मापोरबू आरू ओन आचूरान लोग
9
1 एपोर,
नाती आमीन मापोरबून चोग तीग चान्डाक ओड़ा एनोड,
आन्न लोग,
इसराएलीकूल नांग मापोरबून कान तीग कोमाड मेन्डार एनी ओर चेत्तूग आनूंग निक्के मुर मुरा बावूमो आरू आन्न बीतराम तो मेन्नीन गोवाई एतोड नांग ओरूग नोय नोयी मेन्डा।
2 एटे एनोड मोंजीपूर तो इसाब ती ओर आन्न कुटूम तो तोल्लेनकूल आय।
आ चेत्तूग ओरूगी टोन्डूरान चेराप आनूंगी काटोको आरू मसीयाल तीग आनी कोमाड मेनकेन एनी मेन्न चाजूमेन।
3 आन टेगाना,
मसीयालीन चेंगे बिड़ी मेन्डानूग आन चेत्ते पोक्कूमेन आरू आन्न मेन्न बेले नाती केचूर चिला जियोमीन चेंगे इदीन गोवाई चियमो
4 ओर इसराएली लोग आय;
आरू ओरूगी मापोरबून कुड़ बेटालेर एर्रान पान्न मेन्डा आरू मापोरबू ओरूग तान्न आचरूत तो बेड़तो ताकोतीन चिञ्ञेड;
आरू मापोरबू चिड़ाक मेन्डान जुमानूल ओरोवी आय।
ओरूग ओड नियोमीन आरू ओर तानीन सेवा चाजूरान इसाबूल तो रीती रिवाजूलीन चिञ्ञेड नाड आरू ओरूग पाटेल बेले चिञ्ञेड नाड।
5 इबराईम,
इसाक आरू याकूब एन्डानेर ओर पुरकेतेर आय,
आरू मसीयाल बेले मोंजीपूर तो इसाब तीग ओर तेरान ती जेनोम एञ्ञेड।
ओडी जाम्मेग ले बेड़तो मापोरबू आय,
ओनूग जुग जुगूग जुवार लागोको।
आटनी एरको।
6 एरोड मापोरबून पाटेल आटकाक एञ्ञोव एन्डान आकाट एरा।
एटे एनोड एड एरको इसराएलीन तेरान तीग जेनोम एरोड बेले चेत्त इसराएलीकूल एरारा।
7 आरू इबराईमूग कुबे पापकूल मेन्डीर।
एरोड बेले “इन चिन्ड इसाकीन तीग इन तेरानतेर एर्रार”b एनी लिका मेन्डा।
आदूग इबराईमीन जाम्मा चिन्डूल ओन तेरानतेर एरारा।a
8 चिलाड,
मोंजीपूर तो इसाब तो चिन्डूल मापोरबून चिन्डूल एरारा,
एरोड मापोरबू चिड़ाक मेन्डान जुमानीन इसाब तो चिन्डूली तेरानतेर आय एनी मानू एर्रार।
9 एटे एनोड “आन पोरूके ई वादेक वेर्रान,
आरू इन आडेय सारेग चिन्ड जेनमूराड”c एनी चिड़ाक मेन्डान जुमान पोक्कोतो।
आ चिन्ड आय इसाक।
10 आरू आमान आद्दी एरा,
रिबीका बेले आम्म पुरकेत बुवा इसाकीन तीग मेन ती मेट्टो।
11-12 आरू एम पापकूल जेनमाका मेनेक आरू ओर रेच्चाट चिलाड कियाल चाजाका मेनेक,
“बेड़तेड पिटीतेडीन कामीयाल एर्राड”d एनी ताम्म ईय्येन मापोरबू पोक्केड।
आद मारी मापोरबू तान तान्न उवाट तीग लोगीन आची किली कूयूराड आरू ओर कामूलीन चेत्तूग एरा एनी टोटीकमो।
13 “आन याकूबीन चोग चाजेन,
एरोड एसेन बाकनेन”e एनी लिका बेले मेन्डा।
14 इदीन आम नान एन्डाम आले?
मापोरबून कान नियाव चिल्ला एनी पोक्कू एर्रा काय एटे?
आटनी मुरले एराया।
15 एटे एनोड ओड मूसालीन,
“आन एरूग जियोम नोयपीक बावोड ओनूग जियोम नोयपीकतान,
आरू एरीन केरमा गोटोक एरू बावोड ओनूग केरमा गोटोक एर्रान”f एनी पोक्केड।
16 आदूगी मापोरबू लोगीन आचूरान इसाब एड एरको मेन्न चाजोड एरा आरू नातो चाजोड बेले एरा,
एरोड मापोरबू तान जियोम नोयपीक किली ई गो आचूराड।
17 एटे एनोड,
ओड कोस पिरोनीन,
“आन इन कान आन्न ताकोतीन टोटीक किली आन्न पिदीरीन जाम्मा मोंजीपूर ती वेलकीकतान एनी गो इनीन नीतीकतेन नान”g एनी मापोरबून कागेत ती पोक्केड।
18 आदूगी मापोरबू एरूग बावोड ओनूग जियोम नोयपीकताड,
आरू एरीन बावोड ओनीन ऊबागेरी एरीकताड।
मापोरबू डान्डूरानो आरू ओन चोग
19 आदूगी,
एरू नाम्बीकता,
इम कान तीग ओकूर आनीन,
“ईटे आय एरोड मापोरबू नांग बोदी चियराड?
