रोमी 2

मापोरबून चेत्त देरोम तीग नियाव चिड़ाकतानो

1 आटनी मेन्डानूग ए मांजेने! आवूर लोगीन नियाव चियमोत जे? ईन एड एरोड बेले नाती नी नीनगा बिड़ाक ओड़ात। एटे एनोड, ईन नातो पाटे ती आवूरतेडीन नियाव चिड़ाकमोत, आयची पाटेन ईनी बेले चाजूरानूग इनूंग ईनी केचूरतेड एरीक एरमोत। 2 आरू एड एरको ईटो कामूल चाजूरान जाम्मा लोगीन मापोरबू चेत्त देरोम तीग नियाव चिड़ाकताड एनी आम पुट्टोम। 3 आरू ए मांजेने! ईन ईटो कामूलीन चाजूरान लोगीन बोदी चियी किली ईनी आ कामूलीन चाजूरानूग ईन मापोरबू नियाव चिड़ाकतान तीग बाचूरात एनी चोमजूमोत काय एटे? 4 चिलाड मापोरबू निक्के जियोम नोयपीकतानेड, चान्डे डेन्ड चियायेड आरू निक्के दिरजे ती मेन्डानेड आय एन्डानोन ईन पोकातो आय एनी चोमजूमोत काय एटे? ईन मेन्नीन उजराकतानो एनी गो आय मापोरबू इनूंग जियोम नोयपीकमेड एनी पूनात आदूग? 5 एरोड इन मेन्न ऊबागेरी आरू आगेरी एरी मेन्डानूग मापोरबू डान्डूरान चिरीक ओड देरोम तीग नियाव चिड़ाकतानो पारगोड एरेक इनूंग टोन्डूरान डेन्डीन ईनी चान्दीकमोत। 6 एटे एनोड ओड ओकूर ओकूरूग ओन कामूल इसाब ती पालटा चियराड। 7 एड दिरजे तीग रेच्चाट कामूल चाज चाजी मापोरबू तानूंग इजीत तो मान चियरानोन आरू तानूंग पिदीर काट्टीकतानोन आरू तानीन एतोडी चाय्यायेड एरीकतानोन कानची-कानची मेन्डार ओरूग ओड जुग-जुग तो जियोम चियराड। 8 एरोड एड एरको नातेल एरको तानूंगी लाव पुच्चू कानची किली चेत्तीन मानाका ओदेरोम ती चेलानेडीन मापोरबू रिच एर्राड आरू डान्डूराड। 9 आरू कियाल तो कामूल चाजूरान जाम्मा लोग आबोड़ूल आरू डालबीकोल एर्रानोन बेटूरार। आवीन मारी पोईल एऊदीकूल बेटूरार; आनातले एऊदीकूल चिलायेर बेले बेटूरार। 10 आरू एड एरको रेच्चाट कामूल चाजूरार मापोरबू ओरूग इजीत तो मान चियराड, पिदीर काट्टीकताड, आरू चुक चियराड। आवीन मारी पोईल-पोईल एऊदीकूलूग चियराड। आनातले पिटतेल एऊदीकूल चिलायेरूग बेले चियराड। 11 एटे एनोड मापोरबूग जाम्मा ई लोग ओकती काटारतेर।

12 एटे एनोड मूसाल नीतीन पूनायेर बेले ताम चाजूरान पापदेरोमीन चेत्तूग नाचरार। आरू मूसाल नीतीन पुन पुनी पापदेरोम चाजूरानेर एड एरको मूसाल नीतीन तीगी नियाव चिड़ाक एर्रार। 13 एटे एनोड मूसाल नीतीन आमान वेनदानेर मापोरबून नेंजेर ती देरमीकूल एरारा। एरोड मूसाल नीतीन ती पोक्की मेन्डान पाटेल ती चेलानेरीनी मापोरबू देरमीकूल एरीकताड। 14 एऊदीकूल चिला लोगीन कान मूसाल नीती मेनाडी बेले ओर तामूंग तामी मेन्न तीग मूसाल नीती ती मेन्डान पाटेलीन चाजेक, नीती चिला आ लोग तामूंग तामी नीतीन आकाट मेन्डार। 15-16 ओर ताम चाजूरान कामूल तीग ताम्म मेन्न ती मूसाल नीती मेन्डा एनी टोटीकतार। आरू ओर बीतराम तो मेन्नीन गोवाई बेले गोवाई चियमो आरू आन वेनपीकतान एडो पाटेन इसाब ती, मापोरबू ईसू तीग मांजेन पाकी मेन्डान पाटेलीन नियाव चिड़ाकतान चिरीक ओर बिचारूल ओरीन बोदी चियराव चिलाड बोदी चिलायेड एनी चिड़ाकताव।

