5
1 आञ्ञोती एरा।
आम एर काबजे ती नी मेना मेनकोम एनी गो मसीयाल आमीन चोड़ाकतेड नाड;
आदूग मोंजीबूत ती मेनूर,
आरू कामीयालेर एरीकतान नियोमूल ती चेल्लान इसाब तो बोजेन मारी काञू बीड़ूमोर।
मसीयाल आमीन चोड़ाकतेड
2 चूड़ूर!
आन पोलूस इमीन पोक्कूमेन:
ईम मापोरबून मुन्देल देरमी एरीक एरू जियोम पाड तो तीप तोलीन कुडीक इडोड,
इमूंग मसीयाल कुरूस पारे ती चाय्यरानो पोका चेन्डा।
3 मापोरबून मुन्देल देरमी एरीक एरू जियोम पाड तो तीप तोलीन कुडीक इडरानेर,
इमूंग जाम्मा नियोमूलीन मानू ई लागूरा एनी मारी बेले आन ईम ओकूर ओकूरीन चेत्तेगी पोक चियमेन।
4 नियोमूलीन मानी किली देरमीकूल एरीक एरू कान्डूकमोर जे?
ईम मसीयालीन तीग एलगोर नार आरू ओन माया पेमीन पोत गोरोर नार।
5 आम एरोड,
मसीयालीन बिसवात चाजूरानूगी मापोरबून मुन्देल देरमीकूल एरीक एर्राम एन्डान आचा चाजी किली पाव चूड़ चूड़ी मेनमोम।
पोरबून जियोमीन तीगी आ आचेन आम बेटोम।
6 आरू ईसू मसीयाल चेंगे बिड़ी मेन्डानूग,
जियोम पाड तो तीप तोलीन कुडरानो चिलाड कुडायो इरडूकी नाती बेले काम पाडाया।
एरोड मसीयालीन बिसवात चाजूरान चेत्तूग आवूर लोगीन चोग चाजूरानो ई जाम्मेन ले मुकीयाट इसाब आय।
7 ईम गो रेच्चायी चेलूरूर।
एपोर एड आय चेत्तीन मानूमोर एनी इमीन आटकाकतेड?
8 आटे बेरपेला मेरचीकतानो इमीन कूयूरान मापोरबून टिटाक ले एरा।
9 किन्डीक आकाट पुलतान पोर्र मोवूरान जाम्मा पोर्रीन पुलपीकतान आकाट टेगू-टेगू मेरचीकतानेरीन पाटेल दिंगोट आकाट मेनोड बेले जाम्मेनी नाचाकताव।
10 आन इम इसाब ती ईम आन्न बिचारीन चायी आवूर तो बिचारीन पातीयाकपारा एनी पोरबून कान चेत्तेगी आचा चाजूमेन।
आरू एड इमीन बुलकाकताड,
ओड एड एराडा नांग,
ओड डेन्ड बेटूराड।
11 एरोड ए बिसवासी बायीयोवे आरू दादेरे!
ओदेर बोदी चियरान आकाट आन एबे बेले जियोम पाड तो तीप तोलीन कुडीकपूर एनी मेरचीकमेन एरोड,
आनीन एऊदीकूल एबे सताकपेरामीन।
आरू आटनी मेरचीक मेनोड,
कुरूस पारे ती कोटीक एर्रान मसीयालीन बिसवात चाजूर एनी आन मेरचीकतान ती ओर मेन्न मुड़ा टुटाक एरेरामीन।
12 बेरपेला जियोम पाड तो तीप तोलीन कुड्डू तियारची किली इमीन बुलकाकतानेर,
तामीन तामी,
ताम्म जाम्मा जियोम पाड्डीन कुडीक एरोड गो रेच्चा एर्रूमीन।a
ओकूरीन ओकूर चोग चाजूर
13 ए बिसवासी बायीयोवे आरू दादेरे!
ईम एर काबजे ती नी मेनमोर एनी कूयी मेन्डानोर आय;
एरोड ईम काबजे ती चिला कान्डूग,
मेन्न के लागेन तो कामूल चाजू बेरा टोन्डोतो एनी चोमजूमोर;
एरोड चोग तीग ओकूर ओकूरीन सेवा चाजूर।
14 एटे एनोड,
ईम आपलेनी चोग चाजूरान आकाट इम लेग्गाट तो लोगीनोड चोग चाजूरb एन्डान ई ओकती पाटे ती जाम्मा नियोमूल पूरूमोव।
15 एरोड ईम ओकूरीन ओकूर काचा काच्ची,
तापा ताप्पी,
एर एरी मेनोड,
चूड़ूर!
ईमी ओकूर ओकूरीन मुरजाकपाका मेनकोर एनी लेक ती मेनूर।
मापोरबून जियोम पोकरान आकाट चेलूर।
16 एरोड आन पोक्कूमेन:
ईम मापोरबून जियोम पोकरान आकाट चेल चेली मेनूर।
तेबे ईम मेन्न के लागेन तो बिचारूलीन पूरा चाजारा।
17 एटे एनोड मेन्न के लागेन तो बिचारूल मापोरबून जियोमीन बिचारूलीन विरूद मेन्डाव आरू मापोरबून जियोमीन बिचारूल मेन्न के लागेन तो बिचारूलीन विरूद मेन्डाव।
ईव ओकूत ओकूतीनोड विरूदी एरी किली ईम चाजू मेन्न चाजूरानोन चाजूरान तीग इमीन आटकाकताव।
18 आरू ईम मापोरबून जियोम पोकरान आकाट चेलूमोर एरोड,
ईम नियोमूलीन काबजे ती चिल्लार।
19 मेन्न के लागेन तो कामूलीन गो ईम पुट्टोरी।
आव ईव आय:
दारीयाट कामूल,
किच किचाट कामूल,
दोस पाडरान कामूल,
20 मुरीतूलीन मानूरानो,
गिड्डा चाजूरानो,
विरूद एर्रानो,
कावडी उयरानो,
कुचेर एर्रानो,
रिच एर्रानो,
आपलेनी चान्दीकतान उवाट,
कुरलाकतानो,
पुटा-पुटा एलगूरानो,
21 जिवड़ेय एर्रानो,
निसा उन्नी चोरनूरानो,
मातवारकूल चेंगे बिड़ी जाल-जाल एर्रानो,
आरू आटनीत कुबे पाटेल आय।
आन इमीन ई पाटेल इसाब ती मुन्नी की लेक ती मेनूर एनी पोक्की मेन्डीन।
आटनी एबे बेले लेक ती मेनूर एनमेन।
एड एरको ईटो पाटेलीन चाज चाजी मेन्डार,
ओर मापोरबू आंगरूरान इसाबीन काबजेतेर एरू ओड़ार।
22 एरोड पोरबून जियोम पोकरान आकाट चेलोड टोन्डूरान पाल आकाट तो पाटेल ईव आय:
चोग,
वेड़का,
मिलेन ती मेन्डानो,
दिरजे ती मेन्डानो,
जियोम नोयपीकतानो,
रेच्चाट कामूल चाजूरानो,
बिसवात चाजू एर्रान बातेरतेड मेन्डानो,
23 सोजाल मेन्डानो,
सामालची मेन्डानो;
आरू ईटो कामूल तो विरूद ती मापोरबून कागेत ती आरोई नियोम चिल्ला।
24 आरू मसीयाल ईसून कान बिसवात चाजूरानेर आपला मेन्न के लागेन तो बिचारूलीन आवीन लालेचूल चेंगे कुरूस पारे ती कोटीक इडरानेर आकाटतेर एञ्ञेर नार।