रोमी 1

रोमी गेड़ेतेरूग

पोलूस लिकूरान चिट्टी

जुवारतानो

1 ईसू रोजे तीग तो कामीयाल, पोरबू नीतीकतानेड आरू मापोरबू तान्न एडो पाटेन वेनपीक आची मेन्डान आन पोलूस लिकूरान चिट्टी: 2 ई एडो पाटेन बीतेर ती मापोरबू मुन्नीत ले ई तान्न कान तीग काबेर वेन्नी किली लोगीन पोक चियरान तान्न गुरूकूलीन तान पाटा चियरानोन तान्न नाती केचूर चिला मापोरबून कागेत ती लिकाकतेड। 3 आ एडो पाटा तान्न चिन्डीन बीतेर तो आय। ओड ई मोंजीपूर तो इसाब ती दाऊद मेनगेन तेरान ती जेनोम एञ्ञेड। 4 एरोड ओड एके नाती केचूर चिला जियोमोड, मापोरबून ताकोत तीग, चाय्यरान कान तीग जियोम पाटतीक एर्रानूग मापोरबून चिन्ड आय एनी टोटीक एञ्ञेड। आयची ईसू मसीयाल आय आम्म पोरबू। 5 ओड आमूंग पोरबू नीतीकतानेर एर्रान पोद्द चियी किली आपला माया पेमीन टोटीकतेड। आदूग ओन पिदीरीन चेत्तूग देचेल-देचेल तो लोग ओनीन बिसवात चाजी मानेकेर एनी आम ओन पाटेन वेनपीकमोम। 6 ओर कान तीग, ईम बेले ईसू मसीयालीन लोग एरू कूयी मेन्डानोर आय।

7 आदूगी रोमी गेड़े ती मेन्डान मापोरबू माया चाजूरान आरू तान तानूंग एलगाकतानेर एरू कूयी मेन्डान जाम्मा लोगीन पिदीर ती आन ई पाटेन लिकूमेन।

आम्म बुवा मापोरबू आरू पोरबू ईसू मसीयालीन कान तीग इमूंग माया पेम आरू चुक टोन्ड टोन्डी मेनको।

पोलूस रोमी गेड़ेतेरूग जियोम उकराकतानो

8 ईम बिसवात चाजूरानोन गुलाय मेन्डान लोग ऊबूरानूग, सोब ले मुन्नी आन इमूंग जाम्मेगी ईसू मसीयाल तीग आम्म मापोरबून जुवार पोक्कूमेन। 9 आन इमीन एतोड नांग बिन्ती जोड़रान ती चुरता चाज चाजी मेनमेन एनी मापोरबू आन्न गोवा मेन्डाड। ओन चिन्डीन एडो पाटेन वेनपीकतान ई सेवेन आन आन्न जाम्मा मेन्न तीग चाजूमेन। 10 आरू एटे चाजी बेले मापोरबून उवाट तीग एपोर, आन इम लेग्गाट वेरू पाव ताकूरानो पूरा एरको एनी आपला बिन्ती ती एतोड नांग आडूमेन। 11 एटे एनोड मापोरबून जियोम इमूंग आन्न कान तीग चियरान नातो एरको बोकतीत इनाम तीग ईम बिसवात ती बेरकेच एरकोर एनी आन इमूंग जियोम उकराक किली इम्मोड बेट गाट एरू कान्डूकमेन। 12 एटे एनोड इम कान मेन्डान बिसवात तीग आन आरू आन्न कान मेन्डान बिसवात तीग ईम उचांग एरकोर। 13 ए बिसवासी बायीयोवे आरू दादेरे! आन एऊदीकूल चिला लोगीन बिसवात ती एन्देर्रान आकाट, इम कान तीग बेले ओदेरीन बिसवात ती एन्देर्रान एनी आन कुबे गुबोड़ूल इम लेग्गाट वेरू कानतीन एन्डानोन ईम पुन्दानो आय एनी आन मेन्न चाजूमेन। (एरोड एबेतार्रे नातो-नातो आनीन तेबाक मेट्टो।) 14 आन युनानीकूल आकाट तो बेड़कूल आरू युनानी पाटेन पूना इनमानतेर, आरू पोर्रालेर आरू आनपोड़ लोग एड एरोड बेले ओरीन जाम्मेन बिसवात ती एन्दरू लागा पाड्डी मेन्डानेन आकाटतेन आय। 15 आदूगी आन रोमी गेड़े ती मेन्डान इमीन बेले एडो पाटेन वेनपीक निक्के आलवाल एरमेन।

16 एटे एनोड एडो पाटेन बिसवात चाजूरानेर ओकूर ओकूरीन पोईल गो एऊदीकूलीन आनातले एऊदीकूल चिलायेरीन बेले मापोरबू आपला ताकोत तीग बाचाकताड; आदूग आन आ एडो पाटेन वेनपीक लाज एराना। 17 एटे एनोड आमान ईसू मसीयालीन बिसवास चाजूरान तीग आम देरमी एरीक एर्राम एनी एडो पाटा पारगाकमो। “देरमी मांजा बिसवात चाजूरान चेत्तूग चेत्त जियोमीन बेटूराड” एनी मापोरबून कागेत ती बेले लिका मेन्डा।

