इपी 1

इपीसूस गेड़ेतेरूग

पोलूस लिकूरान चिट्टी

जुवारतानो

1 मापोरबून उवाट तीग ईसू काबेरीन लोगीन पोक चियू पोरबू नीतीकतान पोलूसीन टिटाक ले,

ईसू मसीयाल कान बिसवात चाजूरान मापोरबू तानूंग एलगाक मेन्डान इपीसूस गेड़ेत लोगूग लिकूरान चिट्टी:

2 आम्म बुवा मापोरबू आरू पोरबू ईसू मसीयाल टिटाक ले इमूंग माया पेम आरू चुक टोन्ड टोन्डी मेनको।

मसीयालीन चेंगे बिड़ी मेन्डानेरूग टोन्डूरान आसतीरूल

3 आम्म पोरबू ईसू मसीयालीन बुवा मापोरबूग जुवार एरको। ओड आम मसीयालीन चेंगे बिड़ी मेन्डानूग तान्न जियोम तीग आमीन चेलाक किली सरग तो इसाब तो जाम्मा बानीत आसतीरूलीन आमूंग चिञ्ञेड नाड। 4 आ आसतीरूल नातोव आय एनोड: आम ओन मुन्देल नाती केचूर चिलायेर आरू बोदी चिलायेर एरू मसीयालीन चेंगे बिड़ी मेनूंग, ओडी आमीन मोंजीपूरीन गेड़रान ले मुन्नी आचेड। 5 आरू ओड आमीन तान्न चोग तीग मुन्नीत ले उवाट चाजी किली, ईसू मसीयालीन तीग आम ओन कुड़ पापकूल एरू नीतीकतेड। आद्दी ओनूग मेन्न ती वेर्रान बिचार आरू उवाट मेन्डू। 6 आम ओन लाडराल मसीयालीन चेंगे बिड़ी मेन्डानूग, तान आमूंग इनाम चियी मेन्डान काबा एरीकतान माया पेम तीग ओनूग पिदीर एरको एनी आय आटनी चाजेड। 7 ओन चेंगे बिड़ी मेन्डानूग, मसीयालीन नेतीरोड आमीन मोल्ला चिड़ाक किली आम्म पापदेरोमूलीन माप चाजी चोड़ाकतेड। आदीन मापोरबू आपला चेड़ीगेन माया पेमीन चेत्तूग चाजेड। 8-9 आ माया पेमीन ओड आमूंग कुबेकेच-कुबेकेच चिञ्ञेड आरू आपला मुन्नी पाकीक मेन्डीड जे? आ उवाटीन आमूंग आपला गियान आरू आकेल तीग पारगाकतेड। आद्दी आय मसीयालीन कान तीग पूरा चाजूरान एनी मापोरबू मेन्न चाजी पारगाक मेन्डान उवाट। 10 आ उवाटीन पूरा चाजूरान आयची वादेक एदेक गेड़ी मेन्डान जाम्मा बानीलीन, सरग तो बानील आरू मोंजीपूर तो बानीलीन नातेक मापोरबू रुन्डाक किली मसीयालीन जाम्मेन पोडे मुकीयाल एरीकताड। 11 जाम्मेनी आपला मुर उवाट तीग चाजूरान मापोरबू आपला बिचार तीग मुन्नीत ले आमीन आची किली आम मसीयालीन चेंगे बिड़ी मेन्डानूग आपला लोग नीतीकतेड। 12 मसीयालीन कान पोईल-पोईल आचा चाजूरान आम एऊदीकूल मापोरबून आचरूत तो बेड़तो ताकोतीन मानोकोम आरू ओनीन जुवारपोकोम एनी आय आटनी चाजेड।

13 आरू ईम बेले मापोरबू इमीन बाचाकताड एन्डान एडो पाटेत चेत्त इसाबूलीन वेन्नी किली मसीयालीन बिसवात चाजेक ओन चेंगे बिड़ोर नार। आरू ईम मसीयालीन बिसवात चाजूरानूग, मापोरबू तान पाटा चियी मेन्डान नाती केचूर चिला जियोमीन ईम ओनोर आय एनी टोटीक, इमूंग चापेन आकाट चिञ्ञेड। 14 आ जियोम आम ओनेर एर्रान इसाब ती आम कुदे मापोरबून लोग आय एनी पूरा चोड़ाकतान बेरा आर्रे आमूंग चियी मेन्डान बायानेन आकाटतेड आय। लोग ओन आचरूत तो बेड़तो ताकोतीन मानेकेर आरू ओनीन जुवारपेकेर।

पोलूस बिन्ती जोड़रानो

15 मापोरबू ई जाम्मेनी आमूंग चाजेड। आदूगी आन ईम पोरबू ईसून कान बिसवात चाजूरान आरू मापोरबू तानूंग एलगाक मेन्डान जाम्मा लोगीन चोग चाजूरान काबेरीन वेन्नी किली, 16 इमूंग मापोरबून जुवारूक चायाना, आरू आन बिन्ती जोड़ेक इमीन चुरता चाज चाजी मेनमेन। 17 मापोरबू, आम्म पोरबू ईसू मसीयालीन आचरूत तो बेड़तो ताकोत तो बुवा, नाती केचूर चिला जियोमीन कान तीग इमूंग आकेल चियी किली ईम ओनीन पूरा पुनकोर एनी तानीन पारगाकपेकेड एनी बिन्ती जोड़ूमेन। 18 इमीन एटो आचा चाजू कूयूरानो मेन्डा आरू तान्न लोग एरू मापोरबू तानूंग एलगाक मेन्डानेरीन काबजे ती एर्रान निरबे काबा एरीकतान आसतीरूल एट्टोव आय, 19 आरू एडी काटारूक ओड़ा कियाल तो ओन ताकोत बिसवात चाजूरान आम्म कान एट्टोत आय एनी ईम पुनूंग मापोरबू इम मेन्नूल ती विलीज आटतीक किली इमीन चोमेनतेर एरीकपेकेड एनी बेले बिन्ती जोड़ूमेन। 20 आ बेड़तो ताकोत मापोरबू मसीयालीन चाय्यरान कान तीग जियोम पाटतीक किली सरग ती तान्न इजीत आरू पान्न तो पाड ती उन्डतीकपेक काम चाजूरू। 21 आटनी चाजी किली ओड ओनीन जाम्मा कोसकूल आरू मुकीयालेर, ताकोत्तेर, आरू आदीकारीकूल चिलाड आटनी जाम्मा पोद्दूलतेर ले बेड़तेड चाजेड; आदीन आमान ई जुग ती नी एरा, एरोड वेर्रान जुग ती बेले एर्रान आकाट चाजेड। 22 आरू मापोरबू जाम्मा बानीन मसीयाल केलूल किड़ी चाज चिञ्ञेड आरू ओडी मसीयालीन, पोरबून बिसवात चाजूरान मान्देल तो लोगीन तेल्लीन आकाट तो मुकीयाल चाज चिञ्ञेड। 23 जाम्मा बानीन जाम्मेन तीग पूराकतान मसीयालीन चेला बूलेल तीग कोप्पी मेन्डान मापोरबून बिसवात चाजूरान मान्देल तो लोगी ओन चोलेन आकाटतेर आय।