आरू एड ओन उवाटीन विरूद ती चुलूक नाम्बीकताड?”
एन्डाड।
20 एरोड ए मांजेने!
ईन मापोरबून उलटा पुलटा पोक्की किली जीतू ओड़ात।
गेड़रानेडीन ओन गेड़रान बानी,
“ईन आनीन नांग ईटे गेड़ोत?”
h एनी पोक्कू ओड़ा।
21 एटे ओकती तूक डिन्डे तीग,
ओक कुन्डरीन मुकीयाट कामूग,
आरू मारी ओकूतीन सादा कामूग एनी गेड़ू,
कुमालूग तूकीन पोडे पान्न चिल्ला आदूग?
22 आटनी मापोरबू तान डान्डूरानोन टोटीक आरू तान्न लावीन टोटीक मेन्न चाजोड बेले आरू तानीन रिच एरीकतान लोग मुरजाकतान बातेरतेर मेट्टेर एरोड बेले ओड दिरजे ती मेन्नी किली ओरीन मुरजाकपेडा।
23 ओड इजीत तो मान चियू मुन्नीत ले तायार चाजी मेन्डान,
तान जियोम नोयपीकतान लोगूग,
तान्न निरबे आचरूत तो बेड़तो ताकोतीन टोटीक आटनी चाजेड।
24 आमान एऊदीकूल मेन्डान आमीनी एरा,
एरोड एऊदीकूल चिलायेरीन बेले कूयेड नाड।
25 ओसेन कागेत ती,
“आन्न लोग चिलायेरीन
आन ‘आन्न लोग’ एनी कूयूरान;
आरू आन्न चोग तो चिलायोतीन
‘आन्न लाडराट’ एनी कूयूरान”i
एनमेड।
26 “आरू ओरीन ‘ईम आन्न लोग एरारा’
एनी पोक्की मेन्डीड जे?
आयची पाड ती नी ओरीन
‘जियोम मेन्डान मापोरबून चिन्डूल’ आय एनी पोकराड।”
j
एनी ओसे पिदीर तो कागेत ती मापोरबू पोकरान आकाट एञ्ञो।
27 आरू एसाया बेले इसराएल लोगीन बीतेर ती,
“इम चिन्डूल पापकूल सोमून्द तो कुडीत मानीन आकाट कुबे लोग मेनोड बेले ओर कान तीग दिंगोट आकाट बाचूरान लोगीन मापोरबू बाचाकताड।
28 एटे एनोड पोरबू तान पोकरानोन मोंजीपूर ती पूरा चाजूराड आरू आदीन जेटके नी चाजूराड” एनी कूयी-कूयी पोकरीड।k
29 आरू
“सरग तो पालटेनकूल मान्देत पोरबू आमूंग तेरानतेर ओदेरीन बेले बाचाकपाकोड,
गो आम सदोम आरू अमोरा गेड़ेलतेर आकाट नाचाक एर्रूमीन”l
एनी एसाया मुन्नीत ले पोक्की मेन्डान आकाट बेले एञ्ञो।
इसराएल लोग मापोरबून बिसवात चाजा इसाब
30 इदीन आम नान एन्डाम आले?
मापोरबून नेंजेर ती देरमी एरू कानपा एऊदीकूल चिला लोग मापोरबून नेंजेर ती देरमी एरीक एञ्ञेर।
ओर बिसवात चाजूरानूग देरमी एरीक एञ्ञेर।
31 एरोड इसराएलीकूल मापोरबून नेंजेर ती देरमी एरू मूसाल नियोमीन मानूरीर एरोड आ नियोम ओरीन देरमीकूल एरीकपोया।
32 आद मारी नांग आय?
ओर मसीयालीन बिसवात चाजी देरमीकूल एरीक एरू कानपाका,
नियोमूल ती पोकरान आकाट रेच्चाट कामूल चाजी आदीन कानतानूग आटनी एञ्ञो।
आटेरूग मसीयाल उट तिरीकतान केल्लीन आकाट एर चेन्डेड।
33 “चूड़ूर!
आन सियोनm ती ओक उट तिरीकतान केल्लीन आकाटतेडीन,
आरू मारकाडा एर्रान चाटरेन आकाटतेडीन इडरान;
आरू ओन कान बिसवात चाजूरानेड एड एरको लाज पाडारा”no
एनी मापोरबून कागेत ती लिका मेन्डान आकाट एञ्ञो।