कान तीग तियारची मेन्डान नियोमूलीन आरू रीती रिवाजूलीन नाचाक किली,
एऊदीकूल आरू एऊदीकूल चिलायेर एनी मेन्डान इरडू मान्देल तो लोगीन ओकती पुन्न लोगीन आकाट चाजू मिलाक किली
16 आम इरूली मापोरबून चेंगे मिला मिसा एरी किली ओकती मेन आकाट बिड़ी मेनूंग कुरूस पारेन तीग कुचेरीन नाचाकतेड।
17 आरू ओड वेरी किली मापोरबून तीग निक्के कोमाड मेन्डान इमीन,
आरू ओन लेग्गे मेन्डान एऊदीकूलीन मापोरबूनोड मिलेन ती मेन्डान काबेरीन वेनपीकतेड।
18 एटे एनोड ओन चेत्तूग आम इरडू मान्देली ओकती मापोरबून जियोमीन बेटी किली बुवा मापोरबूनेल एदू नाम्बीकताम।
पोरबूग काट काट्टी मेन्डान गुडी
19 आदूगी एपोर ले,
ईम पोर देचेतोर आरू आवूर लोग एरार।
एरोड मापोरबू तानूंग एलगाक मेन्डान लोगीनोड ओकती देचेतोर आरू मापोरबून कुटूमतोर एञ्ञोर नार।
20 आरू ईम पोरबू नीतीकतानेर आरू मापोरबून कान तीग काबेर वेन्नी किली लोगीन पोक चियरान गुरूकूल मेरचीकतान पाटेल ती,
पाया कोट्टी मेन्डान ओलेकीन आकाटतोर आय आरू आना ईसू मसीयाल तानी आञ केल्लीन आकाटतेड आय।
21 ओक-ओक बागीन बिड़ाक किली पूरा ओलेक काटरान आकाट ओक-ओक बिसवासी लोगीन बिड़ाक किली मापोरबूग आची मेन्डान ओक गुडीन आकाट तोन,
मसीयाल,
पोरबूग चुनतीकमेड।
22 इमीन बेले ओड ओकती चेंगे बिड़ाक किली मापोरबून जियोम डेरा मेन्डान कुड़ीया एरू चुनतीकमेड।