एऊदीकूल आरू नियोमीन मानूरानो

17 एरोड ईन आपलेनी “आन एऊदी आय” एनी किली “मूसाल नीती आन्न कान मेन्डानूग आन मापोरबूनेन आय, आदूग ओड आनीन बाचाकताड” एनी बोड़पान एरमोत एरोड, 18 आरू मूसाल नीतीन तीग इनीन मेरचीकतानो मेन्डानूग, ईन मापोरबून उवाटीन पुन्नी किली नातोव निरबे रेच्चाट पाटेल आय एनी मानोत एरोड, 19 मूसाल नीती तीग पूरा गियान आरू पूरा चेत्त आनूंग टोन्डोतो ना एनी किली ईन आपलेनी, आन मापोरबून पावीन पूना कानालेर आकाटतेरूग पाव टोटीकतानेन आय; आरू चीकोड ती मेन्डानेर आकाटतेरूग विलीजीन आटतीकतानेन आय; 20 आरू बुदी चिलायेर आकाटतेरूग मेरचीकतानेन आय आरू पापकूल आकाटतेरूग केडीकतानेन आय एनी ईन आपलेनी चेत्ते चोमजूमोत एरोड, 21 ईन आवूर लोगीन मेरचीकमोत जे? आपलेनी ईन नांग मेरचीकपाता गो? ईन डोंगरानो एरा एनी पोक चियमोत, एरोड ईनी डोंगूमोत जे? 22 ईन आवूर लोगीन दोस पाडरान कामूल ती बीड़ूमोर एनी पोकरात, एरोड ईनी दोस पाड्डूमोत जे? ईन मुरीतूलीन गिन-गिनाकतात, एरोड ईनी गुडील तो देनीन जुर्रात जे? 23 ईन “मूसाल नीती आनूंग मेन्डा” एनी बोड़पान एरमोत, एरोड मूसाल नीतीन मानाका मापोरबून इजीत चुम्मूमोत। 24 एटे एनोड ओन कागेत ती लिका मेन्डान आकाट “इम चेत्तूगी एऊदीकूल चिला लोगीन नाड़बूल मापोरबून पिदीर निन्दरू एरमो।”

25 ईन मूसाल नीती ती चेलोड गो कुडीकतानो बेले काम पाडरा ई। एरोड ईन मूसाल नीती ती चेलाकोड एके ईन जियोम पाड तो तीप तोलीन कुडीक मेनोड बेले, मापोरबून नेंजेर ती कुडीकपा कियाल एर्रात। 26 एरोड जियोम पाड तो तीप तोलीन कुडीकपायेड एड एरको मूसाल नीती ती चेलोड, ओड नियोमूल ती चेल्लान चेत्तूग, मापोरबून नेंजेर ती जियोम पाड तो तीप तोलीन कुडीकतान आकाटतेड एर्राड। 27 एऊदीकूल मेन्डान इमूंग मूसाल नीती आरू जियोम पाड तो तीप तोलीन कुडीकतान नियोम तो लिका मेन्डा। एरोड ईमी मूसाल नीतीन मानारा। आदूग आपला मेन ती जियोम पाड तो तीप तोलीन कुडीकपाका बेले मूसाल नीती ती चेल्लान मांजा मेन्डाड जे? ओड इमीन “ईम मूसाल नीतीन मानायोर आय” एनी नियाव चिड़ाकताड। 28 एटे एनोड आमान ईन एऊदी कुटूम ती जेनोम एर्रानूग चिलाड जियोम पाड तो तीप तोलीन कुडीक एर्रानूग चेत्त एऊदी एराता। 29 एरोड एड मेन्न तीग मूसाल नीती ती चेलूमेड, ओडी चेत्ते एऊदी आय। चेत्ते जियोम पाड तो तीप तोलीन कुडीकतानो नातो आय एनोड: आद मेन्न तीग मापोरबून जियोम चियरान ताकोतोड नियोम ती चेल्लानो आय। आद लिकी मेन्डान नियोम तीग आमान मेनीन ओक बागीन कुडीक एर्रान इसाब एरा। आटेरीन मांजा रेच्चाल आय एनी पोकाकोड बेले, मापोरबू ओनीन रेच्चाल आय एनी पोकराड।