ओदेरमीकूलीन मापोरबून डान्डूरानो

18 एटे एनोड मापोरबून इजीत मानायेर जाम्मा आरू ओदेरमीकूल जाम्मा आपला ओदेरोमूल तो कामूल तीग चेत्तीन आटकाकतानूग मापोरबू ओरीन सरग तीग डान्डूमेड। 19 एटे एनोड मापोरबून इसाब ती नातोन-नातोन मांजा पुनूंग लागूरा एन्डानोन, मापोरबू ओरीन टोटीक मेन्डानूग ओर आवीन रेच्चा पुट्टेर। 20 एटे एनोड ओन चूड़ू एरा चेलनूकूड़ूल मोंजीपूरीन गेड़रान वादेक ले ओड गेड़ी मेन्डान बानील तीग चेर चेरा चोमजू एरमोव; आव नातोव आय एनोड, मापोरबून जुग-जुग तो ताकोत आरू मापोरबू ई ओकूरी मापोरबू आय एनी टोटीकतान चेलनूकूड़ूल आय। आदूग ओर आदीन पूनाम एनी दोदू ओड़ार। 21 एटे एनोड ओर मापोरबून पुन पुनी बेले ओड मापोरबू आय एनी इजीत मानेरा चिलाड चाराकपेरा; एरोड ओर बिचारूल पोकातोव एञ्ञोव आरू ओर बाकवाट मेन्न चीकोड कुटरान आकाट बाम्बरी एर चेन्डो। 22 ओर तामूंग तामी बुदीतोम आय एनी मानी किली बाकवालेर एर चेन्डेर। 23 आरू एतोडी चाय्या मापोरबून आचरूत तो बेड़तो ताकोतीन चाय्यरान मांजेन आरू तीतेलीन आरू जियादूलीन आरू रेंगूरान पुड़तीलीन आकाट तो मुरीतूलूग बादलाक किली आवीन पुतरा चाजी मानूमेर।

24 आदूगी ओर मेन्न तो लालेचूलीन चेत्तूग मापोरबू ओरीन किच किचाट बिचारूल चाजू बेटाक काट्टेड। आदूगी ओर ओकूर ओकूरीनोड आपला मेनूलीन इजीत चेनीकतान कामूल ती बीड़ाकमेर। 25 आरू ओर मापोरबून चेत्तीन टेगरान पाटेग पालटेर। आरू गेड़रानेडीन सेवा चाजाका गेड़रान बानीलीन सेवा चाजेर आरू जुवारतेर। एरोड गेड़रान मापोरबू ई जुग जुगूग जुवारूक एर्रान बातेरतेड आय! आटनी एरको।

26 आदूगी मापोरबू ओरीन इजीत बुड़ाकपीकतान बिचारूलीन चाजूरान लालेचूग ओपीक चिञ्ञेड; आयचील माईडूग गेर एर्रानोन चायी आयचील आयचीली राका राकी एर्रूव। 27 आटनी माईल बेले आयचीलीन राकूरानोन चायी किली माईल माईली राका राकी एरी निक्के लालेच एरी इजीत चिला काम ती बिड़ेर। आरू ओर ताम चाजूरान कियाल तो कामूलीन बूतीन आपला मेनूल आरू मेन्नूल ती बेटूमेर।

28 आरू ओर मापोरबून पुनूंग मेन्न चाजेरा, आदूगी मापोरबू बेले ओरीन चाजू बाना कामूलीन चाजेकेर एनी कियाल तो चुरते ती चाय काट्टेड। 29 ओर जाम्मा इसाबूल तो ओदेरोम तीग, एड़जाट तीग, जिवड़ेय एर्रान तीग आरू कियाल तो कामूल चाजूरान तीग कोप्पेर नार। आरू ओर कुचेर एर्रान तीग, आनकीकतान तीग, कावडी उयरान तीग, टेगरान तीग आरू एड़ंगाम तीग कोप्पेर नार। 30 आरू ओर कुद काचरानेर आरू लोगीन नेडीकतानेर, मापोरबून बाकनूरानेर, इजीत वीड़रानेर, डेंग एर्रानेर, बोड़पान एर्रानेर, कियाल तो कामूलीन उपजाकतानेर, ईय्या बुवेन पाटेल मानायेर मेन्डार। 31 आरू बाकवालेर, बिसवात चाजू एर्रान बातेरतेर चिलायेर, चोग चिलायेर आरू जियोम नोयपीकपायेर मेन्डार। 32 ईटो-ईटो कामूलीन चाजूरानेर चाय्यरान डेन्ड बेटूरान बातेरतेर आय एनी मापोरबून नियोम ती मेन्डानोन ओर पुट्टेर। एरोड बेले ओर तामी आ कामूलीन चाजूरानेर मेन्नी किली आटो कामूल ती लागी मेन्डान आवूर लोगीन बेले रेच्चाटीन चाजूमेर एनी मानूरार।