6
1 एरोड,
ए बिसवासी बायीयोवे आरू दादेरे!
एड एरको बिसवासी नातो केचूरूग बेले देरा पाडोड,
ईम पोरबून जियोम पोकरान आकाट चेलानोर,
दिरजे ती आटेरीन चोमजाक किली मापोरबूनेल मेन्डपूर।
आरू ईम बेले पोरकूरान कान पाडा मेनकोर एनी इमूंग ईमी लेक ती मेनूर।
2 ईम ओकूरूग ओकूर आबोड़ूल वादेक चेंग चिया चियी एरूर,
आरू आटनी चाजी किली मसीयाल नियोमीनa पूरा चाजूर।
3 एटे एनोड एड एरको तान नातेडी मेनाकोड बेले,
तानीन तानी आन नातेन आय आले एनी चोमजोड,
ओड तानीन तानी दोका चियमेड।
4 एरोड ओकूर-ओकूर आपला ई कामूलीन पोरकूर,
तेबे आवूर लोगीनोड आपलेन काटारतानूग एरा,
एरोड आपलेन इसाब ती नी बोड़पान एर्रान बेरा टोन्डूरा।
5 एटे एनोड आमूंग जाम्मेगी ओकूर ओकूरूग आपला चेलनूकूड़ूल तो इसाब ती आपलेगी लेका चियू लागूरा।
6 एरीन मापोरबून पोद्दीन मेरचीकतानो मेन्डा,
ओड तानीन मेरचीकतानेडूग,
तान्न लेग्गे एंगोट रेच्चाट बानील मेन्डाव,
आवीन तीग बाटा चियू लागूरा।
7 आञ्ञोती एरा,
दोका तिनमोर।
मापोरबून एडी बूलकाक ओड़ार।
एटे एनोड एड एटे चाजूराड ओड आटनी पालटा बेटूराड।
8 एटे एनोड एड आपला मेन्न के लागेन तो बिचारूलीन चाजूराड ओड तान्न मेन्न के लागेन तो बिचारूल तीग डेन्ड बेटूराड;
आरू एड पोरबून जियोमीन बिचारूलीन मानूराड ओड पोरबून जियोम तीग जुग-जुग तो जियोम बेटूराड।
9 आम्मोर रेच्चाट कामूलीन चाजू एसकोट एरमोर।
एटे एनोड एसकोट एराकोड नीतीकतान बेरे ती आम रेच्चाट इनामीन बेटूराम।
10 आदूगी आम्मोर एत्ती बेरा टोन्डोड आत्ती जाम्मेगी रेच्चा चाजार।
आरू आदूग ले बेले आगेर बिसवात चाजूरान चेत्तूग ओकती कुटूम तो लोगीन आकाट मेन्डानेरूग रेच्चा चाजार।
चेरा चेरीत पाटेल
11 चूड़ूर!
आन कुदे एटे आन्न केय्योड बानेलेक-बानेलेक बानेलोड इमूंग लिकूमेन।b
12 लोग चूड़ेकेर एनी टोटीकतान कामूल चाजूरानेरी गो,
इमीन जियोम पाड तो तीप तोलीन कुडीक आलवाल चियू कान्डूकमेर।
आरू ओर,
कुरूस पारे ती कोटीक एर्रान मसीयालीन बिसवात चाजोड एर्रा एनी मेरचीकपोड,
एऊदीकूल तामीन सताव चाजूरार एनी आय आटे चाजूमेर।
13 एटे एनोड जियोम पाड तो तीप तोलीन कुडीक एर्रानेर कुदे गो मूसाल नियोम ती चेलारा।
एरोड ओर ताम इमीन जियोम पाड तो तीप तोलीन कुडीक इट्टेर एन्डान इसाब ती बोड़पान एरू आय इमीन जियोम पाड तो तीप तोलीन कुडीक मेरचीकमेर।
14 आन एरोड,
पोरबू ईसू मसीयाल कुरूस पारे ती कोटीक एर्रान इसाब तो पाटेन चायी आरोई पाटेन इसाब ती बोड़पान एराना।
आरू आन बेले ओन चेंगे कोटीक एर्रानेडीन आकाटतेन मेन्डानूगी आय,
आनूंग ई मोंजीपूर तो पाटेल ती चेलू लागाया आरू ई मोंजीपूर तो लोग एके आन्न इसाबूलीन चोमजू ओड़ार।
15 एटे एनोड जियोम पाड तो तीप तोलीन कुडरानो चिलाड कुडायो नाती बेले एटनी एराया।
एरोड मापोरबू आमीन बादलाक किली चियरान पुन्न जियोमी मुकीयाट इसाब आय।
16 आरू ई नियोम ती चेल्लान मापोरबून चेत्त इसराएलc लोगूग मापोरबू चुक चियकेड आरू जियोम नोयपीक-नोयपीक मेनकेड।
17 एपोर ले आनीन एडी आबोड़ चिया मेनकेर।
एटे एनोड आन ईसून कामीयाल आय एनी टोटीकतान दागूलीन आन्न मेन ती पात्ती किली चुरलूमेन।
18 ए बिसवासी बायीयोवे आरू दादेरे!
आम्म पोरबू ईसू मसीयालीन माया पेम इम जियोमीन चेंगे मेनको।
आटनी एरको।