10
1 ए बिसवासी बायीयोवे आरू दादेरे!
एऊदीकूल बाचेकेर एनी आन मेन्न तीग मेन्न चाजूमेन आरू मापोरबून बिन्ती बेले जोड़ूमेन।
2 ओर निक्के बोकती तीग मापोरबून सेवा चाजूमेर एनी ओर बीतेर ती आन गोवाई चियमेन।
एरोड ओर ओनीन एटे सेवा चाजूरानो आय एनी पूनाका चाजूमेर।
3 एटे एनोड ओर मापोरबू लोगीन देरमी एरीकतान इसाबीन पूना कियाल एरी किली तामूंग तामी नियोमीन मानी किली देरमी एरू कान्डूकमेर।
4 आरू मसीयालीन बिसवात चाजूरानेर जाम्मेनी मापोरबू देरमी एरीकताड एन्डानोन मानारा।
एटे एनोड मसीयाल नियोमीन पूराक किली नियोमूलीन मानोडी एड एरको देरमी एर्रार एन्डान पाटेन मुरजाकतेड।
बाचाकतान इसाब तो पाटा जाम्मेगी आय
5 नियोमूल तीग देरमी एर्रान इसाबीन बीतेर ती एड आवीन मानूराड ओड आवीन तीग जियोम बेटूराडa एनी मूसाल मेनगा लिकेड नाड।
6 एरोड बिसवात चाजूरान तीग देरमीकूल एरीक एर्रान इसाब ती:
(मसीयालीन सरग तीग इड़कीक) सरग ती एड चोतराड?
7 चिलाड (मसीयालीन चाय्यरान कान तीग जियोम पाडीक किली पोडी एन्दरू) एड किड़ीतपूर ती इड़ूराड?
एनी इम मेन्न ती पोक्कूमेन।
8 एरोड मापोरबून कागेत नातो पोक्कूमो?
“आ पाटा इन लेग्गे,
इन चोन्ड ती,
आरू इन मेन्न ती मेन्डा”b एनी मापोरबून कागेत ती लिका मेन्डा।
आयची बिसवात तो पाटेन गो आय आम मेरचीकमोम।
9 आ पाटा इद आय:
ईन इन चोन्ड ती ईसून पोरबू आय एनी पोक्की किली मापोरबू ओनीन चाय्यरान कान तीग जियोम पाटतीकतेड एनी मेन्न तीग बिसवात चाजोड ईन बाचाकतान इसाबीन बेटूरात।
10 एटे एनोड एड एरको मेन्न तीग बिसवात चाजी किली देरमी एरीक एर्राड,
आरू चोन्डोड मानी किली बाचाकतान इसाबीन बेटूराड।
11 एटे एनोड,
“एड एरको ओनीन बिसवात चाजूरानेड लाज पाडाडा”c एनी मापोरबून कागेत पोक्कूमो।
12 एटे एनोड एऊदीकूल आरू एऊदीकूल चिलायेर एनी आवूर-आवूर चिल्लार।
पोरबू ओकूरी जाम्मा लोगीन पोरबू आय।
ओड तान्न पिदीरीन पातरान जाम्मेगी चेड़ीगेन आसतीर चियराड।
13 एटे एनोड “एड एरको पोरबून पिदीरीन पातरानेड बाचाकतान इसाबीन बेटूराड।”d
14 आटे तीग एर कान ओर बिसवात चाजेरा ओन पिदीरीन एटे पातरार?
आरू एतोड बेले एर बीतेर ती वेनारी ओनीन एटे बिसवात चाजेकेर?
आरू वेनपीकतानेड चिलाका एटे चाजी वेनदार?
15 आरू वेनपीक चोटपाका एटे वेनपीकतार?
आदूगी “ए बाबा!
एड एडो पाटेन वेनपीकतार ओन केलूल निक्के चाबाव तोव आयe”f एनी लिका मेन्डा।
16 एरोड जाम्मा लोग आ एडो पाटेन पातीयाकपेरा।
आदूग एसाया,
“ए पोरबू!
आम केडीकतान पाटेन एडी बिसवात चाजेरा”g एनी पोक्केड।
17 एडो पाटेन वेनोड बिसवात चाजू एर्रा,
आरू मसीयालीन एडो पाटेन वेनपीकपोड गो वेनूंग एर्रा।
18 एरोड ओर वेट्टेर आरू चेत्तेगी वेट्टेर एनी आन पोक्कूमेन।
एटे एनोड,
“ओर पोल्ला गुलाय मोंजीपूर ती चेन्डो
आरू ओर पाटेल मोंजीपूर तो टोकूल आर्रे एदोव”h
एनी लिका मेन्डा।
19 आन मारी पोक्कूमेन,
एटे इसराएली लोग चोमजा मेन्डीर आदूग?
मूसाल एऊदीकूल चिला देचेल-देचेल तो लोगीन बीतेर ती,
“आन देचेतेर चिला बातेरतेरीन पेम चाजी किली
इम मेन्न ती कुचेर उपजाकतान;
आन ओक बाकवाट देचेतेरीन पेम चाजी किली
इमीन रिच एरीकतान”i
“आनीन कानपायेर आनीन बेटेर,
आरू आनीन जाच आडा लोगूग आन देका पाट्टेन”j